Saltar ao contido principal
Inicio  »  Normativa  »  Organización docente  »  Normativa para a Organización Docente de 1º e 2º Ciclo
NORMATIVA PARA A ORGANIZACIÓN DOCENTE DE 1º e 2º CICLO
(Xunta de Goberno do 31-outubro-1996)
1. A PLANIFICACIÓN ACADÉMICA ANUAL (P.A.A) de 1º e 2º ciclo está constituída por:
  1. O Plano Docente Anual (P.D.A) de cada titulación que debe especificar:
    1. A distribución dos créditos de cada materia diferenciando os de teoría e os de prácticas e, dentro destes, o tipo de docencia (encerado, laboratorio, etc.)
    2. O número de grupos para a impartición de cada materia.
    3. A relación de materias optativas que se ofertan.
    4. A área ou áreas encargadas da docencia de cada materia.
    5. O cuadrimestre ou período no que se impartirá a docencia.
  2. O Plano de Organización Docente (P.O.D.) de cada departamento que debe especifica-lo profesorado de cada materia indicando para cada profesor o tipo de docencia e grupo.
  3. Os horarios de docencia tanto de teoría como de prácticas.
  4. O calendario de exames.
  5. A dedicación do profesorado.
  6. A programación docente de cada materia.
2. ÓRGANOS RESPONSABLES DA P.A.A.
A Planificación Académica Anual será o resultado do esforzo dos distintos órganos que interveñen na súa elaboración:
  1. O Vicerrectorado de Organización Académica e Titulacións (V.O.A.T.) e o Vicerrectorado de Profesorado serán os encargados de dicta-las instruccións necesarias para a elaboración do P.D.A e P.O.D. e para a dedicación dos profesores.
  2. Os Decanos/Directores dos centros serán os encargados de levar a termo as xestións necesarias para a elaboración de horarios e calendario de exames.
  3. Os directores dos departamentos, en colaboración cos directores/decanos dos centros, serán os responsables de supervisa-la programación de cada materia.
  4. Non se poderá modificar ningunha das partes que compoñen a Planificación Académica Anual sen a autorización da dirección do órgano encargado da súa aprobación definitiva.
3. COMPETENCIAS DOS CENTROS
Serán competencias dos centros:
  1. A distribución da carga docente de acordo coas disposicións legais que determinan os Planos de Estudios das Titulacións, diferenciando, no caso dos créditos de prácticas, cáles son de encerado, laboratorio, campo, etc.
  2. A distribución de aulas, laboratorios docentes e demais recursos asignados, de maneira que se obteña a máxima rendibilidade posible.
  3. A determinación, en colaboración cos departamentos e o V.O.A.T., do número de grupos de cada materia, de acordo coas posibilidades de medios humanos e materiais, número de alumnos e as características de cada materia. Tenderase a un mesmo número de grupos para todas as materias troncais e obrigatorias do mesmo curso.
Con este fin tenderase ós seguintes módulos:
- Teoría, Prácticas de Encerado e análogas: 125 en 1º ciclo e 75 en 2º ciclo.
- Prácticas de Laboratorio e asimilables 20 alumnos.
- Para outro tipo de docencia estudiaranse as súas carácterísticas e necesidades. En todo caso teranse en conta as previsións que figuran nos documentos de acompañamento dos planos de estudio.
  1. A aprobación dos horarios de clases teóricas e prácticas que deberán ser internamente coherentes ó tempo que faciliten o mellor aproveitamento dos recursos humanos e materiais.
  2. O establecemento do calendario de exames atendendo, de forma especial, á distribución temporal das materias consideradas dun mesmo curso e, de ser posible, á compatibilidade coas dos cursos próximos. Cando pola programación dunha materia non sexa adecuado facer unha proba final, o Centro farao constar de forma explícita no calendario de exames indicando cales serán os métodos de avaliación e cando se considera que a cualificación é NON PRESENTADO.
