Os I Premios de Innovación Educativa na Universidade entregáronse
a mañá do día 15 de novembro nun acto celebrado no Salón
de Graos do Colexio de San Xerome. A esta primeira edición,
convocada polo Vicerrectorado de Ordenación Académica e
Titulacións xunto co Instituto de Ciencias da Educación
da USC, presentáronse experiencias educativas innovadoras
realizadas no ámbito da USC nos últimos tres anos e que
supoñeran algún tipo de práctica susceptible de ser ampliada
e mesmo xeralizada a outros contextos do ensino superior,
tanto dentro como fóra da Universidade. Os premios teñen
unha cuantía de 300.000 pesetas.
Na área de Ciencias da Saúde
resultou gañador o proxecto titulado "Métodos
para a mellora do aprendizaxe na histoloxía",
sendo o profesor responsable Sergio Vidal Ruibal
e os membros do equipo Lucas Moya Jiménez e Florentina
Guerrero Callejas, do Departamento de Anatomía
e Producción Animal da Facultade de Veterinaria de Lugo.
Na área de Tecnoloxías o traballo "Cultivando
cultura e Terra Alén. Unha conxugación dos aspectos técnico-científicos
cos humanísticos e medioambientais" foi
o gañador. Roxelio Pérez Moreira foi
o responsable do proxecto, da Escola Politécnica
Superior de Lugo.
Na área de Ciencias Sociais resultou
premiado o traballo "El espacio de la naturaleza
en el arte", responsabilidade da profesora
María Jesús Agra Pardiñas, do Departamento
da Expresión Musical, Plástica e Corporal da Facultade
de Ciencias da Educación.
Na área de Ciencias Experimentais o xurado
acordou comparti-lo premio entre o traballo Topoloxia
dos espacios euclidianos. Curso virtual, de Xosé
M. Masa Vázquez, profesor da Facultade
de Matemáticas, e "Contribución
a unha mellora dos procedementos interactivos no proceso
ensinanza aprendizaxe. Unha nova experiencia de interacción
grupal na docencia da Bioquímica Clínica e Patoloxía Molecular",
un proxecto das profesoras Pilar Arias Crespo
e Montserrat Nogueira Álvarez, do Departamento
de Bioquímica e Bioloxía Molecular da Facultade
de Bioloxía.
Por último, na área de Humanidades resultou
premiado o traballo titulado "Proxecto Xeoplaning.
Experiencia de innovación educativa", dirixido
polo profesor Carlos Ferras Sexto coa
colaboración do Colectivo Xeoplaning, da Facultade de
Xeografía e Historia.
Ademais, o xurado acordou conceder dezaseis
accesits a cada un dos traballos presentados
que non obtiveron premio na súa respectiva área. Así,
na área de Ciencias da Saúde acadaron áccesits Mª del
Carmen Segura Iglesias e colaboradores polos traballos
Prions e as enfermidades causadas por eles, Bases xenéticas
do autismo e A clonación. Juan Seoane Lestón e Pedro Diz
Dios mereceron mención por Unha proposta de integración
preclínica-clínica no ensino práctico da cirurxía oral
e Natalia Vandenberghe por Informe de explotación en economía
agraria.
Na área de Tecnoloxías o accesit recaeu no traballo de
Juan Méndez e Efrén Arias titulado Proxecto Polifemo.
Expofood: entorno virtual de comunicación e aprendizaxe.
En Ciencias Sociais, acadaron accesits Inmaculada
Cárdenas polo traballo Experiencia innovadora nas ensinanzas
da música na EU de Maxisterio; Alfonso García Tobío e
Juan C. Pardo por Innovación e construcción de coñecemento:
principios que fundamentan os procesos de cambio nas actividades
docentes de dous profesores da Facultade de Ciencias da
Educación; Domingo Neira por Innovación de programas en
la Universidad; Jesús Salgado por Evaluación del aprovechamiento
universitario basado en el modelo del feed-back de 360
grados y la evaluación continua: el caso de la asignatura
de Psicología Económica; e José Díaz de Castro por O ensino
de Administración de Empresas a grandes grupos. Da transmisión
de coñecementos ó desenvolvemento de habilidades.
Os accesits na área de Ciencias Experimentais recaeron
en José Ángel Docobo por Programa de Extensión Cultural
de Astronomía; Javier Mas polo traballo Escuela de Otoño
de Física Teórica; Mariana Landín por La literatura como
recurso didáctico para el estudio de la historia de la
Farmacia; e Jaime Fábregas por Programa Exenova: experiencia
educativa innovadora.
Na área de Humanidades os accesits foron para Julio Vázquez
polo traballo Integración de novas tecnoloxías na docencia
de Historia da Arte; Pilar Alonso e Javier Yáñez por A
agroindustria no Concello de Arzúa: o queixo Arzúa-Ulloa;
e Milagros Fernández e colaboradoras por Unha experiencia
de ensino para a aprendizaxe en Lingüística xeral.
No acto de entrega dos premios, o profesor Roxelio
Pérez, quen pronunciou unhas palabras en representación
de tódolos premiados, falou dos esforzo de rachar co convencional
na docencia, polo que os galardóns foron "un recoñecemento
á nosa osadía que nos obriga a seguir cos nosos traballos,
premiados diariamente polos alumnos, quen realmente son
os merecedores de mención". Pola súa banda, o vicerrector
Celso Rodríguez, que recoñeceu a dificultade de outorga-los
premios pola súa alta calidade, animou ós docentes a presentar
proxectos á segunda convocatoria, que ten por obxectivo
"que saian á luz pública moitas actividades non comúns
que se realizan na Universidade".
O xurado deste primeiro certame estivo presidido
polo vicerrector de Ordenación Académica e Titulacións,
Celso Rodríguez. O xefe de División do ICE, José Manuel
Vez, actuou como secretario e foron vocais Miguel Anxo
Santos Rego, director do ICE, e os profesores José Sordo,
Enrique Antonio González, Hermelindo Portela e José Antonio
Varela.
