Presentación

A Biblioteca Universitaria ten a súa orixe na primitiva Librería da Universidade, creada a mediados do século XVI e situada no Colexio fundado polo Arcebispo de Santiago, Alonso de Fonseca III.

A colección histórica da Biblioteca é o resultado da adquisición de fondos por parte da Universidade, dos donativos de destacados benefactores coma Felipe de Castro, Manuel Ventura Figueroa ou Jacobo de Parga e Puga, das moi valiosas contribucións bibliográficas recibidas con motivo da expulsión dos xesuitas no século XVIII e da desamortización do século XIX, que significou a incorporación das librerías dos mosteiros de Galicia, das que sen dúbida é máis importante a do Mosteiro de San Martiño Pinario de Santiago.

No século XX a Biblioteca beneficiouse extraordinariamente con tres novas contribucións: a adquisición da biblioteca do Arcebispo Lago González, a fundación por D. Gumersindo Busto da Biblioteca América, e o depósito da Biblioteca da Real Sociedade Económica de Amigos do País de Santiago.

A Biblioteca Xeral é depositaria do fondo antigo da Biblioteca Universitaria, da sección Galicia, e dunha ampla colección de obras de referencia e bibliografía interdisciplinar.

Na actualidade a Biblioteca Universitaria defínese como unha unidade funcional de apoio á docencia e á investigación. Está constituída por tódolos fondos bibliográficos, documentais e audiovisuais adquiridos polos diferentos centros e servicios - calquera que fose o concepto presupostario co que se adquiran -, polos de troco e polos mercados en favor da Universidade por outros organismos, aínda que se garden en sitios distintos e en diferentes edificios universitarios.

Os usuarios teñen o deber de respecta-la integridade e o estado das instalacións da Biblioteca Universitaria, así como os fondos e documentos que a compoñen. (Artigo 30 do Regulamento da BUSC)