  3. A publicación o antes posible e, en todo caso, antes do inicio do prazo de solicitude de materias de libre elección, dos criterios de distribución dos alumnos entre os distintos grupos, dos horarios e calendario de exames, así como o procedemento para a solicitude de cambio de grupo e os criterios para a resolución das mesmas.
  4. A selección, en colaboración co V.O.A.T., unha vez oídos os departamentos, das materias optativas. Nesta selección teranse en conta os seguintes criterios:
    1. Priorízaranse as materias optativas que permitan un maior aproveitamento dos recursos (por exemplo, materias comúns a varias titulacións).
    2. Garantirase a posibilidade de elección dos alumnos ofertando, sempre que sexa posible, o dobre do número de créditos que debe cursar cada alumno. Esta proporción poderá aumentarse se a media de alumnos nos grupos das materias optativas fose superior a 75 alumnos por grupo. En calquera caso a oferta pode ser superior no caso de que os medios humanos e materias existentes o permitan.
    3. Tenderase a que o reparto entre as distintas áreas dos créditos optativos que se impartan, sexa proporcional á asignación entre as distintas áreas da totalidade dos créditos optativos que figuran no plano de estudios. En calquera caso, deberase ter en conta a infraestructura dispoñible e as posibilidades do cadro de persoal existente nas distintas áreas e departamentos con posibilidade de implantar optativas.
    4. Deberán substituirse por outras materias optativas, preferentemente da mesma área as materias optativas:
      • Que durante dous anos consecutivos non alcancen 1/3 da media dos alumnos matriculados en materias optativas.
En calquera caso as materias que non alcancen o número mínimo de alumnos indicados, e non poidan substituirse por outras da mesma área, deixarán de impartirse se o departamento non pode garantir a súa docencia co profesorado actual mantendo en calquera caso a optatividade mínima que se indica para cada titulación.
As materias optativas que se deixen de impartir manterán os exames durante os tres cursos seguintes. Os profesores responsables dos exames e titorías serán os do último curso que se impartiu ou os que designe o departamento no caso de que aqueles perdan a vinculación co mesmo.
    1. No caso de que os límites anteriores dificulten a posta en marcha de tódalas especialidades previstas, o centro pode optar por apraza-la implantación dalgunha especialidade ou inicia-los trámites necesarios para a modificación do plano de estudios co fin de flexibiliza-lo catálogo de optativas necesario para obte-las distintas especialidades.
  1. A determinación, no caso das materias que se imparten por primeira vez e teñen adscrición múltiple, da área ou áreas que deben impartir a súa docencia. Este encargo manterase vixente salvo acordo contrario suficientemente xustificado da Xunta de Centro unha vez oídos os departamentos afectados, e orientarase, sen prexuízo da coherencia científica e académica, polos seguintes criterios:
    1. En cada materia deben intervir o menor número posible de áreas.
O reparto final de créditos da totalidade das materias que se deben impartir entre as distintas áreas tenderá, salvo acordo debidamente xustificado, a manter a proporción que establece o plano de estudios.
    1. Nembargantes, nos casos en que sexa preciso, manterase o encargo a profesores adscritos a outras áreas que viñeran dispensando con anterioridade tales materias. Como medida complementaria, e dentro da normativa vixente, facilitarase nestes supostos o cambio de área.
Para levar a efecto esta medida os departamentos nos que se encontran as áreas que teñen adscritas estas materias e os departamentos nos que están os profesores que as viñan ensinando estudiarán conxuntamente as posibles solucións.
    1. A C.O.A.P. previo informe do director do Centro e dos directores dos Departamentos afectados, poderá facer encargos transitorios, por un máximo de dous cursos académicos, diferentes da proposta do centro, tendo en conta a coherencia académica e as posibilidades docentes das distintas áreas.
  1. Fixa-lo cuadrimestre ou período no que se impartirá a docencia.
  2. Fixa-las directrices xerais para a elaboración da Programación Docente das distintas materias.
4. COMPETENCIAS DOS DEPARTAMENTOS
Serán competencias dos departamentos:
1. A elaboración da proposta de P.O.D.
(1)- 
1. O Consello de Departamento fará a asignación da actividade docente entre os seus membros, respectando o réxime de dedicación dos mesmos e a área de coñecemento á que están adscritos evitando situacións discriminatorias.
