Inicio » Información xeral » Manual de Imaxe Corporativa e Identidade Visual » Usos xerais. Outras aplicacións

Usos xerais. Outras aplicacións

Os seguintes exemplos contemplan a posibilidade de integración de segundos logotipos na papelaría institucional de usos xerais tanto de unidades estruturais pertencentes á USC como de entidades externas que colaboran con ela. En todos os casos estas aplicacións deben contar coa autorización do reitor ou, no seu caso, de quen teña delegadas as competencias en materia de comunicación.

Unidades internas á USC

Na utilización de segundos logotipos por unidades estruturais pertencentes á USC deberán respectarse as medidas e orde de elementos da papelaría de usos xerais da USC. O segundo logotipo deberá situarse no espazo superior dereito (no cartón de visita e no papel de carta) ou no inferior esquerdo (nos sobres). As súas dimensións máximas veñen marcadas en altura polo propio logotipo da USC e no ancho pola distancia de respecto que debe manterse co cadrado azul da USC. O segundo elemento de identidade irá centrado con respecto ao logotipo da USC (no cartón de visita e no papel de carta) ou aliñado á esquerda (no sobre), e a súa colocación nunca xustificará o desprazamento do da USC.

Entidades externas á USC

A utilización de logotipos de entidades externas á Universidade na papelaría da USC deberá estar xustificada e autorizada. En calquera caso non desvirtuará a papelaría institucional de usos xerais da USC (cores, dimensións e tipografías). Nestas aplicacións os logotipos de entidades externas á USC colocaranse debaixo do da USC (no sobre e no papel de carta) ou ao lado (no cartón de visita), mantendo sempre a distancia de respecto.

Utilización doutros elementos de identidade

O reitor ou, no seu caso, quen teña delegadas as competencias en materia de comunicación, poderá autorizar a utilización na papelaría institucional e material impreso da USC doutros elementos de identidade, tales como identificadores de certificacións de calidade ou de campañas específicas, establecendo a colocación apropiada segundo o caso.