Prácticas en empresas e institucións

Normativa

A realización de prácticas regúlase pola Normativa de prácticas externas en empresas e institucións, aprobada polo Consello de Goberno da USC o 30 de maio do 2008.

Requisitos

Estudantes

• Estar matriculado/a nunha licenciatura ou diplomatura da USC (agás que os únicos créditos que lle resten para obter o título sexan os de libre configuración curricular; neste caso só hai que matricularse da práctica cando o Consello Social expida a correspondente autorización);
• Ter superado o 50% dos créditos da titulación;
• Non ter cuberto o número máximo de créditos para prácticas en empresas/entidades ou de libre configuración curricular;
• Non ter rematados os estudos e realizado o depósito do título.

Empresas e institucións

• Estar legalmente constituídas e ó corrente dos pagamentos fiscais.
• Ter asinado un convenio de colaboración coa Universidade de Santiago de Compostela para ter estudantes en prácticas. Hai dúas opcións:
  a. Firmar un convenio propio coa USC. Teñen a obriga de facelo: 
      - as entidades con domicilio fiscal fóra de Galicia;
      - as fundacións, asociacións, sindicatos e entidades sen ánimo de lucro;
      - as entidades que así o desexen.

              proposta de convenio 2012
              borrador de convenio 

b. Acollerse a algún dos convenios marco xa asinados pola USC:
    -Convenio coa Confederación de Empresarios de Galicia ( Convenio CEG): para empresas con domicilio fiscal na Comunidade Autónoma de Galicia;
    -Convenio coa Xunta de Galicia ( Convenio Xunta): para os órganos, dependencias ou organismos autónomos integrados dentro da administración da Xunta de Galicia;
    -Convenio coa Federación Galega de Municipios e Provincias ( Convenio FEGAMP):  para os concellos, deputacións (e entes dependentes) da Comunidade Autónoma de Galicia;
    - Convenio co Colexio Nacional de Ópticos-Optometristas- 6ª delegación ( Convenio Colexio Opticos): para as ópticas galegas;
    - Encomenda de xestión ao Consello Social das prácticas que se ofertan na USC ( Convenio USC): para os centros e servizos da USC.

Obrigas

Estudantes

• Matricularse da práctica antes da data prevista para comezar a actividade. O trámite realízase na UXA coa autorización que o Consello Social remite por correo postal.
• Cumprir o calendario e horario fixados (en ningún caso pode comezarse a práctica sen a autorización previa do Consello Social ou nunha data anterior á autorizada). 
• Seguir as instrucións do/a titor/a.
• Comunicar ao Consello Social calquera incidencia que afecte ao normal desenvolvemento da práctica e, de ser o caso, notificar a renuncia.
• Entregar en tempo e forma a documentación final que acredite que se realizou a actividade (certificado titorial e, se procede, memoria).
• Realizar o número total de créditos dos que se formalizou a matrícula. De non ser así, a cualificación será "non apto".

Empresas e institucións

• Non cubrir ningún posto de traballo co alumnado nin formalizar ningunha relación laboral, estatutaria ou contractual mentres estea a desenvolverse a práctica.
• Designar un/unha titor/a dentro do seu cadro de persoal, que supervisará a actividade formativa e, ao seu remate, expedirá unha certificación que acredite as tarefas realizadas, as datas e horas totais invertidas.
• As entidades non están obrigadas a retribuír o alumnado.

Durante a estadía en prácticas o estudantado menor de 28 anos está cuberto polo seguro escolar que aboa ao matricularse na USC; se supera esa idade, o Consello Social xestiónalle unha póliza privada de seguro.

Realización

• As prácticas poden realizarse en calquera momento do ano, dentro do horario laboral da entidade colaboradora.
• En ningún caso poden exceder as 8 horas diarias nin as 40 semanais.
• A súa duración oscilará entre as 120 e as 500 horas. A equivalencia académica establécese en 1 crédito por cada 30 horas.
• Non se autorizará a prórroga de ningunha práctica, agás casos moi xustificados de forza maior.

Modalidades de prácticas 

• Procedemento ordinario
• Adxudicación directa