Nesta distribución das tarefas docentes poderán ser contempladas tódalas situacións previstas nas disposicións sobre profesorado, pero na proposta definitiva debe garantirse que a docencia das materias que corresponden ó departamento queda cuberta cos recursos disponibles.
a) A distribución dos encargos farase segundo os criterios de procedemento que fixe o Consello de Departamento debendo respectar os seguintes:
i) As disciplinas que estean estreitamente relacionadas cun determinado ámbito profesional (de forma especial cando a docencia práctica poidera coincidir ou ser análoga a unha actividade profesional concreta) serán impartidas, a ser posible, polos profesores que teñan a titulación requerida para poder desenvolver esa actividade profesional.
ii) No caso das áreas específicas establecidas con base no Artigo 4.1.a) do R.D. 1888/1984, os diplomados, enxeñeiros técnicos ou arquitectos técnicos impartirán a docencia en disciplinas das Diplomaturas e Enxeñerías Técnicas e terán preferencia sobre as materias para as que os capacita a súa titulación. Os Licenciados, Enxeñeiros e Arquitectos terán preferencia sobre as disciplinas das titulacións de ciclo longo.
iii) Ós asociados tipo B ("típicos") terán preferencia sobre a docencia pola que foi convocada a praza.
b) Tamén poderían incluirse, no seu caso, entre os criterios de procedemento que fixe o Consello de Departamento os seguintes:
iv) No caso de que un departamento considere conveniente que un profesor ou grupo de profesores leve a cabo un tipo de docencia que require o concurso de varios profesores e/ou varias disciplinas (por exemplo un grupo de profesores que desexen constituír un Equipo Pedagóxico para a docencia coordinada de varias disciplinas) o Departamento pode tomar unha decisión razoada sobre o encargo docente con independencia, para estes profesores e asignaturas, dos criterios que teña aprobado o Departamento, con carácter xeral, para a elaboración do POD.
v) Cando un departamento estea constituído por unha área na que existan subáreas académicamente diferenciadas (algúns departamentos teñen asumida a existencia de "seccións" ou "subáreas internas"), poderá solicitar á COAP autorización para a organización do POD en base a ditas "subáreas" ou "seccións". A COAP tomará a decisión en base á memoria que presente o Departamento e ós informes que considere necesarios. Neste caso deberán establecerse os criterios para a asignación da docencia dentro de cada "sección" ou "subárea interna" respectando a obriga de atender a totalidade da docencia.
c) De non mediar acordo do Consello sobre criterios e procedementos, ou se a aplicación dos mesmos produce situacións de empate entre varios profesores para a asignación dunha determinada docencia, atenderase, sempre dentro da racionalidade académica, os criterios i), ii) e iii) anteriores e se se segue producindo igualdade, recurrirase á antigüidade de acordo co Artigo 16 dos Estatutos da USC.
Cando sexa de aplicación o artigo 16 dos Estatutos da USC, establecense as seguintes prelacións entre corpos:
Catedráticos de Universidade;
Titulares de Universidade;
Catedráticos de Escola Universitaria;
Titulares de Escola Universitaria;
Asociados a Tempo Completo Doutores;
Axudantes de 2ª etapa;
Axudantes de 1ª etapa Doutores;
Asociados a Tempo Completo Non Doutores;
Asociados a Tempo Parcial;
Axudantes de 1ª etapa Non Doutores.
Ós efectos de aplicación do contemplado no parágrafo anterior os corpos de Profesores Titulares de Universidade e Catedráticos de Escola Universitaria con título de doutor entenderanse equiparados, sempre que por parte dos integrantes deste último corpo, non exista docencia suficiente para cubrir a súa adicación en materias da Escola Universitaria correspondente.
