Breve reseña histórica

A Facultade de Administración e Dirección de Empresas de Lugo créase a partir da unión da Escola Universitaria de Estudios Empresariais de Lugo e da Sección Delegada da Facultade de Ciencias Económicas e Empresariais no Campus de Lugo. Nesta Facultade impartense os estudios conducentes á obtención dos títulos de Diplomado en Ciencias Empresariais e Licenciado en Administración e Dirección de Empresas. Nesta presentación faise un repaso da evolución histórica destes centros ata a creación da nova Facultade.

No ano 1945 crease a Escola Pericial de Comercio de Lugo, co mecenazgo da Diputación Provincial de Lugo, onde se imparten os estudios conducentes á obtención do título de Perito Mercantil. Esta Escola tivo diversas ubicacións, situándose inicialmente no edificio do antiguo Casino de Lugo, posteriormente na rúa Quiroga Ballesteros, despois no edificio da Diputación Provincial e, na súa última etapa, na rúa Armando Durán.

Foto cedida por El Progreso

No curso 1977-78 empezan a impartirse os Estudios da Diplomatura en Ciencias Empresariais, e durante o curso posterior (1978-79) intégrase definitivamente a Escola Pericial de Comercio de Lugo na Universidade de Santiago de Compostela, creándose a Escola Universitaria de Estudios Empresariais de Lugo. Esta Escola ubicouse inicialmente no edificio da rúa Armando Durán, onde permaneceu ata o curso 1995-96, no que foi trasladada á súa ubicación actual, na Avda. Alfonso X o sabio, dentro xa do novo campus universitario lucense.

Os estudios da Sección de Ciencias Económicas inicianse en Santiago de Compostela no curso 1967-1968 na Facultade de Ciencias Políticas, Económicas e Comerciais. Esta Facultade, que non contaba cun edificio de seu, percorreu ó longo de case dez anos edificios coma o da antiga Facultade de Dereito, os barracóns do Burgo das Nacións, a Facultade de Farmacia e o edificio de Fonseca, ata chegar, en 1976, ó seu emprazamento actual. Tamén, ó longo destes anos, foi variando a súa denominación e acabou por converterse na Facultade de Ciencias Económicas e Empresariais de Santiago.

O ensino correspondente á Sección de Ciencias Empresariais comeza a ser impartido no ano 1974. Os estudios da Licenciatura de Economía así como os da Licenciatura de Administración e Dirección de Empresas apróbanse no ano 1993, comezándose a impartir o primeiro curso das devanditas licenciaturas no curso 1993-94.

Durante o curso 1995-96 comeza a impartirse o Segundo Ciclo da Licenciatura en Administración e Dirección de Empresas de Lugo, funcionando como Sección Delegada da Facultade de Ciencias Económicas e Empresariais de Santiago. Esta nova titulación impártese dende entón no mesmo edificio que a Diplomatura de Estudios Empresariais, rematando a primeira promoción no curso académico 1996-97.

Como consecuencia do Decreto 298/2001, do 15 de novembro, créase a Facultade de Administración e Dirección de Empresas no Campus de Lugo da Universidade de Santiago de Compostela pola unión da Escola Universitaria de Estudios Empresariais e a Sección Delegada da Facultade de Ciencias Económicas e Empresariais. Neste novo centro impartense as dúas titulacións xa existentes, a Diplomatura en Ciencias Empresariais e a Licenciatura en Administración e Dirección de Empresas.

O 18 de xaneiro de 2002 o Rectorado da Universidade de Santiago de Compostela resolve nomear Decano-Comisario da Facultade ó Profesor Doutor D. José A. Díez de Castro, que toma posesión do seu cargo o 28 de xaneiro, co gallo dos actos da festividade de Santo Tomás de Aquino.