EEES nas aulas
Para acadar un sistema comparable de titulacións, cunha mesma valoración da carga lectiva e unha estrutura de cursos entendibles por todos os estados é necesario integrar na cultura das aulas novas formas de entender e desenvolver os procesos de ensino e aprendizaxe:
Outras formas de entender a aprendizaxe:
Unha concepción da aprendizaxe que debe perseguir: a participación activa do alumno no seu propio proceso de aprendizaxe; e ir dotando de autonomía ao alumno no trazado e desenvolvemento da súa formación.
A reconsideración da aprendizaxe dos alumnos como verdadeiros protagonistas da súa aprendizaxe é o núcleo central de toda a reconsideración do ensino na universidade. Esta conceptualización da aprendizaxe require dunha nova actitude de profesores e alumnos e unha maior responsabilidade dos alumnos sobre a organización do seu estudo.
A aprendizaxe autónoma require dun intenso sistema de titorías; e paralelamente require do alumnado unha preparación en técnicas de traballo e o uso intensivo de ferramentas de aprendizaxe como as Tecnoloxías da Información e a Comunicación.
Outras formas de considerar a docencia:
- ECTS: unidade de organización da actividade académica
Os créditos ECTS supoñen unha transformación da organización básica da docencia. Os ECTS son unha unidade de valoración da actividade académica que supón o volume total do traballo do estudante. Un crédito integra as horas de clases teóricas e prácticas, o tempo de estudo individual, as titorías e os seminarios. - Competencias: os obxectivos da aprendizaxe
As competencias neste contexto implican unha nova forma de definir os obxectivos que se perseguen para a formación dos alumnos. Son funcións que os estudantes haberán de ser capaces de desenvolver para xestionar problemas relevantes no ámbito da súa futura profesión. - Flexibilidade metodolóxica
Os novos sistemas de referencia para a planificación da docencia (ECTS e obxectivos por competencias) supoñen reconsiderar as formas de ensinanza, introducindo outras metodoloxías didácticas e diversidade de materiais e recursos para o ensino.