  1. Os profesores que figuren nas follas de P.O.D. como encargados dunha materia, responsabilizaranse da docencia, das titorías, dos exames e das actas na súa globalidade e ,de forma especial, da parte que lles corresponda no caso de encargo compartido. Só en casos excepcionais outros profesores do departamento poderán avalia-la materia e asina-las actas.
Tenderase a que a docencia teórica de cada grupo sexa encargada a un único profesor.
No caso de que, por razóns académicas, fose necesaria a participación de varios profesores dun mesmo departamento, este designará un responsable da coordinación da materia. Se non existe tal designación entenderase que o coordinador é o director do departamento.
Se é indispensable a participación de profesores de distintos departamentos, o responsable da coordinación será designado polo director do centro en colaboración cos departamentos implicados.
     3.  A inclusión de bolseiros no P.O.D. do departamento debe suxeitarse ó seguinte:
 
  1. A dedicación de bolseiros no P.O.D. será dun máximo de 60 horas prácticas.
  2. Será necesaria a súa inclusión explícita na primeira proposta do P.O.D. feita polo departamento.
  3. Só poderán ser incorporados posteriormente aqueles bolseiros que recibiran a súa primeira acreditación nas datas seguintes ó envío do P.O.D.
  4. No caso de que un bolseiro incorporado ó P.O.D. perdese a súa condición de tal antes de cubrir a totalidade da docencia que tivese asignada, o departamento fará a reformulación do P.O.D.
  5. O V.O.A.T. só emitirá certificación destas inclusións no P.O.D. unha vez finalizado o curso académico ou tralo certificado do departamento afectado onde se indique o número de horas xa impartidas.
  6. Para os titulares de contratos de incorporación de doutores e tecnólogos a grupos de investigación é aplicable todo o anterior.
4.   Os alumnos repetidores de materias de planos en extinción que non teñen dereito a docencia pero que aínda non remataron o período con dereito a exame necesitan dun período transitorio de titorías. Por esta razón os departamentos deberán seguir responsabilizándose das titorías e exames destas materias ata a súa extinción definitiva. A relación de profesores encargados desas titorías e exames que, preferiblemente coincidirán cos que a impartiron o último curso con dereito a docencia, deberá ser comunicada ó V.O.A.T. e ós centros para que estes a fagan pública nos taboleiros oficiais.
5.  Non se poderá considerar a docencia impartida nos cursos anteriores como impedimento para a impartición doutras materias da área á que está adscrita cada profesor nin sequera no caso de departamentos con docencia en distintos centros . No caso de que un profesor teña asignada docencia en máis dun centro, o departamento dirixirase ós centros afectados co fin de adapta-los horarios das materias implicadas.
6.   No caso de departamentos con docencia nos dous campus a simple impartición de docencia nun campus distinto ó da localidade de destino da praza ocupada non dá dereito á modificación do destino da mesma. Este cambio de destino só será efectivo se existe resolución do Vicerrectorado de Profesorado.
7.    É competencia do director do departamento analiza-los resultados académicos das materias que imparte o mesmo, así como procurar que o departamento estableza uns criterios xerais de avaliación adecuados que deberán ter en conta as características de cada materia.
4.2 A proposta de dedicación do seu profesorado, que deberá especificar para cada profesor
  1. Materias de 1º e 2º ciclo que imparte co número de créditos e o tipo de docencia.
  2. Créditos de terceiro ciclo indicando o programa de doutoramento.
  3. Cargo académico e reducción proposta, no seu caso.
  4. Horario de titorías e lugar onde se realizarán. Terase en conta os horarios dos alumnos afectados e será comunicado ó centro para que os faga públicos.
4.3 A elaboración, en colaboración co centro, da Programación Docente de cada materia que imparte. Esta programación docente deberá especificar:
  1. Profesorado encargado da docencia con indicación, no seu caso, do coordinador de cada grupo.
  2. Programa detallado da parte teórica e práctica.
  3. Criterios e sistema de avaliación.
  4. Bibliografía recomendada.
4.4 Unha vez elaborado o P.O.D. se, por circunstancias non previstas,se produce unha variación de carga docente, o departamento debe expoñe-las modificacións do P.O.D. que sexan necesarias e presentar en coordinación co centro unha proposta de modificación do P.D.A. que garanta a impartición da docencia.
