UGT NA USC

Concentración diante da Reitoría o mércores 19 ás 16.30 horas

Na denuncia dos recortes que afectan á universidade, tanto os salariais como os derivados da taxa de reposición de efectivos que provocan a precarización e falta de estabilidade do persoal, convidámoste a participar nunha concentración coincidindo coa celebración este mércores 19 do Consello de Goberno. A concentración comezará ás 16.30 horas diante do Colexio de San Xerome (praza do Obradoiro).

UGT abandona a mesa de negociación do recorte das nóminas

Diante da Mesa de Negociación para a aplicación do recorte da masa salarial das universidades galegas ditado pola Xunta de Galicia , UGT quixera manifestar:

Primeiro.- Esta mal chamada mesa de negociación carece xa dende a súa constitución da vontade necesaria por parte do equipo de goberno para alcanzar acordos reais que minimicen o recorte nas nóminas do cadro de persoal da USC, sen entrar en ningún momento a ter en conta a proposta feita desde este Sindicato. O equipo xerencial executa co maior dos celos posibles as recomendacións da Xunta, pero a conveniencia vai máis alá: porque os criterios interpretativos da administración autonómica deixan fóra do recorte o importe da Seguridade Social ou a antigüidade e o equipo de goberno da USC non o entende así.

Segundo.- Dicía o reitor no seu programa: ?Temos a obriga de escoitar a todos os membros da comunidade universitaria e de integrar as súas expectativas na xestión e na toma de decisións?. Esta mesa escoita pero é incapaz de compartir argumentos ou de alcanzar puntos intermedios, de NEGOCIAR, en definitiva. É incapaz ademais de tratar de xeito igualitario aos distintos colectivos universitarios, e vai aplicar un recorte que é evidentemente discriminatorio cun reparto absolutamente desigual e desproporcionado, prexudicando aos colectivos máis débiles.

Terceiro.- O equipo de goberno facilitou abundantes datos a requirimento dos distintos sindicatos, nalgún caso con fidelidade á solicitude e noutros casos, a interpretación libre ou simplemente nos os achegou. Nalgún capítulo esencial, como no capítulo das xubilacións de PAS e PDI para os próximos anos, as cifras e interpretacións ofrecidas corren en paralelo coa realidade, pero temémonos que non son reais, en absoluto.

Mención aparte merece o caso da RPT. A xerencia facilitou unha RPT, pero dubidamos da súa credibilidade e non somos o único sindicato que ten esta dúbida, como se manifestou nesta Mesa. Ben poderiamos pensar que a RPT facilitada non está correctamente saneada.

Cuarto.- Por todos estes motivos retirámonos desta mesa e rexeitamos rotundamente os recortes que a USC vai aplicar nas nóminas dos seus traballadores así como a maneira de proceder a aplicar estes criterios interpretativos asumidos case con rango de lei. Existían outras opcións que nunca se entraron realmente a negociar.