Regulamento de Réxime Interno do Claustro Universitario

Aprobado polo Claustro Universitario o 23 de febreiro de 2006

Capitulo I - Normas Xerais de Organización do Claustro

Artigo 1

O Claustro Universitario, máximo órgano representativo da comunidade universitaria, réxese polos Estatutos, o presente Regulamento e os acordos que adopte no seu desenvolvemento.

Artigo 2 Composición

1. De acordo co artigo 76 dos Estatutos da Universidade de Santiago de Compostela, o Claustro Universitario está composto por:
   • O reitor ou a reitora, que o presidirá.
   • O secretario ou a secretaria xeral, que será tamén secretario/a do Claustro.
   • O xerente ou a xerente.
   • 300 representantes dos diversos sectores da comunidade universitaria, elixidos mediante sufraxio universal, libre, igual, directo e secreto, coa seguinte composición numérica dos sectores que se indican:
     • Sector I: 153 membros do profesorado funcionario doutor.
     • Sector II: 42 membros das restantes categorías de persoal docente e investigador.
     • Sector III: 9 investigadores ou investigadoras en formación e membros do estudantado de terceiro ciclo e posgrao.
     • Sector IV: 72 membros do estudantado de primeiro e segundo ciclos.
     • Sector V: 24 membros do persoal de administración e servizos.
2. O colexio electoral do sector II estará formado polas seguintes categorías: profesorado emérito, profesorado funcionario non doutor, profesorado contratado doutor, profesorado asociado, profesorado colaborador, axudantes doutores, axudantes e aqueloutras persoas contratadas pola Universidade de Santiago de Compostela mediante concurso público que realicen labores docentes ou investigadores e que cumpran os requisitos, entre outros os de permanencia, que estableza o Regulamento electoral xeral da Universidade.
3. O colexio electoral do sector III estará integrado por todo o estudantado de terceiro ciclo, así como polos investigadores en formación e perfeccionamento e o estudantado de cursos de posgrao, que cumpran as condicións que estipule o Regulamento electoral xeral da Universidade.

Artigo 3 Competencias

Son competencias do Claustro Universitario:

1. A elaboración dos estatutos, así como a súa reforma, modificación ou corrección.
2. A remoción do reitor, mediante a convocatoria de eleccións extraordinarias, de acordo co disposto no artigo 85º.4 dos Estatutos da USC.
3. A elección de membros do Consello de Goberno na súa representación, de entre os propios membros do sector representado.
4. A elaboración e aprobación do seu Regulamento de réxime interno, que deberá ser aprobado por maioría, contando polo menos co voto favorable dun terzo dos membros do Claustro.
5. A elección e, se é o caso, revogación do valedor da comunidade universitaria, a aprobación do seu Estatuto e o debate do seu informe anual.
6. A aprobación do Estatuto do estudantado.
7. A aprobación das liñas xerais do Regulamento electoral xeral, do Regulamento de persoal docente e investigador, do Regulamento de persoal de administración e servizos e dos estudos de posgrao.
8. A deliberación sobre o informe anual do reitor.
9. A aprobación das liñas xerais da programación plurianual e dos presupostos.
10. O coñecemento e debate da planificación estratéxica e das relacións de postos de traballo.
11. A expresión da opinión da comunidade universitaria e a formulación de recomendacións, propostas e declaracións institucionais, así como o debate dos asuntos que lle sexan formulados polo reitor ou polo Consello de Goberno.
12. A recepción de información acerca do funcionamento e obxectivos da Universidade, para o cal poderá solicitar a comparecencia dos titulares dos órganos de goberno e representación e dos membros da comunidade universitaria.
13. O control da xestión dos órganos de goberno da Universidade, mediante a formulación de preguntas e interpelacións.
14. A elección da comisión que valorará as reclamacións contra as propostas das comisións dos concursos de acceso á condición de funcionario, así como de contratados doutores ou colaboradores.
15. A aprobación da creación e, se é o caso, da supresión de novas figuras de persoal docente e investigador.
16. Establecer os criterios xerais que a Universidade de Santiago de Compostela deberá ter en conta para a creación, modificación e supresión de centros e departamentos e para a súa adscrición á Universidade.
17. As restantes competencias que lle atribúan os estatutos.

