|
Creado en 1997, o Departamento de Historia Contemporánea e de
América é froito da expansión protagonizada polas dúas áreas que
o conforman, Historia Contemporánea e Historia de América.
Logo de que entre 1973/78 fora implantada como especialidade curricular,
a historia contemporánea transformouse en 1984, coa aplicación da
LRU, en área de coñecemento como parte do Departamento de Historia
Medieval, Moderna e Contemporánea.
Dende entón, e da man dos novos profesores contratados, R. Villares
e X.R. Barreiro (catedráticos en 1987), máis o finado X.M. Pose
Antelo, Carme Fernández Casanova, Isaura Varela, Pilar López Rodríguez,
Xavier Castro e Xusto Beramendi González (catedrático en 1995),
promoveuse un proceso sostido de formación de doutores e de xenerosa
ampliación da actividade con resultados enseguida fructíferos.
Forma parte do mesmo, a incorporación da profesora Pilar Cagiao
Vila, no ano 1986, coa implantación na USC da área de Historia de
América, hoxe xa plenamente consolidada. Dende o 93 dispón dun itinerario
curricular específico no marco da Titulación de Historia. Mantén
abertas diversas liñas de estudio -Estudios Migratorios, Relacións
Culturais, Dictaduras e Exilio-. E ven de promover a creación do
Centro Interdisciplinar de Estudos Americanistas "Gumersindo Busto",
que na actualidade está a dirixir a propia Cagiao Vila.
Froito de todo ese esforzo e da colaboración establecida entre
uns e outros, o Departamento conta na actualidade cunha plantilla
de quince profesores titulares a tempo completo, catro catedráticos
(L. Fernández Prieto, 2005), un asociado a tempo parcial, unha axudante
non doutora e máis un investigador Parga Pondal.
Impártese docencia nas titulacións de de CC. Políticas, CC. da
Información, Relacións Laborais, Humanidades, Enxeñería Forestal,
Hª da Arte, Xeografía, Filoloxía Galega, e Filoloxía Portuguesa.
Reúne a un total de cinco grupos de investigación consolidados entorno
ás que foron as liñas de investigación definitorias do Departamento,
máis algunhas outras recentes: Historia Agraria, Historia Política
e dos Nacionalismos, Estudios Migratorios e Americanistas, Historia
Social e Historia Oral.
Dispón dun potente arquivo en Historia Oral de Galicia (HISTORGA),
en permanente crecemento dende que fora posto en marcha a finais
dos 80 pola profesora Isaura Varela coa colaboración de Marc Wouters
e de Xurxo Pantaleón.
E promove e participa activamente en proxectos de investigación
de gran actualidade, como todo o referido á recuperación da Memoria
da Guerra Civil, da Represión Franquista, ou da Emigración e o Exilio.
|
