ESTRUTURA DO SITIO
Actualizado: luns 1 de marzo do 2010
Popularidade: 2 - visitas: 128
Autor
A instalación de SPIP é particularmente simple con respecto a outros sistemas ao non ser necesario ningún tipo de coñecemento técnico en particular (nin PHP, nin MySQL) para proceder á súa instalación. Só é necesario un espazo de aloxamento web normal que teña unha base de datos MySQL e que poida executar PHP.
A configuración faise directamente “en liña”, a través dunha interface gráfica moi simple (non é necesario modificar ningún ficheiro de configuración con códigos complexos).
Un sitio SPIP constrúese mediante unha estrutura xerárquica de seccións e subseccións (semellantes aos tradicionais cartafoles), radicadas na raíz do sitio que recollen artigos, breves… Deste xeito, cada sección só depende dunha única sección (e non de varias) e, ademais, non pode depender dunha das súas propias subseccións (é dicir, SPIP non permite as estruturas circulares). Só os administradores poden crear, modificar ou suprimir seccións.
O obxecto principal que permite publicar a información con SPIP é o artigo. A súa redacción é moi simple ao desenvolverse mediante unha interface gráfica vía web. Un artigo está constituído por varios elementos que permiten estruturalo: título, antetítulo, subtítulo, descrición, epígrafe, texto principal, post-scriptum. Tamén se poden incluír imaxes, logos e documento anexos. Con respecto a súa situación editorial no sitio web, un artigo pode presentar diferentes estados, que só poden ser modificados polos administradores:
- en proceso de redacción: cando os redactores están redactando ou facendo modificacións no artigo. Só é visible polo autor do mesmo e polos administradores. O resto de redactores do sitio non teñen acceso ao mesmo.
- proposto para a súa avaliación: cando o autor xulga que o artigo está listo, “propono”, co fin de que, eventualmente, se discuta colectivamente antes de ser validado (publicado en liña) ou rexeitado. Agora o artigo é visible por tódolos redactores. En cambio, só se pode modificar polo seu autor ou por un administrador.
- publicado en liña: despois de que, eventualmente, se discutise polos redactores na fase anterior, un artigo pode ser “validado”, é dicir publicado en liña por un administrador. Desde este momento, estará accesible para tódolos visitantes do sitio público. Cando un artigo se publica en liña, só os administradores poden modificalo. Se o seu autor quere facer correccións, deberá pedirllo a un administrador.
- rexeitado: un artigo “proposto” que non se axuste a liña editorial do sitio pode ser “rexeitado” se os administradores rexeitan publicalo en liña. Só é visible para o seu autor e para os administradores, pero xa non pode ser modificado polo seu autor, quen xa non poderá volver a propoñelo para a súa publicación.
- no lixo: esta opción adóitase reservar para os artigos creados por erro que se queren destruír completamente, pois o artigo deixará de estar visible no espazo privado, ata para os administradores, aínda que en realidade, o artigo sempre queda gardado na base de datos. Un artigo pode tirarse á lixo, unicamente por un administrador.
Como complemento aos artigos, SPIP integra un sistema de breves que facilita a publicación de notas curtas de información. A estrutura das breves é máis simple: un título e un texto que pode ser completado cun enlace de hipertexto. Outra diferenza con respecto aos artigos é que só poden publicarse nas seccións de primeiro nivel.
A xestión dunha breve é máis sinxela que a dun artigo ao non ter autor. O seu estado (só modificable polo administrador) pode ser:
- Breve proposta: tódolos redactores poden consultalas e modificalas. Os administradores encárganse de validalas ou rexeitalas.
- Breve validada: aparecen no sitio público. Só os administradores poden modificalas.
- Breve rexeitada: non aparece no sitio público, e só os administradores poden acceder a elas no sitio privado.
