Curso "Falar ao dereito". Descrición

Trátase dun obradoiro para mellorar as habilidades orais e argumentativas do alumnado.

Os profesionais egresados da Universidade non só deben contar cun nivel axeitado de coñecementos significativos. Tamén é desexable que teñan desenvolvidas outras destrezas, habilidades e valores: autonomía, pensamento crítico, dominio das novas tecnoloxías... Todos os universitarios/as deberían posuír habilidades comunicativas orais, e máis aínda tratándose de titulados/as en Dereito.

Por outra banda, aínda que é comunmente aceptado que o Dereito é unha práctica argumentativa, as facultades de dereito prestaron pouca atención á análise da argumentación xurídica. Este curso pretende iniciar o alumnado na natureza, instrumentos, límites e fins da argumentación no marco das actividades desenvolvidas polos xuristas.

O obxectivo xeral do curso é estimular e mellorar as habilidades comunicativas orais e argumentativas do alumnado, en galego. Concretamente:

• Aprender a superar o medo a falar en público
• Adquirir estratexias de expresión oral e xestual
• Desenvolver ou reforzar as capacidades que melloren a expresión oral na vida persoal e profesional
• Mellorar a competencia dos alumnos e alumnas na expresión oral en galego
• Familiarizar o alumnado co cadro en que se desenvolve a argumentación en xeral
• Identificar as peculiaridades da argumentación xurídica respecto da argumentación en xeral.

A metodoloxía que se vai empregar será eminentemente práctica; incluirá traballo persoal, en grupo e en grupos:

• Análise das actuacións comunicativas propias, do resto do grupo e de situacións reais tiradas dos medios de comunicación.
• Audicións, visionados e gravacións sobre situacións comunicativas e actos de fala cotiáns e profesionais, relacionados co Dereito.
• Estudo teórico de nocións lóxicas e argumentativas básicas e dos criterios hermenéuticos xurídicos clásicos (con entrega de material e bibliografía).
• Supostos prácticos que requiren a elaboración dun pequeno traballo persoal e en grupos de 3-4 persoas sobre temas propostos polo profesor (como, por exemplo, a normativa anti-botellón ou as redes sociais en Internet), a súa exposición pública e a crítica xurídica dos restantes grupos.

O curso ten unha duración de 30 horas (20 horas teóricas + 10 horas prácticas) e ao remate a Universidade de Santiago de Compostela outorga un certificado de bo aproveitamento.

Organízase conxuntamente coa Comisión de Normalización Lingüística da Facultade de Dereito.

• Contidos
• Matrícula
• Convocatoria