Artigo 4 Elección dos membros do Claustro

1. O Claustro Universitario será elixido cada catro anos ou cando, de acordo co artigo 77 dos Estatutos, se produza a súa disolución.
2. A representación dos sectores III e IV do apartado 2. d) do artigo 76 dos Estatutos renovarase cada dous anos.
3. O procedemento para a elección dos membros do Claustro será o establecido polos Estatutos e o Regulamento electoral xeral da USC.

Artigo 5 Perda da condición de claustral

1. Ademais de polas causas xerais previstas no Regulamento electoral xeral, a condición de membro do Claustro perderase polo incumprimento reiterado dos seus deberes como claustral, apreciado pola Mesa do Claustro.
2. A dimisión dos ou das claustrais deberá formalizarse por escrito dirixido á presidencia do Claustro.
3. No caso de perda da condición de claustral, as designacións de substitutos farase de acordo co disposto no Regulamento electoral xeral.

Capitulo II - Do Funcionamento do Claustro

Artigo 6 Pleno e comisións

1. O Claustro Universitario traballará en pleno, nas comisións ás que se refire o capítulo V deste Regulamento, ou naquelas outras comisións que decida constituír.
2. O pleno do Claustro Universitario debe reunirse con carácter ordinario, polo menos dúas veces ao ano durante o período de actividade docente, e con carácter extraordinario de acordo co que se dispón no presente Regulamento.

Artigo 7 Decisións

1. As decisións do Claustro adoptarán a forma de acordos en materias da súa competencia, e de mocións ou propostas nos restantes casos. Estas últimas non vinculan aos restantes órganos da Universidade no exercicio das súas competencias.
2. Os acordos do Claustro Universitario esgotan a vía administrativa e son impugnables directamente perante a xurisdición contencioso-administrativa.

Sección 1ª: Da Mesa

Artigo 8 Da Mesa provisoria

1. Despois da elección da totalidade dos membros do Claustro, na primeira sesión do pleno, formarase unha mesa provisoria integrada polo reitor, o secretario xeral e os membros de máis idade dos sectores do Claustro, coa mesma composición prevista para a Mesa no artigo 9
2. A Mesa Provisoria será a encargada de dirixir a elección da Mesa do Claustro.

Artigo 9 Composición da Mesa

1. O Claustro elixirá a Mesa de entre os seus membros, en votación por sectores de acordo co establecido no artigo 23 deste Regulamento. Será presidida polo reitor, que actuará como órgano moderador das súas sesións.
2. A Mesa do Claustro estará constituída polos seguintes membros:
   • O reitor da Universidade, que a preside.
   • O secretario xeral da Universidade, que o é tamén do Claustro.
   • Unha representación dos membros do Claustro coa seguinte composición:
     • 6 do sector I
     • 2 do sector II
     • 1 do sector III
     • 3 do sector IV
     • 1 do sector V
3. No caso de ausencia ou enfermidade do reitor ou da reitora, asumirá as súas funcións o vicerreitor ou a vicerreitora que designe.
4. A Mesa elixirá entre os seus membros a persoa que substituirá ao secretario xeral como secretario do Claustro, en caso de ausencia ou enfermidade.

Artigo 10 Funcións da Mesa

A Mesa terá por funcións:

1. Aprobar a orde do día das sesións.
2. Fixar as normas de desenvolvemento das sesións.
3. Recibir as propostas e cuestións de orde.
4. Interpretar o presente Regulamento de acordo co disposto nos Estatutos da Universidade de Santiago de Compostela e demais normas de aplicación.
5. Decidir sobre a alteración da orde de discusión dos puntos da orde do día.
6. Decidir a expulsión de membros do Claustro que alteren gravemente a orde de acordo co artigo 18 do presente regulamento.
7. Decidir, tras oír ao/á interesado/a, a perda da condición de claustral daqueles que incumpriran inxustificadamente as súas obrigas nos termos do artigo 5 deste Regulamento.

Artigo 11 Competencias da presidencia da Mesa

Son competencias da presidencia da Mesa do Claustro:

1. Convocar as sesións.
2. Moderar os debates tentando acadar o consenso.
3. Aplicar o Regulamento.
4. Velar polo mantemento da orde nas sesións.
5. Executar os acordos do Claustro

Artigo 12 Constitución e acordos da Mesa

Para a válida constitución da Mesa será necesaria a maioría absoluta dos seus membros. Con carácter xeral os acordos adoptaranse por maioría simple dos presentes. No caso de empate, o presidente ou a presidenta, ou quen faga as súas funcións, decidirá co seu voto de calidade.

