Aclaración dos delegados/as de prevención

Os Delegados e Delegadas de Prevención da CIG-USC, ante a decisión da xerencia de nomear “Traballadores/as Designados/as” nalgúns centros da USC, queremos aclarar o seguinte:

• Se ben esta figura está recoñecida pola Lei 31/1995, do 8 de novembro, de Prevención de Riscos Laborais, non ten nada que ver cos Delegados/as de Prevención, xa que os traballadores designados pola dirección da empresa representan única e exclusivamente a esta, mentres que os Delegados/as de Prevención son elixidos polos representantes dos traballadores/as dentro dos diferentes órganos de representación existentes: Comités de Empresa (PAS e PDI) e Xuntas de Persoal (PAS e PDI).
• O Comité de Seguridade e Saúde é un órgano paritario constituído pola parte empresarial e a parte social, polo tanto os traballadores/as designados serían parte empresarial dentro deste órgano, no caso de asistiren ás reunións.
• As súas funcións aínda non están claras, pero a empresa xa lles asignou a responsabilidade de facer efectivo o cumprimento do Plan de Prevención correspondente ao centro onde foron designados.
• A designación destes traballadores/as debería ir acompañada da formación específica e do tempo necesario para desenvolver esta tarefa con efectividade, de non ser así, sería unha irresponsabilidade tanto por parte do designador como do designado/a, e podería ter consecuencias penais para ambos en caso de accidente.
• Cremos que a aceptación desa responsabilidade debería ter carácter voluntario.
• En ningún caso debería coincidir na mesma persoa ámbalas dúas responsabilidades, a de Delegado/a de Prevención e a de Traballador/a Designado, xa que representan intereses diferentes.