Información Xeral

• Estudos de Posgrao Propio: Máster propios e Cursos de Especialización

• Admisión e matrícula

• Seguro Obrigatorio

• Admisión de alumnos con títulos extranxeiros

• Expedición dos títulos

Estudos de Posgrao Propio

Son aqueles que están encamiñados á formación de especialistas, sobre todo en ramas interdisciplinarias e de interese social, cultural, científico técnico e /ou profesional.

A Lei Orgánica 11/1983 de Reforma Universitaria, recoñece ás Universidades, en uso da súa autonomía, a facultade de impartir ensinanzas conducentes á obtención de títulos ou diplomas, ademais daqueles que teñen validez en todo o territorio español. O Real Decreto 778/1998, que regula a obtención dos títulos de doutor e doutros estudos de posgrao, desenvolve a norma anterior, e di textualmente que as Universidades "poderán impartir ensinanzas para titulados universitarios sobre campos do saber propios da carreira de procedencia ou de carácter intercurricular e especialmente orientados á aplicación profesional dos ditos saberes"

Quen supere estas ensinanzas poderá obter o correspondente título ou diploma propio da Universidade.

Os estudios de posgrao propios da Universidade de Santiago de Compostela poden ser:

Másteres propios

Son estudos que teñen unha duración mínima de 50 créditos entre teóricos e prácticos e unha duración lectiva de, polo menos, un curso académico.

Como norma xeral para acceder a estas ensinanzas é requisito previo unha titulación universitaria correspondente ó 2º ciclo. Excepcionalmente poderán accede-los titulados de primeiro ciclo, cando a especificidade dun Máster concreto e a súa conexión coa formación de posgrao de titulados universitarios estea suficientemente xustificada.

Poderán ser admitidos nun Máster, cando así se dispoña na programación deste ou por acordo posterior da Comisión de Posgrao, os alumnos que teñan superados os créditos do primeiro ciclo das actuais titulacións de dous ciclos, sempre que non lle falten máis de 30 créditos para obter a titulación. En todo o caso, para poder obter o título de Máster, o alumno deberá posuír a condición de titulado antes de acabar o ano académico correspondente ós estudos. Os alumnos que cursaran estudos nun Master e non tiveran dereito ao título poderán solicitar unha certificación de ditos estudos.

Cursos de especialización

Teñen unha duración mínima 20 créditos, e poderán acceder a estas ensinanzas os titulados universitarios de primeiro ou segundo ciclo. Tamén poden acceder aqueles profesionais directamente relacionados coa especialidade, sempre e cando cumpran os requisitos legais de acceso á universidade, e así se recolla expresamente na convocatoria. Así mesmo, poderán acceder alumnos non titulados, pero tendo en conta que para poder obte-lo título de Especialista Universitario deberán posuí-la condición de titulados antes de acaba-lo ano académico correspondente ós estudos.

Admisión e matrícula

Os aspirantes  a cursar estudos de Posgrao Propio deberán reuni-los requisitos xerais mencionados e tamén os específicos de cada un dos cursos. As solicitudes de admisión presentaranse nas secretarías dos departamentos, centros ou institutos universitarios que ofrezan estes estudos, nos prazos que se fixen para cada un deles. Na solicitude, que se poderá facer nun modelo normalizado (P10), indicarase se o alumno desexa ser considerado para unha bolsa (no caso de que o curso ofreza a súa concesión).

Unha vez efectuada a admisión pola comisión académica de cada curso, se efectuarán as seguintes xestións:

• Publica-las listas de admitidos e excluídos. No caso de que os cursos o consideren, entre os admitidos indicarase os que teñen concedida unha bolsa e a súa contía.

• Fixa-lo prazo de reclamacións.

• Publicar as listas definitivas de admitidos e bolseiros, e o horario de impartición dos estudos.

• Publica-los prazos de matrícula.

Os alumnos deberán formaliza-la matrícula na SECCIÓN DE POSGRAO, TERCEIRO CICLO E FORMACIÓN CONTINUA (Pavillón estudiantil- Campus Universitario Sur, 15782 Santiago de Compostela) mediante modelo normalizado (P11), nas datas que se indicarán para cada un dos cursos, e aboarán o importe de matrícula que corresponda coa a folla de liquidación de prezos públicos facilitada pola Sección de posgrao, Terceiro ciclo e Formación Continua no momento de formaliza-la matrícula.

Seguro Obrigatorio

Establecemento Seguro Obrigatorio de Accidentes e Asistencia en viaxe para estudantes da USC (Acordo Consello Goberno 29 de xuño de 2009)

Para garantir que todos/as os alumnos teñan subscrito un seguro obrigatorio de accidentes no momento de matricularse, o seu importe inclúese na liquidación da matricula

Admisión de alumnos con títulos estranxeiros

Os alumnos que se atopen en posesión dun título estranxeiro, e que desexen realizar estudos de Posgrao (Máster ou Especialización) na Universidade de Santiago de Compostela, poderán facelo sen necesidade de homologar previamente o seu título. Para estes efectos será suficiente a autorización outorgada polo reitor. Estes alumnos, ademais de solicitar a admisión polo procedemento establecido, deberán acreditar a titulación que posúen, que haberá de ser equivalente aos españois de licenciado, enxeñeiro ou arquitecto ou diplomado, enxeñeiro técnico e arquitecto técnico. A autorización do reitor, que se expedirá previa comprobación da correspondencia do título estranxeiro presentado.

Esta autorización unicamente será válida para realizar o curso no que sexa admitido.

Expedición dos títulos

Os alumnos que obteñan a cualificación global de "apto" terán dereito á expedición dun título propio da Universidade de Santiago de Compostela. Os alumnos que non obteñan esta cualificación poderán solicitar unha certificación académica das materias cursadas. Tanto as solicitudes dos títulos como das correspondentes certificacións faranse na SECCIÓN DE POSGRAO, TERCEIRO CICLO E FORMACIÓN CONTINUA (Pavillón estudantil- Campus Universitario Sur, 15782 Santiago de Compostela).

Para a expedición pola USC de Títulos Propios, Diplomas e certificados é necesario realizar o pagamento das taxas que aprobe o Consello Social para cada ano académico.

Os títulos propios de posgrao expedidos pola USC serán asinados polo reitor, polo interesado e polo xefe da dependencia administrativa responsable da tramitación e expedición do título, en modelo normalizado no que poderá figurar impresa a sinatura do reitor, e causarán constancia rexistral nun Rexistro Universitario de Títulos Propios, con análogas condicións de identificación, custodia, certificación e carácter público que o rexistro universitario de títulos oficiais. No reverso do titulo figurará a relación de materias e de créditos superados.