TIC

A aplicación das novas tecnoloxías da información e a comunicación resulta esencial para que o noso persoal desempeñe as súas funcións con eficiencia e eficacia. Na USC ofrecemos ao PDI e o PAS a posibilidade de empregar numerosos servizos e aplicacións a través dos que se facilita a realización do seu traballo e a xestión de trámites diversos relacionados coa institución. Destacamos algúns integrados baixo a chamada USC Virtual:

• Secretaría Virtual para docentes: facilita a xestión académica do PDI (consultar os listaxes de alumnos, cobertura e firma de actas, reserva de aulas para docencia, comunicación de horarios de titorías, consulta personalizada de horarios e encargo docente anual, introdución/modificación dos programas das materias) e a tramitación de diversos procedementos (matrícula no PFID, o CLM e os cursos de verán e consulta da oferta, solicitude de certificados, consulta da avaliación da calidade docente).
• Campus Virtual: constitúe un entorno de apoio á docencia que facilita a comunicación entre o profesor e o estudante, a organización dos contidos das materias, o encargo e recepción de tarefas e traballos, etc. Tamén é un instrumento ao servizo do persoal que se matricula nalgún dos cursos ou titulacións que se imparten na USC.
• Portal do Empregado: a través do que se da acceso á consulta de nóminas, certificados de retencións.
• OIT Virtual: facilita ao PDI a xestión on-line de diversos trámites relacionados coa investigación (solicitude das Axudas Propias da USC, actualización do Catálogo de Investigadores e Grupos de Investigación, consulta do estado económico das actividades de I+D, etc.).
• Bibliotecas: o persoal pode realizar buscas on-line no catálogo e consultar unha ampla oferta de recursos electrónicos (bases de datos, revistas e libros electrónicos, etc.).

Para o uso de moitas destas aplicacións está a ser esencial a implantación da acreditación da identidade mediante sinatura electrónica. A primeira das aplicacións implantadas na USC foi a relativa á sinatura das actas académicas, e estase a introducir na presentación vía telemática de documentos no rexistro, no correo electrónico de especial importancia, en solicitudes de diversa índole e en calquera outra aplicación onde sexa posible substituír a presentación en papel dun documento polo seu envío asinado con certificado dixital.

O persoal da USC conta tamén con acceso a outras ferramentas e utilidades como son o correo electrónico, o acceso a internet, as listas de distribución ou a tarxeta universitaria. Destaca a posta a disposición dos membros da comunidade universitaria de servizos multimedia demandados no ámbito da docencia, a investigación e a difusión e proxección exterior da USC: salas de videoconferencia, salas de tecnoloxía AccessGrid, e servizo de reunións virtuais vía web (Adobe Connect). No ámbito do Programa de Accións Formativas para o PAS estase a empregar o servizo Training Channel que permite impartir teleformación presencial.

Finalmente, o persoal da USC pode empregar baixo as licencias adquiridas pola USC software xeral ou específico necesario para o seu traballo. Ademais, a través da Oficina de Software Libre a USC está a impulsar o emprego de aplicacións e licenzas libres, recursos de información libre e a xeración de contido libre dentro da propia USC.