Materia orgánica: Experiencia de compostaxe na USC

Motivación

Hoxe en día, a fracción orgánica dos residuos derivados da actividade universitaria acada unha substancial representación na composición do lixo que xustifica esta experiencia. A transformación da materia orgánica mediante o proceso de compostaxe é o sistema de tratamento máis respectuoso co ambiente fronte á incineración ou ao depósito en vertedoiros.

Obxectivos

-Xestión axeitada e sostida no tempo dos residuos producidos na USC

-Valorización destes residuos para obter un abono de calidade, compost

-Concienciación e promoción da participación e hábitos de consumo responsable da comunidade universitaria no respecto cara ao ambiente

-Colaboración co Servizo de Xardinaría da USC no apoio do medio natural nos campus

-Satisfacción da demanda de xestión específica destes residuos manifestada por parte da colectividade universitaria

Información de interese

Que é a compostaxe?

Proceso de descomposición aerobio natural da fracción compostable dos residuos orgánicos realizada por organismos descompoñedores (bacterias e fungos) e por microfauna detritívora (lombrigas e escaravellos).

Que é o compost?

Materia orgánica estabilizada de propiedades semellantes ás substancias húmicas do solo, libre de patóxenos e de sementes de malas herbas. Non atrae insectos nin outros vectores de enfermidades, pode ser manexado e almacenado sen ocasionar molestias e que aporta grandes beneficios para as propiedades edáficas e o crecemento das plantas.

Usos do compost

Fundamentalmente, este abono pódese empregar como:

- Emenda ecolóxica para cultivos, parques e xardíns

- Rexeneración ambiental (solos erosionados, de canteiras...)

- Control de malas herbas

- Substituto da turba e de fertilizantes sintéticos

Vantaxes ambientais do uso do compost

Os principais beneficios que aporta o emprego do compost son:

-Mellora da textura e estrutura do solo

-Aumento da capacidade de absorción e retención da humidade, calor e nutrientes do chan que axuda a controlar a erosión

-Aporte gradual de nutrientes vitais para a microfauna e vexetais

-Regulariza a salinidade e minora os efectos negativos dos axentes tóxicos

-Conservación das turbeiras, ecosistema característico de Galicia

-Aumenta a diversidade da bioloxía edáfica

Que se pode compostar?

Para obter un compost de calidade o factor decisivo estriba en realizar unha correcta separación dos residuos en orixe, xa que deste xeito incídese na heteroxeneidade do material a compostar.

Os diferentes materiais pódense diferenciar en tres categorías:

Materiais compostables

Mellor evitar nas primeiras fases

Materiais non compostables

Restos de froitas e verduras	Restos de carne e ósos	Papel e cartón
Cascas de ovos e froitos secos	Restos de peixe	Líquidos: salsas, zumes...
Pousos de café e bolsas de infusións (sen grampas)	Restos de alimentos cociñados	Aceites: fritir, aliñar...
	Restos de pasta, pan e pastelaría	Restos inorgánicos: plásticos, vidro, metais.. e calquera material que non sexa orgánico e biodegradable

$Imaxe do cartel nas cociñas indicativo da fracción orgánica compostable$
Imaxe do cartel nas cociñas indicativo da fracción orgánica compostable

[PDF-85,1 KB]

Destino final

O compost unha vez obtido, previamente avaliada a súa aptitude como emenda orgánica, mediante a correspondente análise físico-química, empregarase en terreos da propia USC.

Como podo participar?

O desenvolvemento deste proxecto precisa da participación da comunidade universitaria, se estás interesado en colaborar na compostaxe ou ben queres achegar a túa suxestión ao respecto, ponte en contacto connosco. Escríbenos a plands@usc.es ou chama á extensión telefónica 11317 e 11359.

Experiencias de compostaxe noutras universidades