Propostas de cursos de posgrao propio e de formación continua para o curso 2010-2011

Establécense os seguintes prazos preferentes para a elaboración e presentación de propostas de cursos de Posgrao Propio e Formación Continua para o vindeiro curso académico 2010-2011:

Propostas de renovación de cursos: ata o 26/02/2010

Propostas de cursos novos (1ª edición): ata o 15/03/2010

Coa finalidade de axilizar a aprobación e posta en marcha das propostas, se procederá a enviar aos cursos vixentes no ano 2009/10 o formulario cuberto cos datos correspondentes á última edición, tal como figuran no Centro de Posgrao Terceiro Ciclo e Formación Continua (CPTF), para que introduzan as modificacións que estimen oportunas. Este envío realizarase vía correo electrónico, a partir do 27 de xaneiro.

Deberán utilizar os formularios para a elaboración das propostas, e remitilos por correo ordinario, así como por correo electrónico (cptf@usc.es).

Ademais das instrucións que acompañan a este formulario, é preciso ter en conta que:

1- Todas as propostas deben vir debidamente cubertas, tanto nos aspectos académicos como económicos.

2- Por acordo do Consello Social o prezo máximo por crédito dos cursos de posgrao e formación continua é de 120€; este importe  non se debería superar para as retribucións/hora dos profesores por dirección, coordinación e docencia.

3- Dende o curso 2005-06 o importe do seguro ten que ser pagado polo alumno xunto co prezo público por matrícula.

4- As taxas por diplomas e títulos serán aboadas, en todos os casos, polos alumnos, agás que o director(a) do curso indique na proposta inicial que as devanditas taxas están incluídas no prezo de matrícula.

5- As propostas deben vir asinadas en todas as súas follas polos directores/as do curso.

6- Equipáranse os créditos presenciais e non presenciais (1 crédito=10 horas).

7- Lémbrase a obriga de presentar a Memoria Académica e Económica da edición anterior do curso, sempre e cando estea rematado, co visto e prace do centro responsable. Xa está dispoñible na nosa páxina web o formulario para cubrir as memorias, que se deberá enviar por correo electrónico e por correo ordinario. O exemplar en papel debe estar asinado en todas as follas polos directores/as e co visto e prace do director/a do departamento, decano/a ou director/a do centro ou director/a do instituto universitario que actúe como responsable.

A Comisión de Posgrao Propio non tramitará propostas de renovacións dos cursos que teñan pendentes a entrega de memorias de edicións anteriores.

 8- Para o cálculo dos importes de contratación de  persoal, retribucións por dirección, coordinación, docencia e por colaboración de PAS nos cursos de posgrao propio, está dispoñible na páxina web do CPTF: http://www.usc.es/cptf/Postgrado/Formularios/InfFormulariosPosgraog.htm#CalculadoraContratos unha ligazón á calculadora de importes de contratos laborais da OIT.

9- Para calquera dúbida poden dirixirse ás seguintes extensións:14409, 14363 e 14360 do CPTF.

10- Pode consultar toda a información relativa á convocatoria no seguinte enlace:

http://www.usc.es/cptf/Postgrado/PropostasCursosPosgraog.htm

Santiago de Compostela, 4 de febreiro do 2010

 

Máximo Pló Casasús

O Vicerreitor de Oferta Docente

e Espazo Europeo de Educación Superior