Aprender galego

O galego é unha lingua románica, polo que se xa sabes algunha outra (sobre todo castelán, catalán, italiano, portugués...) terás moito camiño andado: axiña, se pos ben o oído, serás quen de entender perfectamente o fundamental. En caso de dúbidas, pregúntalle sen medo ao teu interlocutor, que seguro che axudará amablemente. Son moitos os estudantes de fóra de Galicia que levan pasado pola USC sen que se producisen problemas a este respecto.

O galego pode ser a chave que che abra as portas de calquera outra das linguas románicas. Galicia dáche a oportunidade de aprender asemade o castelán e o galego, e esta última, ademais, pode introducirte no portugués debido á súa similitude, pois son linguas irmás que comparten a orixe: ata ben entrada a Idade Media resultaba imposible distinguilas. O portugués fálase en Portugal, Brasil, Angola, Cabo Verde...: é a oitava lingua máis falada do mundo. Como ves, co galego podes achegarte a países e persoas que nin pensaras.

Podes afacerte a el antes de vires a Galicia:

• Escoita a Radio Galega en Internet
• Mira a Televisión de Galicia vía satélite ou en Internet
• Le prensa dixital en galego, como o portal Vieiros
• Infórmate sobre cursos de galego que se impartan no teu país
• Sigue un curso virtual de galego
• Le literatura universal en galego en Bivir
• Coñece a literatura galega a través da Biblioteca Virtual Galega
• Consulta as características lingüísticas do galego
• Aprende máis sobre o galego e consulta un vocabulario galego-inglés-español

Unha vez aquí, a USC proponche:

• Por se te achegas ao noso país antes de que comece o curso, Cursos de lingua e cultura galega no verán, organizados polo Instituto da Lingua Galega da USC.
• A principio de cada cuadrimestre, convócanse os Cursos de galego para non galego falantes, organizados polo Servizo de Normalización Lingüística da USC.

Aínda tes dúbidas? Consúltaas no Servizo de Normalización Lingüística da USC.