campUSCulturae

campUSCulturae é unha aposta da Universidade de Santiago de Compostela a prol das culturas do mundo, do entendemento multicultural e do fomento da diversidade e o pluralismo. Considerar a importancia das culturas (nomeadamente as minoritarias, máis acosadas por perigos que afecten á súa continuidade e pervivencia) parécenos unha oportunidade para manter a biodiversidade cultural do planeta, ofrecendo á nosa lingua e cultura a posibilidade de establecer procesos de retroalimentación con outros códigos lingüísticos e culturais.

campUSCulturae propón unha visión anovada sobre cuestións fundamentais para unha universidade do século XXI

1. Promover o diálogo intercultural
2. Dar lugar á creación de plataformas de mutuo coñecemento e entendemento entre pobos e individuos procedentes de distintas culturas do mundo
3. Apoiar proxectos de fomento das culturas ou grupos sociais menos protexidos ou en perigo de desaparición
4. Fomentar a proxección e difusión das linguas minoritarias do mundo
5. Abordar as diferencias e a diversidade cultural desde parámetros non paternalistas, non colonialistas, igualitarios e de cooperación
6. Visibilizar formas de vida, experiencias de persoas ou de grupos, rompendo cos tabúes preconcibidos ou cos tópicos universalistas que devalúen o feito diferencial.
7. Crebar tabúes e prexuizos que obran en contra da diversidade social e cultural

Contidos de campUSCulturae

• Centro Internacional da Creatividade
• Centro sobre Infancias e Culturas
• Centro da InterCulturalidade

Aberto o prazo para presentar comunicacións e para realizar a inscrición gratuíta, no Congreso Internacional "Ilustrando a Diversidade". O congreso terá lugar entre os días 20 e 23 de febreiro en Santiago de Compostela e nel participarán ilustradores/as de distintos países do mundo, expertos en arte e edición e profesionais da animación e da promoción da lectura. En coincidencia co mesmo inaugurarase a Exposición ilustraMundos, que permanecerá aberta até o 20 de abril na sala de exposicións do Pazo de Fonseca.

Para recibir máis información podedes poñervos en contacto connosco a través do e-mail: campusculturae@usc.es ou visitar noso facebook http://es-es.facebook.com/campUSCulturae, onde atoparedes a referencia ao blog da mostra.