• A Facultade
• Equipo decanal
• Departamentos
• Asuntos Económicos
• Coordinadores de titulación
• Administración
• Estudos
• Grao
• Máster
• Licenciatura
• Calendario de exames
• Exames Recuperación Materias en Extinción
• Servizos / Recursos
• Calidade
• Accesibilidade
• Mapa da Web
• Contacto
• Correo web

Máster Interuniversitario en Edición

O Máster en Edición é un máster interuniversitario de carácter profesionalizante. Ofertado conxuntamente pola Universidades de Vigo e de Santiago de Compostela, está dirixido a todas aquelas persoas que desexen obter unha formación especializada no proceso xeral da edición, polo que se deseñou unha estrutura docente que permita un coñecemento amplo do ámbito da edición en todos os aspectos: históricos, técnicos, xurídicos e económico financeiros.

O máster ten como obxectivo proporcionar ao alumnado as ferramentas precisas para abordar unha especialización concreta nun sector que é ao mesmo tempo empresarial e cultural e que na actualidade ten que dar resposta a unha demanda de produtos que exceden o carácter de obxecto material, pois estamos na era do “libro virtual”. Pero ambos os tipos de libros requiren duns coidados atentos na súa produción, do cumprimento duns requisitos legais e tamén de orde estética, dunha coidadosa planificación e dun estudo de mercado que non poden ser improvisados. O sector editorial precisa de profesionais altamente cualificados, capaces de afrontar non só os retos da edición tradicional senón tamén, e sobre todo, os relacionados cos constantes avances das TIC. O cambio de mentalidade empresarial determina a variación nos parámetros polos que se rexían antes as casas editoriais; téndese á supresión de grandes stocks de volumes impresos a favor da edición, impresión e distribución a demanda; xa non é imprescindible que un libro se difunda en formato impreso. O coñecemento das TICs, con implicacións tamén no campo do deseño nas edicións, é absolutamente necesario, pero non o son menos certas nocións claras de xurisdición ou economía aplicadas a este ámbito específico.

Con estas premisas, elaborouse este Máster en Edición cuxos obxectivos fundamentais son:
a) proporcionar as ferramentas precisas para abordar unha especialización concreta nun sector que precisa de bos profesionais, capaces de afrontar os retos da edición tradicional e os que expón o uso das novas tecnoloxías.

b) proporcionar os coñecementos precisos sobre o funcionamento do mundo editorial, atendendo tanto á estrutura, funcionamento e organización dunha empresa do sector como a cada unha das tarefas e tipos de traballo que rodean a edición:

a. Aspectos económicos e xurídicos.

b. Proceso de preparación dun texto.

c. Deseño, produción e distribución do libro.

d. Tipos de coleccións presentes nun catálogo (incluíndo as publicacións periódicas e diferenciando elementos particulares como pode ser a edición de literatura infantil e xuvenil).
e. Aspectos relacionados coa edición dixital, co obxectivo de capacitar aos estudantes para traballar coas novas tecnoloxías aplicadas directamente a este sector

A estrutura docente do máster (60 ECTS, de carácter obrigatorio) é a seguinte:

A docencia do máster organízase en dous cuadrimestres. No primeiro deles impartiranse 4 materias (2 de 6 cr e 2 de 9) que suman 30 cr. No segundo cuadrimestre dispensaranse as outras tres materias (18 cr) e realizarase o TFM (6 créditos) e as prácticas (6 cr) co que se completan os 60 créditos totais. Todas as materias son de carácter presencial, aínda que profesores e alumnos poderán acordar outros modos de impartir parte da docencia asignada segundo os casos (videoconferencia, plataformas, etc). Os docentes encargados da impartición das materias son, por unha banda profesionais dos distintos ámbitos da edición que achegarán non só o coñecemento teórico, senón o coñecemento práctico que obtiveron logo de estar anos á fronte dunha editorial ou intervindo nunha das engrenaxes do proceso de produción dun libro e, por outro, docentes dunha das dúas universidades participantes que tratarán de aspectos concretos do ordenamento xurídico ou financeiro que calquera profesional do sector editorial ten que coñecer.

Para a realización das prácticas en empresa hai un convenio asinado coa Sociedade Xeral de Editores de Galicia de modo que estas están aseguradas. Os estudantes que cursen o máster a tempo parcial deberán matricularse no primeiro ano como mínimo de 30 créditos, correspondentes todos ás materias do máster. Os 6 créditos do Traballo de Fin de Máster (TFM) e as prácticas deberán cursarse necesariamente no segundo ano de matrícula.

 
As universidades de Vigo e Santiago irán rotando de modo que cada curso será impartido nunha das dúas. Esta primeira edición do curso 2009/10 impartirase integramente en Vigo, o 2010/11 en Santiago e así sucesivamente. A matrícula pode facerse indistintamente na Universidade de Santiago ou na Universidade de Vigo e ambas as dúas expiden o mesmo título.

Máis información na páxina web propia:

http://www.masteredicion.uvigo.es/

Coordinadores

Universidade de Vigo:

Xosé María Gómez Clemente
Departamento de Filoloxía Galega e Latina
Facultade de Filoloxía e Tradución
E-36310 Vigo
Tf.: 986812255

Xgomez@uvigo.es

Universidade de Santiago de Compostela:

Elvira Fidalgo

Facultade de Filoloxía

Departamento de Filoloxía Galega. Área de Filoloxía Románica

Avda. de Castelao s/n

Tf. 981 563 100, ext. 11825

Elvira.fidalgo@usc.es