Coñece o software en galego

Como é ben sabido, o mercado está  dominado mundialmente polo xigante Microsoft, e malia que os seus productos se ofrecen localizados en moitísimos idiomas, incluídos o catalán e o eúscaro, o galego segue afastado dos programas máis populares.

Sen embargo, o procesador de textos máis utilizado, o Word para Windows, podemos visualizalo en galego gracias ó TradWordGal, unha simple macro que traduce totalmente os menús do Word97 ou 2000. Así, poderemos abrir un ficheiro de Word, gardalo, inserirlle unha táboa, abrir unha xanela, consultar a axuda... Literalmente.

É no reino do software libre e da libre distribución onde podemos atopar programas no noso idioma, gracias, fundamentalmente, ó traballo desinteresado de persoas e organizacións.

Tal é o caso do Opera, un navegador para a Web que tamén incorpora un xestor de correo e de novas, o máis rápido e lixeiro na actualidade. Está traducido ó galego, con recoñecemento oficial de Opera Software, na súa versión 5.12, e está para saír a 6.05. Se está farto de ter que usar o Explorer e o Outlook, velaquí outra opción e en galego.

¿Quen non precisa compactar arquivos algunha vez, para que pesen menos? En galego dispoñemos do WinRAR, que permite comprimir e descomprimir arquivos con formatos RAR e ZIP.

Para baixar de Internet gravacións en MP3 e escoitalas, existe o WinAmp con interface en galego.

Tamén no noso idioma existen servicios de mensaxería instantánea, programas de chat, clientes de FTP, xestores que melloran as descargas de arquivos dende servidores, aplicacións para descargar sitios web enteiros, etc., tales como MSN Messenger, mIRC, LeechFTP, NetVampire, WebZip, WebCopier...

Tódalas aplicacións anteditas foron desenvolvidas por galego21, unha organización que ten asinado un convenio de colaboración coa USC. Dende o seu web <http://www.galego21.org/xis> pódese obter máis información sobre estas e outras aplicacións e descargalas.

O famoso buscador Google <http://www.google.com> ofrece a posibilidade de galeguizar a interface, para o cal cómpre entrar en "Ferramentas de lingua", e unha vez alí seleccionar o galego como lingua.

Por último, existe un servidor de correo web que permite, no formulario de rexistramento, escolmar o galego como lingua de preferencia. Chámase telépolis <www.telepolis.com>.