O Departamento de Matemática Aplicada está constituído por 29 profesores (26 deles doutores), que se reparten en dúas Áreas de coñecemento: a Área de Matemática Aplicada, con 25 profesores, e a Área de Astronomía e Astrofísica, con 4 profesores.
• Área de Matemática Aplicada
A Área de Matemática Aplicada imparte docencia nas titulacións de Matemáticas, Bioloxía, Química, Ciencia e Tecnoloxía dos Alimentos e Óptica e Optometría; nas Enxeñarías Química, Agrónoma e de Montes e nas Enxeñarías Técnicas de Informática de Sistemas, Agrícola, Forestal, Industrial, Obras Públicas e Topografía. En todas elas, a ensinanza das Matemáticas busca a integración co resto das materias da titulación mediante a realización de exercicios e aplicacións especialmente adaptadas ao currículum dos estudantes; a maioría delas contan cun curso virtual de apoio á docencia. Particularmente importante é o compromiso da Área coa titulación de Matemáticas na que soporta a especialidade de Matemática Aplicada.
Esta Área participa nun programa de posgrao interuniversitario de Métodos Matemáticos e Simulación Numérica en Enxeñaría e Ciencias Aplicadas coa participación de grupos de Matemática Aplicada das Universidades de A Coruña e Vigo; este programa conta coa mención de calidade do Ministerio de Educación e Ciencia desde a súa posta en marcha e actualmente inclúe un Máster Oficial en Enxeñaría Matemática e un doutoramento. O obxectivo é formar a licenciados, enxeñeiros ou arquitectos tanto no manexo de ferramentas de simulación numérica e a súa aplicación á resolución de procesos industriais e empresariais, como para realizar unha tese de doutoramento, sexa cunha vertente de Computación ou de Análise Numérica.
A Área de Matemática Aplicada participa tamén no Programa Oficial de Posgrao en Enerxías Renovables e Sostibilidade Enerxética impartindo cursos de Simulación Numérica en Enerxía Solar, en Caldeiras de Combustión e en Aeroxeradores.
Dentro desta área conviven tres grupos de investigación especializados na resolución numérica de ecuacións en derivadas parciais, con especial énfase na modelización, a análise matemática e a resolución numérica de fenómenos procedentes da Enxeñaría e as Ciencias Aplicadas. En particular a Área desenvolveu contratos e proxectos de investigación en ámbitos tan diversos como Metalurxia, Mecánica de Sólidos, Enerxía, Medioambiente, Acústica, Novos Materiais, Mecánica de Fluídos, Automoción, Finanzas e Biosanitaria.
| • Área de Astronomía e Astrofísica |
|
|
Os estudos e máis as investigacións sobre Astronomía teñen unha grande tradición na Universidade de Santiago de Compostela, estando ambos vencellados á existencia do Observatorio Astronómico http://www.usc.es/astro .
A Sección de Astronomía Teórica e Matemática "Durán Loriga" creada dentro do Observatorio en 1945 á que pertenceron entre outros os profesores Vidal Abascal e Gacía-Rodeja deulle un importante pulo ás investigacións matemáticas na nosa universidade, o tempo que pode considerarse o xerme a partir do cal xurdiría anos máis tarde a Sección de Matemáticas dentro da Facultade de Ciencias, na actualidade, Facultade de Matemáticas.
A cátedra de Astronomía, que ocupara o fundador do Observatorio o Dr. don Ramón María Aller Ulloa, foi de feito a primeira con que contou dita Sección de Matemáticas.
Despois dun tempo no que a USC non contou con doutores nestas materias, desde 1981 pode dicirse que a situación comezou a normalizarse tanto no que se refire á docencia na Facultade de Matemáticas como ás actividades do Observatorio Astronómico.
Na actualidade impártese docencia na Licenciatura de Matemáticas (campus de Santiago de Compostela) e na Diplomatura de Enxeñería Topográfica (campus de Lugo).
Así mesmo impártese docencia no IV Ciclo Universitario nas materias de Iniciación á Astronomía e Astronomía, das que é coordinador o profesor Docobo. Desde hai 9 anos organízase tamén o Programa de Extensión Cultural de Astronomía http://www.usc.es/pecas dirixido a tódala comunidade universitaria e no que participan cada ano 400 alumnos, convalidándose 1 crédito de libre configuración.
O persoal da Área, xunto con outros investigadores do Observatorio Astronómico Ramón María Aller configura o equipo investigador OARMA que figura no catálogo de grupos de investigación da USC co código.GI-1565.
Subir |
