Cita previa DNI electrónico

A USC ven de acordar co Ministerio do Interior levar a cabo unha acción específica para que os membros do cadro de persoal, profesores, PAS e investigadores, que participan nos distintos proxectos de sinatura electrónica que estanse a acometer na universidade, poidan obter o novo DNI-e de xeito preferente.

A tal fin, a USC pon á disposición do seu persoal unha aplicación de cita previa onde vostede poderá elixir día, franxa horaria e cidade (Santiago ou Lugo) para ser atendido. O Ministerio do Interior comprométese a aceptar esas citas reservando un cupo de atención preferente para elas.

Polo tanto, para obter o novo DNI-e deberá:

• Entrar na aplicación de selección para marcar a súa cita. Lembre que:
  • Debe identificarse co seu usuario e contrasinal do dominio USC na forma    nome.apelidos@usc.es
  • A cita poderá obterse ata o día anterior á mesma. Non será posible pedila para o mesmo día
  • Dentro da mesma páxina poderá eliminar a cita solicitada e pedir outra
• Persoarse na Oficina do DNI para realizar os trámites no día sinalado, achegando dúas fotografías. Indique no mostrador da entrada que ten cita previa sinalada da Universidade
• Recibirá, xunto co propio DNI, un sobre co contrasinal que permite usar o certificado de identidade. De non recibilo, ou para cambiar o (complicado) contrasinal que lle proporcionen, dispón no mesmo recinto dun “caixeiro automático” onde, coñecendo o contrasinal vella ou coa pegada dactilar, establecerá o novo contrasinal que desexe.

Pode ver un video explicativo sobre o DNIe, premendo neste enlace. 

 Que facer en caso de erro?

Se no momento de identificarse na aplicación vostede se trabuca e aparece unha páxina de erro, por favor, peche o seu navegador e ábrao de novo.

Se persisten os problemas, chame ao Centro de Atención a Usuarios (Ext. 55555)

 Unha vez obtido o DNI-e, a USC facilitará gratuitamente un lector de tarxetas que se conectará ao ordenador por un porto USB. Se vostede é profesor ou investigador, pídao á persoa responsable da unidade de apoio ao centro e aos departamentos da Facultade ou Escola en que esté destinado. Se pertence ao PAS e non recibiu anteriormente o lector no seu posto de traballo, envíe un correo electrónico a sinaturaelectronica@usc.es para solicitar o lector indicando o seu nome, destino e a data na que obtivo o documento na comisaría. Consulte o apartado “Descargas de software” na páxina http://www.usc.es/gl/servizos/atic/sinatura/index.html e atopará os programas necesarios para facer funcionar o lector e o DNI-e.  

Consideracións de especial importancia

1. O DNI electrónico leva incorporado un certificado electrónico de identidade. A sinatura de documentos co devandito certificado ten a consideración de sinatura electrónica recoñecida e vaise converter no instrumento imprescindible para a realización de trámites que requiran a identificación dos usuarios nas aplicacións telemáticas da Administración.
2. A Universidade de Santiago está a modificar a súas aplicacións informáticas para que sexa imprescindible contar cun sistema de sinatura dixital para poder acceder a elas, polo que vostede deberá contar próximamente cun certificado dixital de identidade. Neste senso, por exemplo, está xa rematado e funcionando plenamente o proxecto de sinatura electrónica das actas académicas de cualificacións.

Para máis información, ademais de á Secretaría Virtual do profesor, poden dirixirse ao correo electrónico: sinaturaelectronica@usc.es e á páxina do Ministerio do Interior: http://www.dnielectronico.es