Logotipo

Elementos e funcións do logotipo

O logotipo da Universidade de Santiago de Compostela está formado por dous elementos complementarios:

1. USC, siglas que ao longo dos anos veñen facendo referencia á nosa Universidade, e que no momento actual parece necesario patrimonializar e incorporar como elemento identificador;
2. O sigillum, imaxe histórica da Universidade, que representa a forza dunha tradición sempre viva (elemento unicamente presente na versión do logotipo para alta representación).

O logotipo ten tres funcións básicas:

1. O logotipo implica pertenza. É un símbolo asumido pola comunidade universitaria.
2. O logotipo facilita o recoñecemento. Está presente aí onde a USC está presente, en todos os soportes, en todos os momentos.
3. O logotipo imprime carácter. É unha marca de identidade e individualidade nun mundo plural e global.

Principios de configuración

Os principios de configuración do logotipo son os seguintes:

• Continuidade. O logotipo supón unha fusión lóxica entre o pasado e o futuro. Non segue unha lóxica rupturista que podería crear rexeitamento.
• Evolución. O logotipo dá personalidade gráfica e incorpora as siglas USC, que viñan usándose sen unha configuración particular.
• Convivencia. O logotipo, no caso de alta representación, xorde da convivencia entre o sigillum e as siglas USC, facéndoo con equilibrio e coherencia.
• Modernidade. O logotipo supón un enfoque contemporáneo do problema da identidade. Sintetiza nunhas siglas recoñecibles o nome da nosa Universidade.
• Sobriedade. O logotipo baséase sobre todo na utilización da imaxe clásica do sigillum, a incorporación dunha tipografía, o uso dunha forma harmónica básica como son os cadrados e a utilización dun repertorio cromático elegante.

Siglas en cor

Os tres elementos básicos das siglas da Universidade de Santiago de Compostela son: as siglas USC, o cadrado azul e o nome completo da institución.

As letras SC están inscritas en negativo nun cadrado azul escuro ou negro (en función da reprodución da cor que vaia empregarse). Estas letras son o elemento máis importante do logotipo posto que significan ao mesmo tempo Santiago de Compostela e Sociedade do Coñecemento.

A letra U sitúase fóra do cadrado proporcionando movemento e asimetría ao conxunto.

Dentro do cadrado azul (ou negro na versión en escala de grises), composto en negativo, sitúase en tres liñas a identificación verbal institucional (o nome completo) da Universidade de Santiago de Compostela.

Siglas en cor. Especificacións de construción

Especifícanse aquí as relacións de proporción e tamaño entre os distintos elementos das siglas da USC.

Estas pautas de construción son aplicables tamén á versión en negro das siglas.

Siglas en cor. Elementos gráficos

SC: Santiago de Compostela e Sociedade do Coñecemento

• A forza tipográfica do S e do C é unha aposta decidida pola vinculación entre a Universidade e a cidade.
• SC é Santiago de Compostela, pero tamén Sociedade do Coñecemento.
• A colocación dos elementos dentro do cadrado aseméllase á disposición da información nun cadro da táboa periódica dos elementos.
• SC é abreviatura de "Science".

A tipografía do logotipo

As siglas USC, compostas na tipografía "Utopia" (que tamén é un valor para a USC), intentan recoller, no seu deseño tipográfico, as ideas forza da marca.

Trátase dunha tipografía con remate pero de vocación contemporánea, equilibrada e de xenerosos brancos.

A súa rotundidade e o seu peso institucional poténciase coa utilización dun bordo para as letras que as dota de maior peso específico. Orixinal e con personalidade propia, o repertorio tipográfico é sobrio, institucional e perenne.

Identificación verbal institucional

O nome completo da institución componse en tipografía "Lucida", unha familia de letras con remates rotundos, ideada para o seu emprego con excelentes resultados en tamaños pequenos e en pantalla.

Esta tipografía, pola súa variedade, o seu compromiso entre modernidade e vangarda, e a súa calidade e personalidade, convértese na tipografía base da Universidade de Santiago de Compostela.

O cadrado azul e as cores corporativas

O elemento gráfico máis importante das siglas é un cadrado azul que representa o espazo simbólico que é a Universidade de Santiago de Compostela. Ese cadrado azul é unha metáfora da Universidade como institución. A "idea forza" que se transmite é que dentro dese cadrado é onde vive o coñecemento.

O cadrado azul é ao mesmo tempo o elemento que crea a continuidade entre as siglas e o sigillum.

As cores das siglas da USC son o azul Pantone ^© 280 e o branco. O azul escuro substituirase por negro para usos en branco e negro.

A cor azul é un elemento de continuidade entre a identidade visual do sigillum e a das siglas.

O azul Pantone ^© 280 empregarase como cor distintiva da Universidade de Santiago de Compostela.

Siglas e sigillum en cor

Para empregos institucionais e en contextos de alta representación, o sigillum acompañará as siglas do xeito indicado.

O sigillum inscríbese nun cadrado azul de igual tamaño que o cadrado azul das siglas, separados por unha canle de cor branca como se indica nas especificacións de construción.

Siglas e sigillum en cor. Especificacións de construción

Especifícanse aquí as relacións de proporción e tamaño entre os distintos elementos das siglas cando estas van acompañadas do sigillum.

Estas pautas de construción son aplicables tamén á versión en negro do logotipo.

Siglas en branco e negro

Para reproducións en branco e negro, o logotipo comporase substituíndo o azul Pantone ^© 280 por negro 100%.

Siglas e sigillum en branco e negro

Para impresións en branco e negro, as siglas con sigillum comporanse substituíndo o azul Pantone^© 280 por negro 100%