Manual de Imaxe Corporativa e Identidade Visual

Para referenciar esta páxina empregue o enderezo: http://www.usc.es/imaxeusc

No Consello de Goberno de 21 de decembro de 2005 aprobouse a modificación do Manual de Imaxe Corporativa e Identidade Visual da USC.

Manual de Imaxe Corporativa e Identidade Visual [pdf - 2606Kb][Modificado: 02/04/2007]

Unha nova estratexia de comunicación

O presente Manual de Imaxe Corporativa e Identidade Visual é un elemento de fortalecemento e mellora da identidade corporativa e dos valores diferenciais da Universidade de Santiago de Compostela.

A USC modifica a súa imaxe corporativa para mellorar a súa percepción pública e proxectar no seu contorno os trazos de excelencia e de distinción propios da institución.

Os atributos actualizados da USC concrétanse nunha nova proposta de identidade.

Marca USC

A marca USC é a imaxe global que a USC proxecta cara á sociedade.

A marca USC é un concepto amplo que se pretende que sexa asociado a todas as ideas, opinións, percepcións, xuízos e valores que o público en xeral ten sobre a institución.

A marca USC identifica a personalidade da Universidade ante o público en xeral e ante os propios membros da comunidade universitaria: estudantes, persoal docente e investigador, e persoal de administración e servizos.

Xestionar a marca USC é xestionar a imaxe que a sociedade ten da Universidade de Santiago de Compostela.

Valores de marca

Os valores de marca deben cumprir dúas condicións:

• Serán conceptos sempre en positivo (modernidade, proxección de futuro, etc.).
• Deben ser asumidos e compartidos por toda a comunidade universitaria.

A USC ten pola súa historia, e tamén pola súa realidade actual e a súa planificación do futuro (a curto e medio prazo), uns valores que a caracterizan, como son:

• Tradición e experiencia;
• Modernidade e proxección cara ao futuro (investimentos, novos equipamentos, novas áreas de docencia e investigación...);
• Universidade completa: ciencias, humanidades e tecnoloxías;
• Universidade de Galicia, con campus en Compostela -a capital de Galicia- e na milenaria Lugo;
• Vocación e proxección universais;
• Compromiso coa docencia;
• Calidade na docencia, a investigación e os servizos;
• Equipos de investigación en conexión coa vangarda da investigación, o desenvolvemento e a innovación;
• Conexión co mundo da empresa, a investigación aplicada e o desenvolvemento tecnolóxico;
• Compromiso co deporte e a cultura;
• Universidade ao servizo da sociedade;
• Universidade comprometida socialmente;
• Universidade da sociedade do coñecemento;
• Universidade emprendedora.

Elementos da nova identidade

Neste Manual de Imaxe Corporativa desenvólvense dous pasos fundamentais na configuración dunha nova estratexia de comunicación da USC:

• Institucionalización dun logotipo que representa os valores de marca e as siglas USC;
• Creación dun novo estilo visual definido e aplicado sobre diversos soportes.

Trátase en definitiva de modernizar a identidade visual da USC adaptándoa aos obxectivos estratéxicos da Universidade.