Oficina de Software Libre da Universidade de Santiago de Compostela

Equipo coa Ubuntu-USC

A Oficina de Software Libre da USC vai a impartir un ciclo de cursos sobre a "Administración da Ubuntu-USC" aos técnicos informáticos da Área TIC. Os cursos versarán principalmente na xestión e resolución de incidencias menores e usuais, coa finalidade de estabelecer unha primeira estadía no soporte técnico corporativo da USC na distribución de GNU/Linux adaptada para a universidade, Ubuntu-USC.

Ao igual que os anteriores cursos levados a cabo pola Oficina este ano("O Software Libre vitamina a formación da universidade no mes de abril"), este ciclo de cursos inscríbense dentro dos plans de formación que a universidade ofrece aos seus membros pero esta vez a través do servizo de formación ao PAS. O curso está organizado en estreita colaboración entre a Area TIC e a Oficina, que elaboraron un programa que permita formar aos técnicos para o despregue, xestión e mantemento das instalacións de Software Libre baseadas na Ubuntu-USC.

Ao longo das seguintes semanas impartiranse dous cursos exclusivos para os técnicos informáticos da Area TIC para adquirir os coñecementos necesarios para xestionar a que xa é a distribución de GNU/Linux elixida para implantar nas aulas sempre e cando os profesores que imparten docencia nesa aula soliciten un sistema operante baseado en Linux.

Os cursos terán unha duración de 20 horas e o desenvolvemento dos mesmos levarase a cabo nas seguintes datas:

- Aula 5 da facultade de Dereito, Campus Sur. Do luns 7 ao venres 11 de xuño de 12:00 a 14:00 e de 16:00 a 18:00.
- Aula 5 da facultade de Dereito, Campus Sur. Do luns 14 ao venres 18 de xuño desde as 9:00 á 13:00.

Estase a planificar un curso para os técnicos do Campus de Lugo que se prevé levar a cabo durante o mes de setembro.

Serán impartidos por Fran Diéguez (técnico da Oficina) e Óscar Casal (colaborador da Oficina e investigador no DEC). O programa dos cursos é o seguinte:

1. Breve introdución aos sistemas UNIX
2. Instalación base do sistema, mediante o uso de máquinas virtuais
3. Descrición do sistema de ficheiros LFS (Linux FileSystem)
4. Sistemas de ficheiros
5. A liña de ordes
6. Xestión do sistema de arrinque do equipo
7. Configuración da rede
8. Firewall (Firestarter)
9. Xestión de software instalado
10. Administración e acceso remoto
11. Autenticación centralizada da USC
12. Rexistros do sistema

A Oficina de Software Libre da USC non só está a promocionar o Software Libre na comunidade universitaria (vexase as campañas de difusión[1] e as ofertas de formación[2] realizadas ata o de agora). En colaboración coa Area TIC está a crear os cimentos para que o despregue efectivo e real de Software Libre nesta nosa universidade sexa unha realidade que xa é palpable e viábel a través dos plans pilotos realizados durante o ano 2009[3].

Gráfico de proxectos da OSL

A Oficina, sempre en colaboración coa súa comisión de seguimento e cos responsábeis da Area TIC, ven realizando unha serie de accións encamiñadas ao uso de Software Libre na universidade. Pódense resumir de forma moi simple e esquemática en: O primeiro paso foi a creación de ferramentas e contidos para promocionar o Software Libre, no que destaca o seu produto estrela, a Ubuntu-USC, sistema operativo en galego adaptado para a universidade. En segundo lugar a oferta de formación, constante desde a creación da Oficina a finais do ano 2008. En terceiro lugar, as tarefas de asesoramento e asistencia técnica de último nivel en materia de Software Libre ao persoal da USC.