Facultade de Xeografía e Historia
Dirección
Praza da Universidade, nº 1
15782
Santiago de Compostela
Web: http://www.usc.es/xeohistoria
Teléfono: 981559939
Fax: 981559941
Teléfono con extensión: 981563100-12582
Teléfono con extensión: 981563100-12589
Correo electrónico: zhisdeca@usc.es
Ir á Web propia
Benvida
A Facultade de Xeografía e Historia da Universidade de Santiago nace no ano 1974, a partir dunha antiga Facultade de Filosofía e Letras, na que nembargantes, o peso da licenciatura de Xeografía e Historia viña sendo fundamental, por se-la única subtitulación do título de licenciado en Filosofía e Letras que se impartía nela dende a súa fundación en 1922 ata ben entrados os anos sesenta.
Desde ese momento, a Facultade de Xeografía e Historia caracterizouse por impartir un único título: a licenciatura en Xeografía e Historia. Esta licenciatura posuía un primeiro ciclo de tres anos comuns, ó que seguía un segundo ciclo no que se podía elexir segui-la rama (ou Sección) de Historia, Xeografía ou Historia da Arte. A súa vez, en cada unha destas ramas, ó chegar a quinto curso, podíase elexir entre varias especialiades. Estas eran: en Historia, Prehistoria e Arqueoloxía, Historia Antiga, Historia Medieval, Historia Moderna, Historia Contemporánea e Arquivística e Biblioteconomía; en Historia da Arte, Historia da Arte Antiga e Medieval, Historia da Arte Moderna e Contemporánea e Museoloxía; e en Xeografía existía en cambio unha especialidade única en Xeografía Aplicada. A estas especialidades uníase outra de carácter transversal para as tres seccións da Facultade en Historia, Xeografía e Arte de Galicia.
Era, pois, unha titulación única, de carácter xeral e vinculada a un centro, que se mantivo ó longo dun dilatado período de tempo, sobrevivindo a distintos rexímes políticos: monarquia, república, dictadura franquista e democracia. Pero estes avatares políticos, que condicionaron enormente tanto á sociedade en xeral como á Universidade galega, non conseguiron altera-lo feito fundamental de que esa titulación encadrábase nun ámbito social e institucional uniforme no que podemos definir unha serie de invariantes: escaso número de estudiantes -ata finais dos anos sesenta- e unha vinculación case exclusiva da titulación coa futura preparación de docentes para o ensino medio, e, en menor medida, superior. Pois, aínda que o sistema de especialidades tentaba satisface-las demandas dun saber especializado que a mediados dos anos 70 eran cada vez más obvias, o conxunto do Plano de Estudios da Facultade seguía primando sobre todo a formación de carácter xeneral en temas de Historia, Xeografía e Arte, aceptando, ademais, que naquel momento as vías de colocación fundamentais dos alumnos que cursaban estes estudios era o ensino de bacharelato.
A renovación de planos de estudios, iniciada en 1993 e rematada no curso 1996-97, introduciu unha renovación profunda dos contidos en relación co antigo plano da Licenciatura en Xeografía e Historia, que tivo a súa primeira expresión na transformación en tres licenciaturas independentes entre si: Historia, Xeografía e Historia da Arte. A organización das materias en créditos, así como un deseño máis aberto do plano de estudios, que ofrecía ó alumno a posibilidade de escoller materias, foron características significativas da reforma. Durante a súa aplicación púxose de manifesto, sen embargo, a necesidade de introducir algunhas modificacións, tendentes a reorganiza-la carga lectiva e correxi-las deficiencias detectadas, en consonancia coas novas directrices do RD 779/1998 de 30 de abril, que regulaban unha nova definición do crédito académico así como unha organización máis eficaz das materias, limitando o número máximo de materias a cursar de xeito simultáneo.
Coa obrigada adaptación á nova normativa, pretendeuse tamén dar resposta ás aspiracións repetidamente expresadas en Xunta de Facultade en relación cos obxectivos e o perfil da titulación. Deste xeito, articúlanse opcións que ofrecen ós licenciados en Historia mellores condicións de inserción no mercado laboral. Por un lado, facilítase a preparación daqueles que desexen orientarse cara ó ensino secundario mediante a posibilidade de cursar contidos básicos das tres licenciaturas ó habilitar como optativas dunha das tres titulacións un determinado número de créditos das materias troncais das dúas restantes. Por outro, perséguese unha maior aproximación a un mercado laboral cambiante e en expansión mediante a introducción, e o recoñecemento no título, do itinerario curricular en Patrimonio Documental e Bibliográfico. As materias optativas agrúpanse ademais noutros itinerarios curriculares opcionais coherentes por área de coñecemento, con vistas á iniciación na investigación a través da incorporación posterior a un Programa de Terceiro Ciclo. Estes itinerarios concíbense, non como unha vía de especialización pechada e igual para todos e cada un dos estudiantes, senón como unha estructura flexible, na que cada estudiante decide cómo e en qué medida a recorre.
Finalmente, nos novos planos do 2000, recoñécese a proximidade de coñecementos e metodoloxías das titulacións da macroárea de Humanidades e propóñense cauces de comunicación entre planos de estudio afíns, que axeitadamente utilizados, facilitarán o acceso a unha doble titulación.