Sección 2ª: Convocatoria, constitución e funcionamento do Claustro

Artigo 13 Das sesións do Claustro

1. O pleno do Claustro deberá reunirse con carácter ordinario cando menos dúas veces ao ano durante o período de actividade docente. As reunións de carácter ordinario deberán conter necesariamente;
   • Aprobación da acta da sesión anterior.
   • Informe do reitor.
   • Rogos e preguntas.
2. Ademais das reunións ordinarias o pleno do Claustro poderá reunirse con carácter extraordinario cando o decida o reitor por propia iniciativa, a solicitude do Consello de Goberno ou por un mínimo dun terzo dos claustrais. Os solicitantes deberán indicar o punto ou puntos que serán incluídos na orde do día da sesión.
3. As sesións do Claustro deben celebrarse en días administrativamente hábiles. Os claustros ordinarios non se celebrarán en datas de exames oficiais ordinarios. As reunións extraordinarias deberán celebrarse no prazo máximo de 1 mes dende a solicitude sen que se tomen en consideración os períodos non lectivos.

Artigo 14 D as convocatorias

1. A convocatoria do pleno do Claustro corresponde ao reitor. Para que a convocatoria produza efectos deberase poñer en coñecemento de todos os seus membros mediante unha notificación na que se fará constar a orde do día, e asemade, día, hora e lugar da reunión.
2. As notificacións serán entregadas polo menos con noventa e seis horas de anticipación. A entrega efectuarase no lugar onde cadaquén desenvolva o seu traballo, e, no caso dos estudantes de primeiro e segundo ciclos, no local asignado para os seus representantes nos distintos centros, ou no domicilio que conste no seu expediente durante o período vacacional. En caso de extraordinaria e urxente necesidade os prazos da convocatoria poden reducirse á metade.

Artigo 15 Orde do día

1. A orde do día será elaborada pola presidencia, e aprobada pola Mesa, debendo incorporar ademais aqueles puntos que sexan solicitados pola maioría dos membros presentes da Mesa ou que fosen previamente solicitados por escrito por, cando menos, un sexto dos membros do Claustro.
2. Serán nulos os acordos adoptados sobre asuntos que non figuren incluídos na orde do día, sen prexuízo do establecido na Lei de procedemento administrativo común.

Artigo 16 Asistencia ás sesións

1. Só teñen dereito de asistencia ás sesións do Claustro os seus membros, sen prexuízo do disposto neste artigo.
2. Os membros do Consello de Dirección que non sexan membros do Claustro Universitario poderán asistir ás reunións con voz pero sen voto.
3. Cando a natureza dos asuntos o requira, o reitor ou a Mesa do Claustro poderá convocar para que informe a calquera membro da comunidade universitaria.
4. A presidencia poderá autorizar a asistencia ás sesións do Claustro daquelas persoas que o solicitasen cun mínimo de antelación de vinte e catro horas, dándolles preferencia aos membros da comunidade universitaria. A correspondente credencial dará dereito a ocupar as prazas expresamente reservadas para invitados no lugar das sesións. Os invitados respectarán a orde das sesións e as instrucións da presidencia, e absteranse de calquera manifestación pública de opinións ou valoracións, sexa verbal ou doutro tipo.

Artigo 17 Quórum

1. O Claustro da Universidade constitúese validamente en primeira convocatoria coa asistencia da maioría absoluta dos seus membros e en segunda convocatoria, que terá lugar media hora máis tarde, cando asistan polo menos un terzo dos seus membros. De non conseguir o quórum sinalado na segunda convocatoria, haberá que proceder a unha nova convocatoria do Claustro para un día posterior.
2. Para que conste a asistencia será obrigatorio acreditarse do xeito que habilite o secretario do Claustro para tal efecto.
3. O secretario da Mesa constatará ao inicio da sesión o número de acreditados aos efectos de verificar o quórum.

