As universidades son o espazo natural do coñecemento, a investigación e a docencia e, polo tanto, instrumento de desenvolvemento intelectual e de promoción da liberdade de pensamento. Este papel implica unha responsabilidade social que abarca a responsabilidade co desenvolvemento sostible e, nese marco, co medio ambiente.

A USC é consciente da necesidade de incorporar a ética da sostibilidade e medioambiental a toda a súa actividade e decidiu asumir a responsabilidade de producir formación, ciencia e tecnoloxía baixo criterios de sostibilidade, fomentando en todos os membros da comunidade universitaria, o sentido da responsabilidade pola conservación e mellora do medio ambiente.

Para que estas propostas non se queden estancadas en principios xenéricos e teóricos, a USC elaborou o PLAN DE DESENVOLVEMENTO SOSTIBLE como ferramenta de xestión que, ademais de explicitar o compromiso da USC cun desenvolvemento deste tipo, permitirá optimizar os recursos dispoñibles e chegar globalmente a outras institucións e á sociedade en xeral.