Xeoloxía

• Colección de modelos cristalográficos de Haüy

Realizada baixo a dirección do abate Haüy consta na actualidade de 1000 modelos de madeira que representan a forma ideal de cristalización das diversas especies minerais. Chega á Universidade de Santiago en 1847.
 

• Colección de minerais José Viqueira

Elaborada durante máis de 40 anos polo propio Viqueira. Os seus exemplares proceden de compras a casas de material científico, de pezas recollidas polo propio autor e doazóns de particulares. Nela están representadas case a totalidade das variedades minerais existentes e moitos dos exemplares aparecen en forma de cristais.

 

•  Colección de minerais de Galicia

Agrupa exemplares das distintas clases existentes en Galicia que se foron incorporando ao museo desde o ano 1840 ata a actualidade. 

 

• Colección de minerais Biblioteca América

Formada por exemplares enviados a través da Biblioteca América á Universidade no ano 1924 pola Comisión Protectora de Bos Aires. Outros dous envíos completan esta colección, un no ano 1960 de Divisao de Geologia e Mineralogia de Río de Xaneiro e outro do Departamento de Minas de la Secretaría de Industria, Comercio y Trabajo de la República Mexicana.

• Colección de rochas de Galicia Isidro Parga Pondal

Iniciada coas mostras recollidas por Parga en 1936 coa finalidade de tomar exemplares dos principais afloramentos petrolóxicos galegos.

Segue incrementándose na actualidade con novas achegas froito dos diversos proxectos de investigacións e de particulares.

 

• Colección de rochas dos Alpes Isidro Parga Pondal

Bolseiro da Junta de Ampliación de Estudios na EidgenössicheTechnische Hochschule de Zürich aproveita para participar en excursións polos Alpes. Probablemente estas excursións son a orixe desta colección incorporada ao Museo en 1930.

   

• Mármores das provincias de España

 

Esta colección de 121 mármores, do ano 1878, probablemente foi adquirida para o Gabinete de Historia Natural por orde de Vicente González Canales.