Artigo 18 Do desenvolvemento dos debates

1. A presidencia dirixe os debates e vela polo mantemento da orde no desenvolvemento da sesión. De acordo coa Mesa, fixará un tempo de debate para cada tema e, en función dos pedimentos de palabra, determinará a duración de cada intervención.
2. No caso de que, a solicitude dun claustral, a Mesa considere que un tema non queda suficientemente debatido, establecerá unha nova quenda de debate.
3. A presidencia poderá retirar o uso da palabra, despois de dúas advertencias, nos seguintes casos:
   • Unha vez esgotado o tempo para intervir.
   • Despois de dúas chamadas a orde ou a cinguirse ao tema.
4. Ante unha alteración grave da orde na sesión, aquel membro responsable dela que fora apercibido por tres veces pola presidencia, poderá, co acordo da Mesa, ser privado de asistir ao resto da sesión.
5. As alusións só autorizarán para que o membro do Claustro a quen se refiren, segundo o xuízo da presidencia, poida contestar ás manifestacións pronunciadas sobre a súa persoa.
6. No suposto de excesiva duración do pleno, a presidencia, co acordo da Mesa, poderá dispoñer a interrupción da sesión fixando día e hora na que debe reiniciarse.

Artigo 19 Presentación de propostas e candidaturas

1. A presentación de mocións e propostas e a súa defensa nas sesións será regulada pola Mesa, que poderá requirir para seren admitidas un número mínimo de sinaturas non superior a dez.
2. As propostas e candidaturas que por acordo da Mesa deban presentarse por escrito antes das sesións entregaranse no Rexistro Xeral da Universidade (Lugo e Santiago de Compostela) antes das 14:00 horas da data na que remate o prazo de presentación, agás que a Mesa autorice outro xeito de presentación. Aos efectos do funcionamento do Claustro e dos seus procesos internos de eleccións e toma de acordos non se admitirán documentos que non cumpran os requisitos establecidos pola Mesa.

Artigo 20 Adopción de acordos e votación

1. Para a adopción válida de acordos deberán estar presentes polo menos un terzo dos membros do Claustro.
2. Os acordos adoptaranse por maioría simple, sen prexuízo do disposto expresamente polos Estatutos da Universidade ou neste Regulamento para determinados asuntos. Os acordos poderán considerarse adoptados por asentimento sen necesidade de votación cando, logo da proposta en tal sentido da presidencia do Claustro, non se manifeste ningunha opinión en contra.
3. Como regra xeral, as votacións no Claustro serán públicas polo procedemento e co sistema de reconto que estableza a Mesa. Serán secretas cando o decida a Mesa, afecten a persoas concretas, o soliciten a maioría dos presentes ou noutros supostos especiais previstos na normativa.
4. Non se admite a delegación de voto nin o voto anticipado para as votacións no Claustro.
5. Nos procesos electorais, resultarán elixidos os candidatos máis votados no ámbito da elección de acordo coas regras previstas no Regulamento electoral xeral. Non obstante, serán de aplicación as correccións oportunas cando se esixa expresamente a representación de campus, áreas de coñecemento ou outra condición. O procedemento de votación será o que aprobe a Mesa, que poderá acordar a acumulación de votacións.

Artigo 21 Actas das sesións e documentación.

1. O secretario do Claustro confeccionará a acta da sesión, que será depositada, xunto coa documentación precisa para o desenvolvemento da orde do día, na Secretaría Xeral da Universidade e adicionalmente deberá ser accesible para os membros do Claustro por medios electrónicos, desde o momento da convocatoria da sesión.
2. As obxeccións á acta deben presentarse na Secretaría Xeral da Universidade cunha antelación mínima de 24 horas ao inicio da sesión. No caso de non presentarse obxeccións á acta, considerarase aprobada polo Claustro por asentimento.

Capitulo III - Da Convocatoria Extraordinaria de Eleccións do Reitor

Artigo 22 Proposta e trámite

1. O Claustro poderá acordar a remoción do reitor mediante a convocatoria de eleccións extraordinarias, aprobada por dous terzos dos membros do Claustro.
2. A proposta deberá ser dirixida á presidencia do Claustro por escrito asinado por, cando menos, un terzo dos claustrais, e conterá as razóns que a fundamentan.
3. Se a proposta reúne os requisitos anteriores, o reitor convocará unha sesión extraordinaria con este único punto da orde do día, que deberá celebrarse entre os 15 e os 45 días dende a solicitude, sen que se tomen en consideración os períodos sen actividade docente.
4. O debate da proposta desenvolverase do xeito que acorde a Mesa do Claustro e nel terán dereito a intervir durante un mínimo de 30 minutos, un dos asinantes da proposta e o reitor, quen pechará as intervencións.
5. A votación da proposta será secreta.
6. Se a iniciativa non fose aprobada, ningún dos asinantes poderá participar na presentación doutra iniciativa deste carácter ata pasado un ano desde a votación da mesma.

