Cátedra
de Cultura Cubana 'Alejo Carpentier'
Universidade
de Santiago de Compostela (España)
Presentación
Actividades
Publicacións
Seminario
Internacional "Alejo Carpentier e España"
Presentación
A
Cátedra de Cultura Cubana ‘Alejo
Carpentier’ da Universidade de Santiago de Compostela (USC)
fundouse no ano 1994 en virtude dun acordo bilateral da mesma coa Universidade
da Habana (Cuba) e a súa Facultade de Artes e Letras. As súas actividades
intégranse no Vicerrectorado de Extensión Cultural e Servicios á Comunidade
Universitaria. O convenio renovouse e ampliouse no ano 2000, e dentro desta
prioritaria bilateralidade estendeu a súa actuación a outras institucións
culturais e académicas de Cuba coas que a Universidade da Habana mantén
relación directa ou indirecta: o I.S.A.
– Universidade das Artes, a Fundación
‘Alejo Carpentier’, a Cátedra
‘Alejo Carpentier’, o Instituto
de Literatura e Lingüística José
A. Portuondo, o I.C.A.I.C, a Biblioteca
Nacional José Martí, entre outras.
A
dirección da Cátedra osténtaa o Catedrático Emérito de Literatura
Hispanoamericana desta Universidade, Dr. Varela Jácome, e a Subdirectora
Executiva é a Profª Titular de Literatura Española da mesma, a Dra. Yolanda
Novo Villaverde.
Actividades
Dende
finais do ano 1999 a Cátedra vén
desenvolvendo unha intensa actividade bilateral e tamén dentro da esfera da
propia USC, co fin de difundi-la cultura cubana máis xenuína nos campos das
Humanidades e as Ciencias Sociais. Así, en setembro de 2000 realizouse na
Habana un Curso Internacional de Posgrao en colaboración coa Universidade da
Habana e as outras dúas Cátedras universitarias de Cultura Cubana radicadas
en España. En Compostela tivo lugar, no 2001, unha importante exposición de
carteis de cine cubanos ilustrada por filmes representativos, que tivo unha
acollida tan favorable que levou este paquete de exposición
e proxección de películas a varios lugares de España, entre eles
Barcelona. O pasado ano 2002 celebrouse en Santiago un ciclo de audiovisual
cubano (dos ‘Grupos Creativos’ da RTV cubana) dirixido por Natasha Vázquez
e Rigoberto Senarega. E hai uns meses a Cátedra
colaborou activamente co Consulado Xeral
de Cuba en Galicia nos actos conmemorativos do CL aniversario de José
Martí no 2003. Tamén o intercambio intelectual de Galicia e Cuba lévase a
cabo a través de breves estancias de profesores de alá e aquí para reforza-las
investigacións en curso ou abrir novos campos de estudio. Ademais, veñen
sendo frecuentes as visitas curtas á nosa Universidade de profesionais de
Cuba para impartir conferencias e seminarios no ámbito das nosas Facultades e
Grupos de Investigación. Inversamente, varios profesores da USC dictan a miúdo
conferencias e cursos de posgrao na Universidade habaneira.
Unha
importante actividade da Cátedra é
a súa liña de publicacións específica, integrada dentro do Servicio de
Publicacións e Intercambio Científico da Universidade compostelá (SPIC). A
colección céntrase en textos relacionados coa cultura e a literatura de
Cuba. Gracias ás boas relacións coa viúva de Alejo Carpentier e coa Fundación
que ela preside, o primeiro
volume desta Biblioteca da Cátedra de
Cultura Cubana Alejo Carpentier (BCCCAC), dirixida pola Dra. Yolanda Novo,
puido ser unha edición académica –con estudio preliminar, bibliografía
actualizada e exhaustiva, e apéndices- de El
recurso del método, de Alejo Carpentier, edición realizada e coidada
polo carpenterista cubano José Antonio Baujín. Agora mesmo –setembro de
2003- vén de saír de imprenta o número 3, a monografía
José Martí y la novela de la
cultura cubana, de Ana Cairo, coa que a nosa Universidade rende homenaxe
ó legado intelectual e humano do cubano José Martí con ocasión do seu CL
aniversario. O volume 2, pola súa banda, xuntou tódolos ensaios críticos
sobre literatura cubana de Benito Varela Jácome. Na actualidade estase a
imprimir a edición completa, con estudio e notas, de tódolos ensaios e críticas
de Alejo Carpentier sobre a arte plástica española, edición preparada
conxuntamente pola Dra. Luz Merino e o Dr. José Antonio Baujín. Con este
cuarto volume en edición coidada,
que se vai presentar no curso do Seminario
Internacional ‘Alejo Carpentier e España’ de marzo do 2004,
a nosa Universidade tributa homenaxe a esta faceta de Alejo e á
imbricación e diálogo, a través del, da plástica española e cubana, ó fío
de importantes primicias sobre as relación intensas de Alejo con Picasso e
Miró, entre outros.
Seminario
Internacional "Alejo Carpentier e España"
O Seminario Internacional ‘Alejo
Carpentier e España’ vai
reunir na nosa Universidade compostelá a prestixiosos especialistas entre os
días 2 e 5 de marzo de 2004, co
obxecto de conmemorar academicamente dende esta Universidade, a través da súa
Cátedra cubana, o primeiro centenario do natalicio do escritor
cubano, en feliz coincidencia cos dez anos da existencia da Cátedra
e cun novo ano Xacobeo compostelán. As relacións intelectuais do autor e as
da súa ampla obra coa cultura e o legado literario español de tódolos
tempos iranse tratando monograficamente ó longo deses catro días, co obxecto
de botar luz sobre un dos aspectos menos estudiados sistematicamente. O
resultado deste encontro científico será editado en formato Actas.
Prevense actividades paralelas de carácter musical, bibliográfico e
cinematográfico.
Poden consultar a primeira
circular do Seminario AQUÍ.
O programa
xeral do Seminario poden consultalo AQUÍ.
Poden consultar o organigrama
do Seminario AQUÍ.
A información
hoteleira de
utilidade para quen desexe inscribirse no Seminario poden consultala AQUÍ.