PORTA ABERTA Ó HERBARIO SANT

Actividade: Exposición “PORTA ABERTA Ó HERBARIO SANT” Integrada en: Semana da Ciencia 2006 Dirixido a: alumnado universitario, ensino medio e público en xeral ACTUALMENTE EN ITINERANCIA por centros de ensino (ver detalles sobre a súa disponibilidade) Organiza: Herbario SANT e Departamento de Botánica Patrocinan: Dirección Xeral de I+D+i (Xunta de Galicia) e USC Contacto: Tel. 981563100, ext. 14977 (Javier AMIGO) ou 15022 (Ramiro IGLESIAS) email: javier.amigo.vazquez@usc.es Dossier de prensa Reportaxe no programa da TVG A Revista, 30/IX/2006: introducción (video 800 Kb) + entrevista (video 4 Mb) Condicións para o préstamo da exposición en itinerancia. Presentación animada complementaria (8 Mb)

Os obxectivos básicos dun herbario son documentar e preservar; por iso o que aquí se exhibe son mostras, ou copias de mostras, preparadas para a súa preservación indefinida. Pode non ser tan vistoso como unha colección fotográfica de especies silvestres, pero o que se quere resaltar é o valor do esforzo de moitas persoas ao longo do tempo recolectando, preservando e etiquetando espécimes, tanto para a aprendizaxe coma para a investigación en Botánica, no momento actual e no futuro.

Tras un percorrido por distintos medios ecolóxicos (aconséllase seguir a dirección das frechas), móstranse esquematicamente os labores previos do botánico dende que colecta un exemplar ata que este se integra definitivamente no Herbario. Só nos centramos nas plantas vasculares, pero o SANT ten asociadas tamén coleccións moi importantes de outros tipos de plantas chamadas criptógamas: algas, liques e musgos.

Finalmente poderedes ver algunhas prestacións que poden obterse de toda esta colección de plantas na medida en que se está a informatizar todo o seu contido. Esta é unha fase aínda non rematada e que aínda non ten garantida a súa continuidade, pero que innegablemente permitirá nun futuro moi próximo abrir á sociedade unha ventá permanente a unha boa cantidade de información sobre o noso patrimonio natural.

Sede benvidos.

Aspectos a ter en conta de cara a solicitar a exposición en préstamo:

• PANEIS CON PREGOS E FOTOS DE PLANTAS: 6 paneis colgantes de 3.10 metros de longo por 1.40 m de alto (aproximadamente) que deben pendurar a unha altura de 1 m sobre o chan para seren visualizados POLAS DÚAS CARAS. Ou sexa, que deben colgarse espaciadamente do teito nunha sala de polo menos 5 m de ancho, 11 m de longo e 2.60 m de alto para que se poida circular entre eles sen risco de tropezar e estropealos.
  Os paneis individuais son grandes pero non pesan demasiado pois son de material lixeiro, aínda que sería bon ter algo embaixo de cada un aonde amarralos para que non oscilen (o ideal sería aproveitar unha aula e poñer unhas gomas elásticas entre cada panel e as mesas que quedan embaixo).
  As plantas están agrupadas nos paneis segundo os hábitats onde aparecen con máis frecuencia, cun breve texto explicativo.
  Asemade, adxúntase en papel aparte a lista dos nomes científicos das especies de cada hábitat, seguidos dos seus nomes populares galegos tomados da "Nomenclatura vernácula da flora vascular galega" (E.Losada, J.Castro & E.Niño, Consellería de Agricultura Gandería e Montes da Xunta de Galicia, 1992).
  Unha posible actividade didáctica a realizar en relación coa nomenclatura popular que vos pode interesar resumímola nun par de follas (arquivo PDF).
• FUNCIONAMENTO DO HERBARIO: 2 paneis explicativos de 0.90 m de ancho por 1.20 de alto cada un, que se visualizan POR UNHA CARA (poden poñerse nunha parede)
• INFORMATIZACIÓN DO HERBARIO: Unha presentación explicativa en ORDENADOR que vos podemos pasar en CD ou por correo electrónico, ou ben cunha conexión a internet de banda ancha podédela visualizar directamente desde a web do Herbario SANT. En calquera caso precisades ter un aparato dispoñible para vela.

B). PREVISIÓN DE DATAS: en principio calculamos que unha duración dun par de semanas é axeitada para unha exposición destas características, de xeito que poida ir rotando por distintos centros. O calendario previsto a día de hoxe é o seguinte:

DATAS RESERVADAS		CENTRO
03/05/2007 - 11/05/2007		IES Antonio Fraguas Fraguas Santiago de Compostela (A Coruña)
14/05/2007 - 25/05/2007		IES de Arzúa Arzúa (A Coruña)
28/05/2007 - 11/06/2007		IES Miguel Ángel González Estévez (ver fotos) Carril, Vilagarcía de Arousa (Pontevedra)
13/09/2007 - 15/09/2007		Xornadas Ciencia e Ensino Santiago de Compostela (A Coruña)