PRESENTACIÓN

O "Congreso Galego de Investigación en Ciencias da Educación" nace das inquedanzas, desexos, motivacións e intereses dun grupo de alumnos de Posgrao da Facultade de Ciencias da Educación da Universidade de Santiago de Compostela.
A través deste evento quérese crear un espazo de formación e participación do alumnado de Posgrao, así como dos últimos anos dos diferentes Graos, de Ciencias da Educación. Deste xeito, o propósito é construír un espazo aberto para a promoción, intercambio e discusión de experiencias e investigacións desenvolvidas nas diferentes áreas de coñecemento do ámbito educativo.
Convidámosvos a sumarvos a esta iniciativa coas vosas achegas e traballos, dando cabida ao conxunto dos distintos campos de coñecemento e investigación das Ciencias da Educación. O Congreso queda, por tanto, aberto a calquera temática obxecto de estudo da nosa realidade socioeducativa, procurando así nutrir o encontro e enriquecer o acervo investigador e institucional das Ciencias da Educación.

OBXECTIVOS

A finalidade deste Congreso é a creación dun espazo aberto para a promoción, intercambio e discusión de experiencias, traballos e investigacións realizadas polo alumnado de Posgrao, dende os diferentes ámbitos das Ciencias da Educación.

Obxectivos específicos:

• Promover estudos e traballos de investigación nas diferentes áreas de coñecemento das Ciencias da Educación.

• Dar a coñecer as diferentes liñas de investigación que se están a desenvolver nas Facultades de Ciencias da Educación, en xeral, e nas Facultades galegas, en particular.

• Reflexionar sobre as necesidades formativas e de desenvolvemento profesional deste colectivo.

• Fomentar o coñecemento, a comunicación e a cooperación entre os investigadores das diferentes áreas das Ciencias da Educación.

• Reforzar o recoñecemento dos estudos e investigacións nas Ciencias da Educación como motor de desenvolvemento da sociedade actual cara á mellora da realidade educativa e social.

• Divulgar a oferta existente en canto aos recursos e posibilidades económicas de axuda e financiamento para a investigación.

DESTINATARIOS

O "Congreso Galego de Investigación en Ciencias da Educación" diríxese fundamentalmente ao alumnado de Posgrao (Másteres e Estudos de Doutoramento), así como ao alumnado dos últimos anos dos diferentes Graos de Ciencias da Educación.

CERTIFICACIÓN

Entregaráse un Diploma de Asistencia ao "II Congreso Galego de Investigación en Ciencias da Educación" por valor de 30 horas.
A todas aquelas persoas que presenten Comunicacións tamén se lles entregará o correspondende Diploma. Estes traballos serán publicados no CD de Actas do Congreso, que recibirán gratuitamente todos os asistentes.
Ademáis estamos a traballar para poder ofertar un crédito de libre configuración para tódolos Graos das Facultades de Ciencias da Educación das tres universidades galegas (pendente de confirmación).