Xestión enerxética

No eido da xestión enerxética, a USC ten coma obxectivo principal a xestión respectuosa co medio ambiente e optimizada dos sistemas de control e subministro enerxético da institución mediante a aplicación de novas tecnoloxías de telesupervisión e telexestión. Ademais, optouse polo emprego da coxeración como sistema alternativo, pola súa alta eficiencia enerxética, tanto reducindo os custes coma reducindo a emisión de gases contaminantes. O sistema de coxeración está formado por 7 plantas de coxeración no campus de Santiago, onde están instalados un total de 11 motores que empregan gas natural para a produción simultánea de enerxía eléctrica e térmica.

• Datos do sistema de coxeración da USC [xls - 287 kb]

A USC consume enerxía en forma de electricidade, e de gasóleo e gas natural para caldeiras, combustibles que complementan a enerxía calorífica xerada polo sistema de coxeración (que produce electricidade e enerxía calorífica para auga quente sanitaria e calefacción). A aportación da enerxía eléctrica por parte do sistema de coxeración permite reducir o aporte externo de electricidade, co conseguinte beneficio económico e ambiental. Ademais, o sistema de coxeración produce enerxía calorífica, permitindo minimizar o gasto de combustibles nas caldeiras. O gasto de gas natural está asociado tanto á alimentación das caldeiras que empregan este tipo de combustible coma á dos motores de coxeración.

• Datos de consumo eléctrico (kWh) [xls - 287 kb]
• Datos de consumo de gasóleo e gas natural [xls - 287 kb]
• Distribución modal da enerxía consumida [xls - 287 kb]

O consumo de gas natural imponse sobre o resto de recursos empregados na USC con fins enerxéticos. Isto é debido principalmente a dúas causas: a substitución de caldeiras de gasóleo por novas caldeiras de gas natural (debido ao menor impacto ambiental deste combustible) e ao funcionamento dos motores de coxeración.

O consumo enerxético leva asociado unhas emisións de gases de efecto invernadoiro (GEI). Para estimalas empréganse factores de emisión proporcionados polo INEGA[1] e o IPCC[2].

• Emisións de GEI asociadas ao consumo enerxético* [xls - 287 kb]
•  Distribución modal das emisións de GEI asociadas ao consumo enerxético [xls - 287 kb]

Coa campaña “O teu xesto conta”, a ODS tenta implicar a toda a comunidade universitaria na redución do consumo enerxético.

[1] Instituto Enerxético de Galicia, Balance enerxético de Galicia 2007, 2008, 2009 e 2010.

[2] Intergovernmental Panel on Climate Change; Guidelines for National Greenhouse Gas Inventories. 2006.