ADECUACIÓN DE PROCEDEMENTOS ADMINISTRATIVOS UNIVERSITARIOS LEI 30/1992

(RESOLUCIÓN RECTORAL DO 16 DE MARZO DE 1995)

( D.O.G. DO 26 DE XULLO DE 1995 )

A Lei 30/1992, do 26 de novembro, do Réxime Xurídico das Administracións Públicas e do Procedemento Administrativo Común, establece na súa disposición adicional terceira, segundo a redacción dada a esta polo Real Decreto-Lei 14/1993, do 4 de agosto que se adecuarán á mesma as normas reguladoras dos distintos procedementos administrativos, calquera que sexa o seu rango, e sinalando expresamente os efectos estimatorios ou desestimatorios que se produzan pola falta de resolución expresa.

A entrada en vigor do mecanismo das resolucións presuntas dende o 28 de agosto de 1994, fai necesario determinar, respecto de cada procedemento, os prazos para resolver e os efectos desestimatorios ou estimatorios que a falta de resolución expresa produce.

A tal fin e co obxecto de facilitarlles ós administrados un mellor coñecemento dos seus dereitos e de garantirlles unha maior seguridade xurídica, examinados os procedementos administrativos nos que intervén a Universidade de Santiago de Compostela e de acordo coa disposición adicional terceria e co art. 43.5 da devandita lei, efectúase a adecuación dos procedementos administrativos que se tramitan na Universidade de Santiago de Compostela á Lei 30/1992, do 26 de novembro, nos seguintes térmos:

1.- PRAZOS PARA RESOLVER E EFECTOS DA FALTA DE RESOLUCIÓN EXPRESA.

Os procedementos universitarios que se detallan no anexo deberán ser resoltos no prazo máximo indicado no mesmo.

Transcurrido o prazo máximo para resolver o procedemento sen que recaese resolución expresa, poderase entender estimada ou desestimada a solicitude, de acordo co establecido para cada suposto no anexo, requiríndose, para a eficacia das resolucións presuntas, a certificación prevista no artigo 44 da Lei 30/1994, do 26 de novembro, do Réxime Xurídico das Administración Públicas e do Procedemento Administrativo Común.

2.- RECURSOS

As Resolucións do Rector e os acordos do Claustro Universitario, da Xunta de Goberno e do Consello Social esgotan a vía administrativa e serán impugnables directamente ante a xurisdicción contencioso-administrativa.

As Resolucións dos restantes órganos universitarios colexiados ou unipersonais non poñerán fin á vía administrativa, sendo susceptibles de recurso ordinario no prazo de un mes ante o Rector.

As referencias ó Recurso de Alzada incluídas en regulamentacións ou acordos da normativa propia da Universidade de Santiago de Compostela, entenderanse feitas ó Recurso Ordinario . Asi mesmo as referencias ó Recurso de Reposición teranse por non postas, posto que a dita figura non está vixente no ámbito administrativo universitario.

Así mesmo, contra os acordos e resolucións que non esgoten a vía administrativa, poderá formularse reclamación administrativa cando a normativa específica así o contemple ou cando o esixa a natureza do procedemento e así se indicase ó interesado

na notificación do acto administrativo. En defecto de previsión expresa, o prazo para formular a reclamación será de quince días e para resolvela disporase de trinta días.

3.- EFECTOS.

Apróbase a relación recollida no anexo a esta Resolución dos procedementos administrativos de competencia da Universidade de Santiago de Compostela, nos que a falta de resolución expresa por parte da Universidade nos prazos expresamente previstos para cada un deles, produce efectos desestimatorios ou estimatorios.

Nos restantes procedementos en materia de xestión universitaria e de persoal non incluídos no anexo da presente Resolución, iniciados en virtude de solicitudes formuladas polos interesados e cando non recaese resolución expresa por parte da Universidade no prazo de tres meses sinalado no art. 42.2º da Lei 30/1992, do 26 de novembro, entenderanse aquelas desestimadas.

DISPOSICIÓN TRANSITORIA

Os procedementos incluídos no ámbito de aplicación da presente Resolución que se iniciaran antes da súa entrada en vigor rexeranse pola normativa anterior.

As resolucións dos procedementos incluídos no ámbito de aplicación desta Resolución, adoptados con posterioridade á súa entrada en vigor, aplicaráselles o sistema de recursos establecido no capítulo II do título VII da Lei 30/1992, do 26 de novembro, do Réxime Xurídico das Administracións Públicas e do Procedemento Administrativo Común.

DISPOSICIÓN DERRADEIRA

A presente Resolución entrará en vigor a partir do día seguinte ó da súa publicación no Diario Oficial de Galicia.