 
5.  PROCEDEMENTO DE ELABORACIÓN DA P.A.A.
Dentro da necesaria flexibilidade, o procedemento de elaboración da P.A.A. de 1º e 2º ciclo rexérase polas seguintes normas:
  1. A Xunta de Goberno establecerá o calendario para a elaboración da planificación académica anual de 1º e 2º ciclo
  2. Os centros farán chegar ó V.O.A.T. e ós departamentos afectados a proposta de materias optativas que deben deixar de impartirse, para o que solicitarán ó V.O.A.T. os datos necesarios, xunto cunha relación priorizada das que deben implantarse, indicando a área que se propón como encargada da docencia.
No caso de extinción dun plano de estudios e/ou implantación dun novo a relación anterior debe estenderse ás materias troncais e obrigatorias.
  1. Á vista da comunicación anterior, o V.O.A.T. fará chegar a cada centro unha listaxe coa proposta de materias que se deben impartir no que se indicarán:
 
    • Número total de alumnos matriculados e os matriculados por primeria vez no curso anterior.
    • Número de créditos de teoría, encerado e laboratorio.
    • Número de grupos de teoría, encerado e laboratorio que de acordo co P.O.D. se impartiron o curso anterior.
  1. Á vista da relación anterior os centros en colaboración cos departamentos, tendo como referente a calidade da docencia e os medios humanos e materiais disponibles remitirán ó V.O.A.T. a súa proposta de P.D.A.
  2. Tendo en conta estas propostas e o necesario equilibrio entre as distintas titulacións o V.O.A.T. elaborará o P.D.A. correspondente respectando as propostas dos centros para aquelas materias en que se teña constancia da existencia de suficientes medios humanos e materiais.
  3. No caso de que un centro teña discrepancias co P.D.A. proposto polo V.O.A.T., xustificará por escrito tales discrepancias e pode solicitar que a C.O.A.P, nunha reunión con participación do decano/director do centro faga a proposta definitiva de P.D.A.
  4. A partir do P.D.A. aprobado, o V.O.A.T. enviará ós departamentos os datos do P.O.D. para a elaboración das súas propostas. De detectarse algún erro nos datos recibidos, comunicarase ó vicerrectorado para a súa correción. No P.O.D. de cada materia deberanse indicar qué profesores a dispensan, expresando claramente o número de horas dedicado por cada un deles nas distintas formas de docencia.
O director do departamento remitirá a proposta de P.O.D. ó V.O.A.T., dentro dos prazos establecidos.
  1. De forma simultánea á proposta de P.O.D. os departamentos remitirán ó Vicerrectorado de Profesorado, a través dos centros, a dedicación do profesorado existente xunto coa oportuna solicitude de prazas novas ou as posibles modificacións de adicación.
  2. O Vicerrectorado de Profesorado en coordinación co de Ordenación Académica e Titulacións analizará as solicitudes de novo profesorado que acompañan ás propostas de P.O.D. Unha vez efectuada a análise das necesidades de cadro de persoal, procederase a estudiar na C.O.A.P. a dotación de novas prazas sempre coas limitacións derivadas do orzamento de ampliación e mellora aprobado pola Xunta de Goberno.
Contra a decisión de dotación de prazas de profesorado os departamento poderán presentar reclamacións ante a Xunta de Goberno no prazo de 7 días dende a comunicación da mesma.
Á vista das disponibilidades de profesorado previstas a C.O.A.P. pode facer os axustes de P.D.A. que considere necesarios. O solapamento ocasional de materia de dous planos dunha mesma titulacións non dará lugar, salvo casos de especial gravidade, á contratación temporal de novo profesorado.
