Os estudos de Grao da Facultade de Filoloxía

A partir do curso 2009-2010 a Facultade de Filoloxía ofrece a posibilidade de cursar cinco títulos de Grao adaptados ao Espazo Europeo de Educación Superior:

• Grao en Filoloxía Clásica
• Grao en Lingua e Literatura Españolas
• Grao en Lingua e Literatura Galegas
• Grao en Lingua e Literatura Inglesas
• Grao en Linguas e Literaturas Modernas, con itinerarios en Alemán, Francés, Italiano, Portugués e Filoloxía Románica 

Todos estes títulos proporcionan unha competencia avanzada nunha ou en varias linguas e un coñecemento profundo das súas correspondentes literaturas e culturas e, ao tempo, pretenden formar persoas capaces de desenvolverse en contextos multiculturais e multilingües cos recursos necesarios para aplicar os seus coñecementos en distintas actividades profesionais:

• docencia de linguas e literaturas no ensino secundario
• ensino de linguas para falantes non nativos
• docencia en escolas de idiomas e centros de linguas modernas
• asesoría e corrección lingüística en industrias culturais, medios de comunicación e editoriais
• planificación lingüística
• mediación comunicativa
• tradución
• animación e dinamización cultural
• crítica literaria
• servizos turísticos, compañías aéreas
• centros de investigación lingüística e literaria

Estes cinco títulos de Grao comparten unha estrutura común formada polos seguintes elementos:

• Módulo de Formación Básica (60 ECTS). O seu obxectivo é proporcionar unha formación xeral en Lingüística e Teoría Literaria, así como unha formación inicial en tres das seguintes linguas: alemán, español, francés, galego, grego, inglés, italiano, latín e portugués.
• Maior (120 ECTS). Proporciona unha formación avanzada na disciplina nuclear da titulación.
• Módulo Complementario (24 ECTS). Fornece unha competencia básica, pero significativa, nunha segunda lingua e a súa literatura ou nunha disciplina transversal ou afín.
• Módulo Optativo (24 ECTS). Permite que o estudante acabe de perfilar a súa titulación de acordo cos seus propios intereses.
• Traballo de Fin de Grao (12 ECTS). Permite que o estudante demostre que posúe as competencias e os coñecementos adquiridos ao longo dos catro anos de estudo.

Dependendo das opcións escollidas para cursar os Módulos Complementario e Optativo, os estudantes poden perfilar o seu currículum e configuralo de acordo con tres modalidades diferentes: 

1. Modalidade Maior / Minor

Para acollerse a esta modalidade o estudante debe escoller o Módulo Optativo que continúa os estudos realizados no Módulo Complementario:

2. Modalidade Maior Plus

Para acollerse a esta modalidade débense escoller catro materias do Módulo Optativo que continúa os estudos realizados no Maior.

3. Modalidade Mixta

Para acollerse a esta modalidade débese escoller un Módulo Optativo correspondente a unha disciplina diferente das cursadas no Maior e no Módulo Complementario.