Vocabularios e léxicos do SNL

Desde o ano 1993 o SNL vén participando na elaboración, coordinación e edición de repertorios terminográficos, ata o punto de converterse nun dos principais produtores deste tipo de materiais no ámbito galego.

O obxectivo deste labor é ofrecerlles aos distintos colectivos da comunidade universitaria materiais de apoio que faciliten a utilización do galego nas relacións de ensino-aprendizaxe, na difusión da investigación e nas actividades administrativas.

Os distintos volumes editados organízanse en tres coleccións:

• Vocabularios
  Son traballos que abranguen grandes áreas de especialidade (normalmente o ámbito dunha titulación) e que compilan e presentan un número relativamente alto de conceptos (entre 4000 e 5000, normalmente)
• Léxicos
  Son traballos que se centran en áreas de especialidade máis restrinxidas e que compilan un número de de conceptos menor ca os vocabularios (entre 1000 e 3000, normalmente).
• Termos esenciais
  Son traballos pensados especificamente para o alumnado, tanto no seu deseño e formato como no seu contido: recollen terminoloxía básica de áreas de especialidade relevantes nos plans de estudo de diferentes titulacións.

Todos estes materiais difúndense a través de soportes diversos:

• En formato impreso distribúense de balde aos membros da comunidade universitaria, ben a través do SNL ou das comisións de normalización lingüística dos diferentes centros da USC, que poden optar ademais, por formatos alternativos, como os cartafoles terminolóxicos.
• En formato electrónico distribúense libremente desde aquí, en diferentes formatos. Ademais, desde finais de 2006 algúns deses traballos difúndense baixo a licenza Recoñecemento-Compartir baixo a mesma licenza. 2.5 de Creative Commons, o que permite copialos, facer obras derivadas ou un uso comercial deles sempre que se recoñeza a autoría e se compartan baixo a mesma licenza.
• Ademais, intégranse no bUSCatermos, de tal xeito que os membros da comunidade universitaria da USC poden facer unha busca puntual en todos eles -e noutras moitas fontes- de xeito simultáneo.