O regulamento dos estudios de terceiro ciclo da Universidade de Santiago de Compostela, aprobado pola Xunta de Goberno o día 7 de abril de 2000 (DOG de 6 de marzo de 2001) no seu artigo 12.a establece como requisito previo para os estudiantes con título estranxeiro sen homologar que queren matricularse na etapa de formación dos estudios de terceiro ciclo: “... a admisión previa outorgada polo rector, por proposta do servicio administrativo correspondente, na que se indicará a denominación do título estranxeiro e o seu recoñecemento para os efectos de realizar estudios de terceiro ciclo” .

A normativa de títulos propios de Graduado Superior, aprobada polo Consello de Goberno o 12 de xuño de 2003, referíndose ós alumnos con estudios estranxeiros recolle no seu artigo 2 que “... poderá admitirse a matrícula sen a previa homologación, mediante unha resolución de recoñecemento de equivalencia”.

Do mesmo xeito, o artigo 6 do regulamento dos estudios de posgrao e de formación continua da Universidade de Santiago de Compostela aprobado por acordo da Xunta de Goberno do 22 de decembro de 1999 establece que: “...o acceso ós Estudios de Posgrao considerados no presente regulamento por parte dos que se atopen en posesión dun título estranxeiro realizarase, en conformidade co artigo 16.1 do Real Decreto 86/1987 do 16 de xaneiro, sen necesidade de homologación do dito título, sendo suficiente a autorización outorgada polo rector, que se expedirá previa comprobación polo Centro de Posgrao Terceiro Ciclo e Formación Continua (CPTF) da correspondencia do título estranxeiro presentado”.

Á vista da normativa é procedente actualizar e revisar o procedemento para a tramitación das solicitudes de equivalencia residenciándoo nun só órgano e por iso que este Rectorado

RESOLVEU:

PRIMEIRO.- ÁMBITO DE APLICACIÓN.

1.1.- A solicitude, trámite e resolución de equivalencia e admisión previa para realizar estudios de terceiro ciclo e posgrao, ou títulos propios de Graduado Superior regularase polas normas da presente resolución.

1.2.- As solicitudes de alumnos que pretendan o recoñecemento ou admisión previa na etapa de tese, conforme ó establecido no artigo 10.4 do regulamento dos estudios de terceiro ciclo, acordo da Xunta de Goberno de 7 de abril de 2000, non están incluídos no ámbito de aplicación desta resolución e seguirán tramitándose polo procedemento establecido polo Centro de Posgrao Terceiro Ciclo e Formación Continua. En todo caso, a resolución positiva da solicitude suporá o recoñecemento implícito de todos os estudios e títulos necesarios para obte-lo dito recoñecemento, incluíndo a equivalencia do nivel do título de licenciatura do interesado.

SEGUNDO.- SOLICITUDES

2.1.- As solicitudes presentaranse en calquera dos rexistros oficiais da Universidade, ou por calquera dos medios establecidos pola Lei 30/1992 do 26 de novembro de Réxime Xurídico das Administracións Públicas e do Procedemento Administrativo Común. A dita solicitude deberá presentarse xunto co orixinal ou copia legal dos seguintes documentos:

-   DNI ou pasaporte

-   Título universitario

-   Certificado completo dos estudios realizados

Os documentos deberán estar legalizados por vía diplomática da forma indicada na instrucción da Secretaría Xeral do 31 de marzo de 1995, e xunto cos presentados en linguas non oficiais na Universidade de Santiago de Compostela deberánse achegar a correspondente traducción oficial.

2.2. Ademais dos documentos relacionados no apartado 2.1., recomendarase ós solicitantes a presentación dos programas das materias realizadas para os efectos de facilitar elementos de xuízo ó órgano encargado de informar a solicitude.

TERCEIRO.- TRAMITACIÓN

3.1.- As solicitudes remitiranse ó Servicio de Xestión Académica que será o encargado da tramitación e de realizar a correspondente proposta de resolución.

3.2.- Só se resolverán as solicitudes de admisión previa dos alumnos admitidos no programa de doutoramento ou nos estudios de posgrao correspondentes. A matrícula ou inscripción que puideran realizar os interesados condicionará os seus efectos a resolución positiva da solicitude de equivalencia.

3.3.- Para a resolución das solicitudes poderá recabarse o informe académico do centro, ou comisión correspondente. De estimarse oportuno poderase recabar informe doutros órganos académicos e administracións públicas.

3.4.- Dictada resolución poderá devolverse a documentación presentada previa solicitude do interesado, deixando o funcionario encargado constancia no expediente desta circunstancia.

CUARTO.- RESOLUCIÓN

4.1.- Nas resolucións que declaren a equivalencia incluirase a información ó interesado sobre as limitacións do futuro título que poida obter sen a homologación do título estranxeiro.

Santiago de Compostela, a 16 de outubro de 2003

O RECTOR

Senén Barro Ameneiro