UNIVERSIDADE DE VERÁN 2013
CONVOCATORIA E NORMAS REGULADORAS

[Se o desexa, pode baixar esta convocatoria en documento PDF]

Segundo recollen os puntos 1 e 2 do artigo 4 dos Estatutos da Universidade de Santiago de Compostela, unha das funcións da nosa Universidade é a difusión do coñecemento e da cultura a través da extensión universitaria desenvolvendo cursos e actividades que procuren a formación integral do individuo ao longo de toda a vida. Neste sentido, a Universidade de Verán constitúe unha privilexiada plataforma de servizo e contacto coa sociedade e representa a esencia mesma da extensión universitaria.

Os cursos de verán da USC contan xa cunha dilatada e importante traxectoria de extensión, intercambio e posta en valor da actividade universitaria e conforman un foro activo para difundir e compartir saberes e experiencias así como para a actualización e debate da innovación científica en todos os ámbitos do coñecemento, incluíndo actividades e participantes que non teñen fácil cabida no período lectivo ordinario. Permiten, ademais, unha accesibilidade e unha convivencia activos e intensos entre o alumnado, o profesorado da nosa universidade e investigadores/as e especialistas doutros ámbitos.

Así, pola presente convócase a edición 2013 da Universidade de Verán da Universidade de Santiago de Compostela que se rexerá polas seguintes

NORMAS REGULADORAS

I. CONSIDERACIÓNS XERAIS

·         As presentes normas regularán o funcionamento da Universidade de Verán 2013. As propostas que se remitan para a súa consideración deberán cinxirse a estas normas e incluír todos os datos que se solicitan.

·         As propostas pódense presentar en dúas categorías:

Cursos, con 30 ou máis horas de duración, recoñecidos con 2 créditos de libre configuración (diplomaturas, mestres, enxeñarías, enxeñarías técnicas e licenciaturas).

Outras actividades, de 15 a 29 horas de duración entre as que se poden incluír formatos como seminarios, foros, obradoiros, encontros, xornadas, etc., recoñecidas con 1 crédito de libre configuración (diplomaturas, mestres, enxeñarías, enxeñarías técnicas e licenciaturas).

Para as titulacións de Grao adaptadas ao EEES recoñécense créditos coa seguinte equivalencia:

2 créditos por cada curso de 25 ou máis horas

1 crédito por cada curso de menos de 25 horas

As horas lectivas contabilizadas han ser necesariamente presenciais; non se poden contemplar horas por realización de traballos.

·         A asistencia a cursos e actividades da Universidade de Verán non poderá ter ningún outro efecto curricular nin computable nas materias das titulacións da USC, excepto a obtención dos créditos correspondentes.

·         Os cursos e actividades da Universidade de Verán poden estar orientados ao público en xeral, a estudantes universitarios/as, a docentes, a profesionais ou a outros sectores. O equipo organizador deberá facer constar no proxecto a que sector ou sectores vai orientado e realizar no seu momento unha difusión de información particular dese curso dirixida ao/s sector/es interesado/s.

·       Os cursos e actividades da Universidade de Verán 2013 desenvolveranse exclusivamente entre o 16 de xullo e o 5 de setembro de 2013 (esta última data quedará supeditada á aprobación da data de inauguración do próximo curso académico). Nesta edición, ademais, e de xeito experimental, será posible situar cursos entre o 3 e o 21 de xuño de 2013. 

·       A estrutura de cada programa (horarios, distribución de conferencias, mesas redondas, obradoiros, visitas prácticas...) será determinada libremente por cada director/a. En todo caso, non se poden programar máis de 8 horas de actividade lectiva por xornada.

·       Cada curso ou actividade terá como mínimo un/ha director/a e un/ha secretario/a. Cando menos, unha destas persoas deberá pertencer á USC, e será a responsable última perante a Vicerreitoría aos efectos organizativos e administrativos. Pode haber, tamén, co-direccións e secretarías compartidas.