Capitulo IV - Da Elección da Representación do Claustro en Comisións e órganos Estatutarios

Artigo 23 Normas xerais

1. A representación do Claustro na Mesa, comisións e órganos estatutarios estruturados nos sectores con presenza no Claustro será elixida polo sector correspondente. Para a convocatoria destas eleccións abondará coa súa inclusión como punto na orde do día da reunión do Claustro convocada segundo o disposto neste regulamento.
2. Cando na orde do día se contemple a elección de representantes do Claustro, habilitarase un prazo mínimo de 5 días de actividade académica para a presentación de candidaturas que poderán prever un suplente.
3. O sistema electoral será o maioritario simple de voto limitado por listas abertas de acordo co disposto no artigo 50 do Regulamento electoral xeral.
4. No caso de perda da condición de claustral ou dimisión dalgún membro elixido en representación do Claustro procederase do seguinte xeito:
   • Nomearase o suplente do membro que perdeu a condición, se o houbese.
   • De non existir suplente nomearase o candidato máis votado dos que non foran nomeados previamente.
   • De non darse ningunha das situacións anteriores procederase a unha nova votación.

Artigo 24 Representación no Consello de Goberno

A elección da representación do Claustro no Consello de Goberno farase de acordo co disposto no artigo 80 dos Estatutos e no Regulamento electoral xeral.

Artigo 25 Elección da Comisión Electoral Central

1. A Comisión Electoral Central será elixida polo Claustro entre os seus membros, por votación de cada sector, na primeira sesión tras a renovación completa do Claustro, e será renovada parcialmente cando corresponda, segundo o disposto no artigo 73.4 dos Estatutos e o artigo 8 do Regulamento electoral xeral da USC.
2. A votación será secreta co procedemento e modo de presentación de candidaturas que acorde a Mesa do Claustro. Esta disporá dos medios axeitados para procurar que polo menos tres membros do profesorado funcionario doutor teñan coñecementos xurídicos.

Artigo 26 Da Comisión de Normalización Lingüística

De conformidade co Plan de Normalización Lingüística da USC, o Claustro elixirá unha comisión de normalización lingüística da USC. Estará integrada por:

• O reitor ou persoa que designe que a presidirá
• O director técnico do Servizo de Normalización Lingüística, que actuará como secretario.
• Unha representación dos membros do Claustro coa mesma composición que a Mesa do Claustro.

Artigo 27 Da Comisión de Asesoramento e Axuda ao Valedor

De conformidade co art. 11 dos Estatutos da Universidade e o Estatuto do Valedor da Comunidade Universitaria, o Claustro elixirá unha comisión de asesoramento e axuda ao Valedor formada por membros da comunidade universitaria, coa composición e funcións que determine dito Estatuto, que en todo caso deberá reflectir a dualidade de campus da Universidade.

Artigo 28 Da elección da Comisión de Reclamacións

1. A Comisión de Reclamacións prevista polos artigos 66 da LOU e 22.5 dos Estatutos da USC será elixida polo Claustro por votación conxunta e secreta, co procedemento e modo de presentación de candidaturas que acorde a Mesa.
2. Serán elixidos membros da Comisión de Reclamacións sete catedráticos de universidade da USC, das cinco grandes áreas de coñecemento, non necesariamente membros do Claustro. A Comisión contará con un presidente e un secretario de acordo co disposto na normativa vixente.

Capitulo V - Das Comisions Delegadas do Claustro

Artigo 29 Comisións delegadas

Sen prexuízo das comisións específicas creadas polo Claustro, na forma que determine, para tratar temas concretos, crearanse as seguintes comisións estables do Claustro da Universidade:

• Comisión de Organización Docente.
• Comisión de Investigación.
• Comisión de Asuntos Económicos.
• Comisión de Actividades Culturais.

