O caos sistémico que estamos a provocar no noso planeta está acelerando a desaparición da diversidade, tanto biolóxica coma cultural, afectando seriamente á resiliencia de ecosistemas e comunidades e, polo tanto, reducindo a nosa capacidade de resposta fronte aos choques que xa estamos comezando a recibir.
Nun contexto mundial no que o pico de produción do petróleo está xa superado e onde o cambio climático adquire cada vez máis proporcións catastróficas, as comunidades humanas atópanse cada vez máis vulnerables e dependentes, mantendo en moitos casos relacións baseadas na desigualdade e na explotación.
A USC, como entidade e como comunidade, non se comporta dun xeito moi distinto… O elevado consumo enerxético das súas instalacións, a dependencia económica e a falta de cohesión e mobilización do conxunto da comunidade universitaria son algúns exemplos da súa fraqueza fronte aos importantes cambios que, previsiblemente, sufriremos nas próximas décadas.
Cómpre mudar esta situación.