·       Os cursos e actividades poderán ter lugar nos campus de Compostela e Lugo, así como nas instalacións de apoio que a USC posúe fóra dos campus. Nos casos nos que se queira propoñer a celebración noutro lugar que non sexa unha instalación da USC, xunto coa proposta débese axuntar un escrito do concello, institución ou entidade anfitrioa no que se compromete a co-financiar a actividade e a facilitar as instalacións e medios para o seu desenvolvemento.

·       O prazo de matrícula concluirá unha semana antes do comezo de cada curso ou actividade para poder garantir a entrega en tempo e forma de diplomas, certificados, enquisas de avaliación e listaxes.

·       Poderase dispor, se a dirección dun curso o desexa, de 1 alumno/a colaborador/a. Esta figura consiste en designar unha persoa de apoio por cada curso para realizar, exclusivamente durante a celebración do mesmo, tarefas de atención de intervenientes, control de asistencia, manexo de equipos audiovisuais e outras atencións de carácter xeral. Esta persoa, que será proposta no seu momento pola dirección do curso co visto bo da Vicerreitoría de Estudantes, Cultura e Formación Continua, será estudante activo da USC e terá dereito a matrícula gratuíta no curso ou actividade no que colaborará, así como a unha constancia escrita da súa colaboración.

·       Existe un procedemento xeral de avaliación dos cursos e actividades de verán a través de enquisas que se lle pasarán no seu momento aos/as asistentes coa finalidade de coñecer o grao de calidade e satisfacción co que se desenvolven ditas actividades e cursos.

II. PRESENTACIÓN E PROCESO DE SELECCIÓN DE PROPOSTAS

·       Poderán presentar propostas aos Cursos de Verán os profesores e profesoras da Universidade de Santiago de Compostela, departamentos, institutos, servizos, facultades, escolas superiores e escolas universitarias da USC.  Unha mesma persoa poderá formar parte da dirección e/ou secretaría dun máximo de 2 propostas.

·       As propostas pasarán por dúas fases avaliativas, unha primeira de preselección e unha segunda que recolle a avaliación académico-científica.

A.- Fase de preselección

·       Aos efectos de considerar a súa viabilidade xenericamente, evitar repeticións, procurar un equilibrio de temáticas, dosificar previamente as propostas para un mesmo concello e permitir unha mellor organización do conxunto de actividades, establécese unha fase de preselección.

O prazo para presentar propostas remata o 15 de decembro de 2012 e deberán dirixirse ao correo electrónico cursosdeveran@usc.es :

·         As propostas deberán incluír a seguinte documentación:

1.- A ficha que se xunta como apéndice 1 destas normas, cuberta por completo. (Pódese baixar aquí en formato Word ou aquí en formato PDF)

2.- A proposta da acción que debe incluír os seguintes apartados:

a)     título do curso

b)     obxectivos

c)     público a quen primordialmente vai dirixido

d)     tipo de actividade: curso (30 ou máis horas) ou seminario, foro, encontro, etc. (entre 10 e 29 horas)

e)     breve descrición de contidos

f)       orzamento total aproximado coa previsión provisoria de financiamento externo

B.- Fase de avaliación definitiva

Na primeira quincena do mes de xaneiro de 2013 darase a coñecer a relación de propostas que pasaron a preselección e as eventuais recomendacións de mellora das mesmas. De conformidade co artigo 59.5.b) os taboleiros de anuncios nos que se efectuarán as sucesivas comunicacións serán na Reitoría (Colexio de San Xerome. Praza do Obradoiro s/n, Santiago de Compostela) e na Vicerreitoría de Coordinación e Planificación do Campus de Lugo (Pazo de Montenegro, Praciña da Universidade s/n, Lugo), sen prexuízo da súa publicación complementaria en medios electrónicos ou noutros taboleiros da USC.

Contra a proposta de preselección os interesados poderán presentar reclamacións no prazo de 5 días hábiles. Transcorrido ese prazo e resoltas as mesmas, o  Vicerreitor de Estudantes, Cultura e Formación Continua resolverá por delegación a relación definitiva de cursos preseleccionados. Desde ese momento, as persoas propoñentes terán de prazo 10 días hábiles desde a comunicación definitiva da preselección para achegar a 2ª quenda de información precisa para a avaliación definitiva que incluirá:

a) programa de contidos

b) relación de intervenientes cun breve perfil académico e/ou profesional (máximo 10 liñas para cada persoa)

c) orzamento desglosado nos seguintes conceptos:

- honorarios

- viaxes

- aloxamento e manutencións

- outros gastos (difusión propia, material técnico...)