Artigo 30 Competencias das comisións

1. Son competencias das comisións estables: a emisión de propostas concordantes coa súa natureza, que deberán ser deliberadas polo órgano correspondente, así como a emisión de informes; a recepción de información por parte dos órganos unipersoais de goberno relacionados coa súa natureza e a formulación de acordos sobre aqueles asuntos expresamente delegados polo presente Regulamento.
2. No exercicio de competencias delegadas polo Claustro en virtude deste regulamento ou de acordos posteriores, as decisións das comisións terán o mesmo efecto que os acordos do pleno, e esgotan igualmente a vía administrativa. No exercicio das restantes competencias, as decisións das comisións serán sometidas ao pleno para o seu debate e ratificación, se procede.

Artigo 31 Elección de membros das comisións

1. Os membros das comisións estables serán elixidos polos correspondentes sectores do Claustro Universitario de entre os que figuran nunha lista única presentada pola Mesa do Claustro, para o cal é de aplicación o disposto no artigo 23 deste Regulamento.
2. Para a elección de profesores e estudantes, a candidatura deberá indicar a área así como o campus no que presta os seus servizos ou estuda o candidato. Para estes efectos considéranse áreas as seguintes: Ciencias Socias e Xurídicas, Humanidades, Ciencias Experimentais, Ciencias da Saúde e Tecnoloxías.

Artigo 32 Funcionamento

1. As comisións estables serán presididas polo reitor ou reitora ou o vicerreitor ou vicerreitora en quen delegue. Cada Comisión elixirá un secretario de entre os seus membros.
2. As sesións das comisións estables celebraranse en días administrativamente hábiles polo menos unha vez por trimestre académico. Serán convocadas polos respectivos presidentes coa antelación prevista para a convocatoria do Claustro. Os presidentes deberán igualmente convocar as sesións por iniciativa dun terzo dos seus membros.
3. As comisións estables entenderanse validamente constituídas pola metade máis un dos seus membros en primeira convocatoria, ou un terzo en segunda convocatoria, sempre que teñan representados polo menos dous sectores. Os seus acordos, informes e propostas serán adoptadas por maioría simple, sendo preciso que na votación exista o quórum antes referido, e serán trasladados á Mesa do Claustro, que, en todo caso, os fará chegar a todos os claustrais.

Artigo 33 Comisión de Organización Docente

1. A Comisión de Organización Docente estará integrada por:
   • O reitor ou vicerreitor no que delegue, que a presidirá
   • Unha representación dos membros do Claustro coa seguinte composición:
     • 9 do sector I;
     • 3 do sector II:
     • 1 do sector III;
     • 4 do sector IV;
     • 1 do sector V
2. A Comisión de Organización Docente asume por delegación do pleno do Claustro, a competencia de ratificar a concesión do grao de doutor honoris causa e máis o informe sobre os programas de estudos e as súas revisións, a que fai referencia o artigo 136.2 dos Estatutos.

Artigo 34 Comisión de Investigación

A Comisión de Investigación estará integrada por:

• O reitor ou vicerreitor no que delegue, que a presidirá.
• Unha representación dos membros do Claustro coa seguinte composición:
  • 9 do sector I;
  • 3 do sector II:
  • 2 do sector III;
  • 1 do sector IV;
  • 1 do sector V

Artigo 35 Comisión de Asuntos Económicos

1. A Comisión de Asuntos Económicos estará integrada por:
   • O reitor ou vicerreitor no que delegue, que a presidirá.
   • Unha representación dos membros do Claustro coa seguinte composición:
     • 9 do sector I;
     • 3 do sector II:
     • 1 do sector III;
     • 2 do sector IV;
     • 3 do sector V
2. A Comisión de Asuntos Económicos asumirá as funcións de control das contas da Universidade establecida no artigo 180.2 dos Estatutos.

