|
Benvido ao sitio web da Facultade de Filoloxía da Universidade de Santiago de Compostela, unha institución que che ofrece a posibilidade de realizar estudos lingüísticos e literarios a través da súa ampla oferta de títulos de grao, máster e doutoramento.
Para axudarche na túa aprendizaxe contamos cun profesorado experimentado e de recoñecido prestixio nos seus ámbitos de traballo, cunha excepcional biblioteca especializada, que reúne máis de 150.000 monografías e 1.700 revistas, e coa máis moderna infraestrutura informática e audiovisual de apoio ao ensino e á aprendizaxe (aulas de informática, laboratorios de idiomas, rede wifi, sala de videoconferencias, etc.).
Estudando unha das nosas titulacións poderás realizar parte dos teus estudos nunha das numerosas universidades de Europa, América, Asia e Australia coas que mantemos convenios de intercambio. Ao tempo, terás a oportunidade de compartir as aulas cos máis de 250 estudantes doutros países que cada ano nos elixen para estudar connosco.
Todo isto co prestixio que supón formar parte dunha Universidade con proxección internacional, moderna e dinámica, con máis de cinco séculos de historia e situada nunha cidade universitaria cunha ampla oferta cultural e de ocio.
|