- SUMA TOTAL DE GASTOS

- compromiso de financiamento externo previsto, indicando as entidades colaboradoras e a súa achega

A estas propostas realizaráselles unha avaliación académico-científica, a cargo do consello científico do Centro de Estudos Avanzados da USC, que ten por obxecto garantir a calidade do Programa.

Analizará os seguintes criterios, coas seguintes puntuacións:

calidade dos contidos: máximo 3 puntos

actualidade da temática: máximo 3 puntos

solvencia de intervenientes: máximo 2 puntos

interdisciplinariedade: máximo 2 puntos

Á parte, valorarase negativamente a posible coincidencia dos contidos con materias curriculares (0=ningunha, -1=pouca, -2=media). No caso de existir unha coincidencia grande, o proxecto non será considerado.

Deste xeito, cada proposta terá unha puntuación académico-científica que oscilará entre -2 e 10.

C.- Selección final

Sumadas as puntuacións da avaliación, realizarase a selección final para conformar o programa da Universidade de Verán 2013, que constará das propostas que cheguen a 5 ou máis puntos na avaliación.

A lista provisoria de propostas seleccionadas será comunicada nos taboleiros da Reitoría (Colexio de San Xerome. Praza do Obradoiro s/n, Santiago de Compostela) e da Vicerreitoría de Coordinación e Planificación do Campus de Lugo (Pazo de Montenegro, Praciña da Universidade s/n, Lugo), sen prexuízo da súa publicación complementaria en medios electrónicos ou noutros taboleiros da USC.  Contra a proposta de selección os interesados poderán presentar reclamacións no prazo de 5 días hábiles. Transcorrido ese prazo e resoltas as mesmas, o  Vicerreitor de Estudantes, Cultura e Formación Continua resolverá por delegación a relación definitiva de cursos seleccionados.

III. CUESTIÓNS ECONÓMICAS

·       Os/as organizadores/as das propostas terán que conseguir o financiamento necesario para a súa realización.

·       As propostas aprobadas contarán, ademais, co 80% do total de ingresos que se obteñan pola matrícula.

·       Os prezos de matrícula aplicables na Universidade de Verán 2013 serán os mesmos que na pasada edición:

Prezo xeral

cursos de 30 ou máis horas lectivas: 120 €

seminarios e xornadas de menos de 30 horas: 70 €

Prezo reducido (aplicable a estudantes de calquera universidade ou en estudos de formación profesional, pensionistas , persoas desempregadas e PDI e PAS da USC)

cursos de 30 ou máis horas lectivas: 70 €

seminarios e xornadas de menos de 30 horas: 40 €

A parte, todas as persoas, nacionais ou estranxeiras, que non están cubertas polo seguro escolar obrigatorio do INSS, por non ter formalizada matrícula en estudos oficiais na USC no curso académico 2012-13 ou ben, sendo alumnos/as da USC neste curso 2012/13 son de nacionalidade estranxeira ou nacionais maiores de 28 anos e non teñan contratado este seguro nos estudos nos que formalizaron matrícula, deben subscribir o seguro obrigatorio de accidentes e asistencia en viaxe que terá un custe de 15€.

·       A publicidade e a difusión xeral da Universidade de Verán correrán por conta da Vicerreitoría de Estudantes, Cultura e Formación Continua. Á parte, cada curso ou actividade deberá facer a súa difusión propia, así como materiais impresos, que correrán a cargo do seu propio orzamento. Este material deberá ser revisado pola Vicerreitoría de Estudantes, Cultura e Formación Continua antes de se imprimir para comprobar que se respectan as normas de imaxe corporativa e fins da USC.

