Recoñecementos médicos preventivos

A nova Lei de prevención de riscos laborais ten como obxecto (artigo 2) promover a seguridade e saúde dos traballadores.

No Servizo de Vixilancia da Saúde e, en base a esta Lei, realízanse recoñecementos preventivos:

• Recoñecementos médicos periódicos, personalizados segundo os riscos de cada traballador

Neste senso é importante recalcar a necesidade de que cada traballador nos manteña informados acerca da súa exposición a materiais e/ou productos químicos e biolóxicos, así como o manexo de máquinas, para que o poidamos incorporar na súa ficha e así poder facer unha mellor valoración do seu posto de traballo e un recoñecemento personalizado. Para iso elaboramos unha enquisa xenérica, na que se trata de detecta-los posibles contactos laborais que poidan xerar un risco.

Tamén é necesario  ter acceso ás novas incorporacións de productos no lugar de traballo de cada persoa, o que se poría no noso coñecemento para poder  engadilo na ficha, e programar así un control biolóxico actualizado da exposición, para un recoñecemento médico específico do que derivarían as recomendacións oportunas a cada posto de traballo.

• Recoñecementos médicos previos ó ingreso do traballador na empresa

O fin último é asegurar que o exercicio dun determinado traballo non poida resultar prexudicial para a saúde do aspirante a ese posto.

• Recoñecementos médicos a petición propia
  
  • Cando o traballador pensa que o posto de traballo ten ou pode ter algunha repercusión sobre a súa saúde, en relación co seu posto de traballo.
  • Cando presente algunha patoloxía que poida afecta-la seguridade do traballo e solicite recoñecemento.

• Recoñecementos médicos a petición de terceiros (empresa, compañeiros, ou familiares)

Naqueles casos nos que se vexa algunha anomalía importante,  ben sexa no comportamento ben no rendemento laboral ou no estado de saúde, e se considere necesaria a intervención do Servizo de Vixilancia da Saúde (consumo de alcohol, drogas, depresión, etc.).

O  protocolo que estamos a realizar é axeitado ó posto de traballo, e consiste nunha serie de pasos previamente establecidos:

• Historia clínico-laboral que se compón dunha anamnese detallada e exploración física, e un resumo do posto de traballo actual e anterior.
• Análise xeral  e análise adaptada ó posto de traballo.
• ECG (electrocardiograma).
• Espirometría e audiometría, nos casos nos que sexa oportuno.
• Control visión, con toma de tensión ocular en ámbolos dous ollos.

Á continuación facilitámosvo-lo boletín de solicitude do recoñecemento médico, por se alguén quere solicitalo por correo electrónico ó Servizo de Vixilancia da Saúde.