Teléfono: (981)563100, ext. 12602. Fax: (981)582144. Correo electrónico: xemontse@usc.es

Principais liñas de investigación:

• Xeografía e Xénero. Esta liña de investigación céntrase no ámbito rural e ten como obxectivo principal analisar o traballo das mulleres, tanto o reproductivo como o productivo. O primeiro dos campos de interés céntrase no traballo das mulleres na agricultura, establecendo relacións en función do tipo de explotación, do destino da producción agraria ou de factores xeográficos, sociais e xurídicos. Outros aspectos tratados neste campo son: contabilizar a aportación das agricultoras á producción e ó mantemento da explotación familiar; facer visible o seu traballo, infravalorado nas estadísticas, e analisar as relacións de xénero, xunto coas suas posibles transformacións. O segundo dos ámbitos de estudio é a análise do grado e forma de adaptación das mulleres rurais á globalización económica, á reestructuración productiva e ós cambios que, como consecuencia do anterior, estánse a dar no medio rural dos países desenvolvidos. As estratexias familiares para aumentar as rendas, a pluriactividade, conducen a que a poboación femenina estexa cada vez mais presente en traballos alternativos/complementarios ás tarefas agrarias; o turismo rural, o traballo industrial a domicilio, o traballo na industria localizada no medio rural, están amosando unha clara incorporación das mulleres ó mundo laboral, con posibles cambios nas relacións de xénero. Este segundo campo de estudio permite por en relación dúas escalas, a global e a local, custión de grande interese metodolóxico. O feito de pertencer a un Grupo de Investigación de Xeografía e Xénero (con centro na Universidade Autónoma de Barcelona) permite establecer comparacións entre distintos ámbitos rexionais, valorando así a importancia do local na construcción do xénero.
• Desenvolvemento rural. Esta liña de investigación céntrase na análise do medio rural galego, considerándoo no marco dun proceso de cambio, do mesmo xeito que ocurre nas demais rexións rurais europeas con características similares. Esta análise baséase, en primeiro lugar, no recoñecemento territorial dende un ponto de vista socioeconómico; en segundo lugar, na detección das disfuncionalidades e das avantaxes comparativas de que dispón; e por último trata de establecer os obxectivos e accións que leven a un (posible) desenvolvemento socioeconómico do devandito territorio.