¿Quen somos?

O Seminario Mulleres e Universidade iniciou, xa hai un tempo, as súas actividades co ánimo de promocionar a igualdade entre homes e mulleres en tódolos niveis de actuación do sistema universitario de Galicia. A este fin constituíuse nun espazo de reflexión que, ao tempo que impulsa e insta a creación de políticas universitarias que fomenten unha igual e real participación e representación en tódolos ámbitos da toma de decisións universitarias, alenta a reflexión constante sobre a contribución das mulleres na Ciencia e na Tecnoloxía.

Entre os nosos obxectivos fundacionais figuran:

1.- Impulsar os obxectivos de igualdade de mulleres e homes en todo o proceso de creación e divulgación da Ciencia e da Tecnoloxía, especialmente no ámbito universitario.

2.- Promover e desenvolver accións de sensibilización sobre situacións de discriminación, tentando detectar os mecanismos conscientes e subconscientes que están na orixe desas situacións.

3.- Instar a aplicación de políticas de igualdade na composición dos órganos de goberno da Universidade así como na constitución de tribunais, comités, comisións, etc.

4.- Deseñar e divulgar estratexias para eliminar desigualdades de xénero no ámbito da Universidade en particular e da Ciencia, a Tecnoloxía e as Humanidades en xeral. Divulgar informacion sobre pautas seguidas noutras universidades do noso entorno e en organismos españois e internacionais sobre os recursos utilizados polas súas científicas e universitarias para romper teitos limitantes.

5.- Participar con outras organizacións para a defensa dos dereitos das mulleres e da súa plena e real integración laboral e social en tódalas áreas do coñecemento.

6.- Colaborar coas administracións, institucións e fundacións galegas e de ámbito español e internacional para a búsqueda de apoios aos nosos fins.

7.- Presentar en tódalas ocasións que se considere preciso unha acción colectiva a prol do recoñecemento da contribución das mulleres na creación da Ciencia e na xestión do Coñecemento.

8.- Fomentar no noso entorno unha visión non sexista da Ciencia, así como, en xeral, en todo o proceso de coñecemento, no seu desenvolvemento e nas súas aplicacións.

9.- Colaborar nos ámbitos autonómico, español e internacional na aplicación do Plan de Igualdade entre Homes e Mulleres en Educación.