Ademais, SPIP integra un sistema de foros que se poden asociar coas seccións, artigos ou coas breves e que permiten realizar contribucións por parte dos visitantes do sitio web. Así mesmo, SPIP integra un sistema de foros privados, dedicados á discusión entre os diferentes usuarios do sitio no espazo privado. SPIP permite elixir a xestión dos foros públicos do sitio (os foros internos para a xestión do sitio sempre funcionan como foros abertos a tódolos redactores, e moderados a posteriori):
• Desactivar os foros públicos: desaparece a interface de envío de comentarios, e os comentarios antigos xa non se verán (non se borran da base de datos, pero interrómpese a súa publicación). Esta opción suspende o funcionamento dos foros.
• Foros moderados a posteriori: os comentarios móstranse desde que son enviados polos usuarios. Os administradores deben utilizar a páxina de seguimento dos foros de SPIP para moderar as mensaxes. Este é o modo predefinido.
• Foros moderados a priori: os comentarios dos usuarios gárdanse, pero non se publican. Os administradores deben utilizar a páxina de seguimento dos foros de SPIP para validar (ou rexeitar) cada mensaxe.
• Foros accesibles por suscripción: os usuarios que desexen participar deben inscribirse facilitando a súa dirección de email, recibindo o seu identificador nesa dirección.
Outro elemento importante son os sitios referenciados ou enlaces con outros sitios relacionados cos contidos do sitio. Adicionalmente, pódense crear sitios sindicados que permiten recibir automaticamente as últimas publicacións doutros sitios mediante a suscripción á RSS dos mesmos.
Ademais, pódense crear palabras craves que salvan a limitación da estrutura xerárquica do sitio que circunscribe cada artigo a unha soa sección, o que en ocasións causa dificultades de clasificación. As palabras crave ofrecen un medio de navegación transversal de forma que o visitante do sitio poderá navegar non só de sección en sección, senón tamén dende un artigo que trate sobre un tema a outro artigo asociado coa mesma palabra crave. En definitiva, asociando unha ou máis palabras crave a un artigo, disponse dun medio eficaz para crear enlaces con outros artigos de temática similar; pero situados noutras seccións. Só os administradores poden crear e modificar as palabras crave. As palabras crave poden asociarse, ademais, ás seccións, ás breves e aos sitios referenciados e sindicados.
SPIP tamén integra un sistema moi simplificado de estatísticas que permite avaliar e seguir o número de visitas do sitio e de cada artigo. Tamén permite saber cales son os sitios que enviaron visitantes ao sitio e a cada artigo.
Finalmente, posúe un completo soporte multilingüe para a xestión de traducións.
Toda esta estrutura xestionase a través dunha interface gráfica completa do sitio privado moi simple de utilizar:
• Esta interface adáptase en función das actividades de cada redactor ou administrador e en función da actividade do sitio. Así cada autor ten acceso rapidamente aos seus propios artigos e os artigos propostos para a publicación son sinalados a tódolos usuarios. Doutra banda a interface é diferente segundo se sexa redactor ou administrador.
• Cada usuario pode personalizar o seu interface elixindo entre unha interface simplificada que só ofrece as funcións principais e unha interface completa. Pode igualmente modificar un pouco a composición gráfica da interface.
• Cando un sitio acolle varios redactores, SPIP convértese nunha ferramenta de traballo cooperativa: debates en torno aos artigos, sistema de validación, traballo de varias persoas sobre un mesmo artigo…
Pola súa banda o sitio público construído con SPIP ofrece as características seguintes:
- Interface completamente adaptable polo webmaster sen coñecementos de PHP nin MySQL.
- Integra un sistema de caché para cada páxina individual: as páxinas son calculadas (a partir de informacións da base de datos) individualmente e almacenadas nun ficheiro da caché; así o servidor non se ralentiza por mor dun número moi alto de chamadas MySQL e o sitio é sempre accesible ata en caso dunha avaría do servidor de base de datos.
- Integra un pequeno motor de procura baseado nun sistema de indexación por palabras.
Publicado por Aula TIC PEMEs da USC - http://www.usc.es/atpemes
Palabras chave (1)