·       Abrirase unha aplicación orzamentaria a nome de cada curso da que será titular o/a director/a. Esta aplicación abrirase no centro de gasto do servizo, instituto ou centro de que dependa o/a director/a ou secretario/a no seu caso e será dotada dunha contía inicial por parte da Vicerreitoría de Estudantes, Cultura e Formación Continua a modo de anticipo. O/a director/a será quen autorice os gastos, sendo o/a responsable de asuntos económicos do centro de gasto correspondente quen execute os pagamentos. No caso de que o/a director/a non pertenza á USC, exercerá a titularidade desta aplicación o/a secretario/a.

Fíxanse uns límites máximos para as remuneracións. Para os honorarios de dirección e secretaría establécese unha contía máxima de 600 € brutos c/u (no caso de direccións ou secretarías compartidas, a contía deberase repartir). Nesta contía enténdense como incluídas as posibles conferencias ou outras intervencións que realicen durante o curso.

Os honorarios dos/as relatores/as non poderán superar os 400 € brutos por intervención, cifra que só se poderá superar con autorización da Vicerreitoría de Estudantes, Cultura e Formación Continua previa xustificación argumentada por parte do/as propoñentes e da comprobación de que se conta cos recursos suficientes.

IV. FUNCIÓNS E RESPONSABILIDADES

·       As funcións e responsabilidades dos/as directores/as serán:

1.   respectar todos os prazos e condicións destas normas.

2.   fixar os contidos do programa e designar o/a secretario/a

3.  estabelecer os contactos co profesorado convidado, reservar o lugar de celebración e realizar, co apoio do/a secretario/a, todas as xestións organizativas do curso

4.  establecer, no seu caso, contacto previo e con suficiente antecedencia co concello anfitrión ou institución/entidade colaboradora para asegurar unha estreita coordinación de todas as cuestións organizativas “in situ”

5.   supervisar e responsabilizarse da execución do gasto

6.   pasar as probas do material de difusión propia do curso á revisión na Vicerreitoría antes da súa impresión

7.   supervisar o control de asistencia, asinar os diplomas de asistencia e elaborar a acta do curso

8.   elaborar, de ser solicitado polos/as interesados/as, constancias de participación para o profesorado interveniente

9.   entregar ás/aos alumnas e alumnos o cuestionario de calidade que a Vicerreitoría previamente proporcionará e facelo chegar a esta.

·       A función e responsabilidade dos/as secretarios/as será complementar e asistir ao/á director/a no desenvolvemento das tarefas e xestións organizativas do curso. Igualmente, e de acordo con este/a, poderá asumir as tarefas que lle sexan encomendadas atribuídas á dirección.

·       A función e responsabilidade dos/as alumnos/as colaboradores/as desenvolverase só durante a realización do curso e consistirá no apoio loxístico para realizar tarefas de recollida e atención de intervenientes, control de asistencia, manexo de equipos audiovisuais e outras atencións de carácter xeral.

·       A Vicerreitoría de Estudantes, Cultura e Formación Continua responsabilizarase de:

1.  coordinar e supervisar o desenvolvemento xeral dos cursos e velar polo cumprimento das normas e dos orzamentos e condicións económicas

2.   elaborar os diplomas de asistencia, certificados de crédito de libre configuración e listaxes de matriculados/as

3.   organizar a publicidade e difusión xeral e supervisar o material de difusión propia no caso dos cursos que o elaboren

4.  proporcionar aos/ás directores/as o cuestionario de calidade para que cumprimenten o/as alumnos/as ao finalizar o curso

5.   organizar a matrícula, de acordo cos servizos específicos que a xestionaren.

Santiago de Compostela, 7 de novembro de 2011

O Reitor

(P. D.  r.r. do 28 de xullo de 2011 de delegación de competencias, o Vicerreitor de Estudantes, Cultura e Formación Continua)

Asdo: Francisco Ramón Durán Villa

INFORMACIÓN E CONSULTAS           

Para calquera consulta ou dúbida sobre estas normas, pódense dirixir ao director da Área de Cultura e coordinador da Universidade de Verán, Pablo Sampedro Magán, na extensión telefónica 11123, no correo electrónico psampedro@si.usc.es  ou directamente no Colexio de San Xerome.