O ABANDONO DE TERRAS:
CONCEPTO TEÓRICO E CONSECUENCIAS
Eduardo Corbelle
Rico / Rafael Crecente Maseda
Universidade de Santiago de Compostela
Recibido:
29 de outubro de 2007
Aceptado: 25 de setembro de 2008
Resumo: O abandono de terras e a conseguinte diminución
da superficie utilizada pola agricultura constitúe un problema importante
nun gran número de rexións da Unión Europea entre as
que se atopa Galicia. A posta en marcha do Banco de Terras de Galicia no ano
2007 está dirixida a corrixir, dentro do posible, esta situación
que enlaza cos elementos centrais da problemática do campo galego contemporáneo:
a incidencia catastrófica dos incendios forestais, a redución
e progresivo envellecemento da poboación rural e un ineficaz uso do
territorio que dificulta a competitividade do sector agrario. Con todo, o
propio concepto de abandono pode dar lugar a diferentes interpretacións,
co que semella necesaria unha clarificación do termo. Neste contexto
preséntase unha discusión sobre os conceptos teóricos
máis importantes en relación co abandono de terras e achégase
unha revisión da literatura científica existente sobre o tema.
A maiores, o traballo pon a énfase no carácter multidimensional
do problema e a necesidade de complementar os estudos de carácter exclusivamente
económico con outros centrados na compoñente territorial do
proceso.
Palabras clave: Abandono de terras / Banco de terras / SAU
/ Terra marxinal / Incendios.