Conferencias CEA: conferencias sobre temas de especial impacto e relevancia, en calquera disciplina no ámbito da ciencia, a técnica ou a cultura, e impartidas por personalidades de prestixio. A finalidade é estimular a difusión do coñecemento, a reflexión e a discusión sobre temas de interese para a sociedade en xeral e a comunidade universitaria en particular, e propiciar o diálogo entre as diversas culturas científicas e humanísticas.

Fronteiras do coñecemento: permite á comunidade universitaria, conxuntamente con interlocutores da sociedade, en xeral, analizar, formar unha opinión e desenvolver estratexias, a medio e longo prazo, sobre o desenvolvemento futuro en temas das ciencias e das tecnoloxías consideradas en cada momento fronteiras de coñecemento. Fomentarase o carácter multidisciplinar, achegas a través de ideas non convencionais e enfoques aínda pouco explorados.

Talleres exploratorios: permiten establecer contactos exploratorios entre científicos con diferentes formacións e procedencias. O obxectivo é chegar a establecer proxectos ou programas de investigación conxuntos a escala internacional. De novo a transnacionalidade e a multidisciplinariedade son dous ingredientes importantes, xa que fomentan a creación dunha masa crítica de excelencia en campos de investigación e o constante intercambio de ideas e experiencias.

Cursos e xornadas CEA: actividades dun ou máis días de duración, organizadas a modo de conferencias, relatorios, seminarios ou outras actividades centradas nun tema científico, técnico ou cultural, e dirixidas a un público especializado.

A Voz da Universidade: A Universidade ten o importante papel de informar a sociedade, e comunicarse constantemente con ela. A Universidade debe ser capaz de pronunciarse de forma rápida e eficaz, rigorosa e clarificadora sobre temas e acontecementos de especial actualidade, utilizando para isto os medios de comunicación adecuados para incidir sobre a opinión pública.