Os profesionais egresados da Universidade non só deben contar cun nivel axeitado de coñecementos significativos. Tamén é desexable que teñan desenvolvidas outras destrezas, habilidades e valores: autonomía, pensamento crítico, dominio das novas tecnoloxías... A presentación axeitada dun traballo dende o punto de vista formal –o que abrangue aspectos lingüísticos, de estruturación da información, de redacción, de deseño, a coherencia, etc.-, é unha habilidade comunicativa que calquera universitario/a debería posuír.
A USC, a través das comisións de normalización lingüística dos centros, pretende contribuír a este obxectivo cos Premios á calidade e á excelencia lingüística dos traballos académicos, fomentando unha cultura de calidade entre o alumnado ligada ao uso do galego. Non podía ser doutro xeito nesta Universidade, que ten adquirido un firme compromiso coa extensión do galego no eido da docencia a través do Plan de Normalización Lingüística.
Con este concurso a USC premiará os mellores traballos académicos de curso, de fin de grao ou proxectos de fin de carreira, escritos en galego, aos que se lles recoñeza calidade na súa avaliación. O concurso limítase a aqueles centros en que as comisions de normalización lingüística se comprometesen a organizalos.
Os Premios á calidade e á excelencia lingüística contan co apoio económico da Secretaría Xeral de Política Lingüística da Xunta de Galicia. |
|
