Mil primaveras. Por un futuro de árbores e palabras

Co alborexar da primavera, aló polo mes de marzo, o Concello de Pontevedra inaugurou unha campaña de compromiso co idioma, a cultura e a natureza galega. Baixo o lema Mil primaveras. Por un futuro de árbores e palabras, o pasado día 21 de marzo comezaban os actos, e facíase a plantación de 25 carballos no monte da Fracha que renden homenaxe ós personaxes que protagonizan o Coloquio dos vintecatro rústicos de Frei Martín Sarmiento.
 
Xa nas vésperas do 22 de abril, Día do Libro, os cativos de cada colexio da cidade plantaron de novo carballos coa intención de establecer, desde a infancia, unha ligazón entre o mundo das árbores e o dos libros.

Como eixo central desta campaña o Concello fixo público o manifesto 'Mil primaveras' da man do escritor Xosé Vázquez Pintor. Con el convídase a tódalas persoas e entidades a que asinen e amosen así o seu compromiso co futuro do noso idioma e da nosa natureza. O que desexe participar pode facelo dirixíndose ó Servicio de Normalización Lingüística do Concello de Pontevedra (Chalé Fontoira, Praza do Campo do Boi, s/nº, Pontevedra; telf. 986 863 157, <normalizacionlinguistica@concellopontevedra.es>) ou  desde o espacio aniñado en Vieiros <http://www.vieiros.com/pontevedra/milprimaveras/>.

A campaña remata o vindeiro sábado 14 de decembro cun acto lúdico-reivindicativo que se vai celebrar ó pé do histórico carballo de Santa Margarida.