Artigo 36 Comisión de Actividades Culturais

A Comisión de Actividades Culturais estará integrada por:

• O reitor ou vicerreitor no que delegue, que a presidirá.
• Unha representación dos membros do Claustro coa seguinte composición:
  • 6 do sector I;
  • 3 do sector II:
  • 1 do sector III;
  • 5 do sector IV;
  • 3 do sector V

Capitulo VI - Da Reforma dos Estatutos

Artigo 37

1. De conformidade co artigo 186 dos Estatutos da Universidade, o Claustro Universitario poderá aprobar a reforma dos Estatutos por maioría absoluta, a iniciativa do Consello de Goberno ou do vinte por cento dos membros do Claustro.
2. A solicitude de reforma será presentada ao reitor mediante certificación do acordo do Consello de Goberno expedida polo secretario xeral ou mediante escrito asinado polos membros do Claustro, e entregado no Rexistro Xeral da Universidade. A iniciativa deberá conter unha proposta concreta de reforma ou detallar os aspectos dos Estatutos que se propón modificar. Unha vez recibida a solicitude, o reitor daralle traslado á Mesa do Claustro, que decidirá a súa admisión se cumpre os requisitos e, no seu caso, convocará unha sesión do Claustro na que será debatida.
3. A Mesa do Claustro decidirá sobre o procedemento de discusión da proposta de reforma. En todo caso, establecerá un procedemento de redacción dun proxecto de reforma que será posto en coñecemento dos membros do Claustro coa apertura dun prazo mínimo de dez días hábiles para facer emendas, nas condicións que estableza a Mesa segundo o presente Regulamento. Na caso de que estivese constituída unha Comisión de Estatutos ou desenvolvemento estatutario, a Mesa encomendaralle a redacción do proxecto de reforma.

Capitulo VII - Da Reforma do Regulamento de Réxime Interno do Claustro

Artigo 38

1. A iniciativa para a reforma do Regulamento de réxime interno corresponde ao vinte por cento dos membros do Claustro, ou ben por acordo do propio Claustro.
2. As propostas deberán estar debidamente articuladas e motivadas, e serán dirixidas á Mesa do Claustro, que as comunicará aos claustrais e abrirá un prazo para a presentación de emendas, que deberán vir asinadas polo menos por 10 claustrais.
3. O debate da reforma do Regulamento terá lugar nunha sesión ordinaria ou extraordinaria do Claustro.
4. O novo texto, incorporando as modificacións, será remitido como texto refundido a todos os membros do Claustro.

Disposición adicional

A Mesa do Claustro articulará un procedemento para que se poidan utilizar os medios electrónicos para:

• Notificar as convocatorias das sesión.
• Presentar mocións, propostas, emendas e candidaturas.
• Acceder ás actas e á documentación correspondente aos puntos a tratar na orde do día.

Disposición transitoria

1. Mentres se manteña o fin que motivou a súa creación e non sexa modificado o acordo pola maioría do Claustro, continuarán vixentes, e serán renovadas cando corresponda, a Comisión de Estatutos encargada polo Claustro o 18 de decembro de 2003 para elaborar as propostas de desenvolvemento estatutario competencia do Claustro, que recibirá a denominación de “Comisión de Desenvolvemento Estatutario”; así como a Comisión de Titulacións e Programas de Estudos creada polo Claustro o 1 de xuño de 2005.
2. En tanto non se modifique a composición acordada polo Claustro o 11 de xullo de 2002, a Comisión de Desenvolvemento Estatutario estará formada por corenta membros distribuídos do seguinte xeito: vinte profesores/as funcionarios/as doutores, un membro do profesorado funcionario non doutor, catro membros do persoal docente e investigador contratado a tempo completo, un membro do persoal docente e investigador contratado a tempo parcial, nove estudantes do primeiro e segundo ciclos, dous estudantes do terceiro ciclo e tres membros do persoal de administración e servizos.
3. En tanto non se modifique a composición acordada polo Claustro o 1 de xullo de 2005, a Comisión de Titulacións e Programas de Estudos estará formada por trinta membros distribuídos do seguinte xeito:
   • quince membros do profesorado funcionario doutor: tres de cada gran área e como mínimo un de cada gran área por cada un dos dous Campus;
   • catro membros das restantes categorías de persoal docente e investigador;
   • tres investigadores en formación e estudantes de terceiro ciclo e posgrao;
   • seis estudantes de primeiro e segundo ciclo; e
   • dous membros do persoal de administración e servizos.

Disposición derrogatoria

Á entrada en vigor deste Regulamento quedará derrogado o Regulamento aprobado o doce de decembro de 1998.

Disposición derradeira

O presente Regulamento entrará en vigor ao día seguinte da súa aprobación polo pleno do Claustro.