  1. Unha vez que os departamentos sexan informados de concesión ou non de novas prazas procederán ós axustes necesarios na proposta de P.O.D. facéndoo en función do cadro de persoal previsto. No caso de existencia de prazas para concurso asignaráselles docencia a tales prazas.
Esta nova proposta será remitida ó V.O.A.T. que a comunicará ós centros, na parte en que lles afecte antes do inicio do curso académico.
  1. Os departamentos con prazas pendentes de concurso fará a proposta definitiva de P.O.D. no prazo de 7 días dende a última toma de posesión dos profesores novos.
  2. As propostas de modificacións que por distintas razóns se poidan producir ó longo do curso serán comunicadas por escrito ó V.O.A.T. que remitirá novas follas das materias afectadas co fin de que sexan cubertas polo departamento. O V.O.A.T. comunicará ós centros implicados tódolos cambios que se vaian producindo nos P.O.D.s que afecten á docencia impartida nese centro.
  3. En calquera caso, cando a proposta definitiva de P.O.D. dun departamento non estea disponible sen causa xustificada, ou aínda habéndoa sen que o departamento poña en marcha as medidas transitorias de cara ó inicio das clases, o V.O.A.T. aprobará un P.O.D. provisorio seguindo as liñas do curso anterior coas actualizacións que sexan necesarias
6. COMPETENCIAS DOS DECANOS/DIRECTORES DOS CENTROS
Serán responsabilidades dos Decanos/Directores de centro:
  1. Velar, en colaboración cos Directores de Departamento, pola adecuación dos Programas das materias ós descriptores do Plano de Estudios.
  2. Facer o seguimento e desenvolvemento de tódalas actividades do P.A.A evitando ou correxindo, en coordinación cos departamentos, calquera desviación que se puidese producir.
  3. Garanti-la adecuada atención ós estudiantes, tanto no que se refire ás clases como ás titorías.
  4. Designar, en colaboración cos directores dos departamentos implicados, ós responsables da coordinación das materias con participación de profesores de varios departamentos.
  5. Intervir, comunicando ós departamentos e vicerrectorados correspondentes, os casos de incumprimento dos profesores.
  6. Colaborar cos directores dos Departamentos na súa función de velar polos resultados académicos.
  7. Garantir que o centro tome os acordos necesarios sobre os temas da súa competencia. En ausencia de tales pronunciamentos o decano/director elaborará as resolucións que suplan tales acordos.
7. COMPETENCIAS DOS DIRECTORES DE DEPARTAMENTO
Serán responsabilidades dos directores de departamento:
  1. Velar polo desenvolvemento da docencia das materias encargadas ó departamento, tanto no que se refire á parte teórica e práctica como a atención ós alumnos.
  2. Toma-las decisións necesarias para garanti-la docencia en casos de ausencias imprevistas de algún profesor, poñendo en xogo tódolos recursos de persoal do departamento e comunicar ós vicerrectorados correspondentes os casos de incumprimento inxustificados de profesores e propoñendo o que proceda cando tales incumprimentos sexan reiterados.
  3. Prever, en colaboración co decano/director do centro, as medidas transitorias para adoptar no caso de que algunha materia non teña profesor asignado ou o mesmo estea ausente, coa finalidade de garanti-la a súa docencia. Estableceranse así mesmo ,os mecanismos de recuperación precisos para garantir que en tódalas materias se impartan a totalidade dos contidos esenciais cando teña lugar algunha ausencia do profesor, xustificada ou non, ou por outros imprevistos.
  4. Comunicar ó decano correspondente e ó V.O.A.T. e Vicerrectorado de Profesorado as ausencias inxustificadas que se produzan e poñer en marcha as medidas transitorias que resolvan tales situacións.
  5. Velar, en colaboración co Director do Centro implicado, polos resultados académicos das materias que imparte o departamento.
  6. Garantir que o departamento tome os acordos necesarios sobre os temas da súa competencia. En ausencia de tales acordos será o director do departamento quen dictará as resolucións que suplan tales acordos.