MERCADO DE TRABALLO, FORMACIÓN E EXCLUSIÓN
SOCIAL:
ANÁLISE DA SITUACIÓN DA POBOACIÓN RECLUSA DE GALICIA
María
Barreiro Gen / Isabel Novo Corti / María Ramil Díaz
Universidade da Coruña
Recibido:
15
de novembro de 2012
Aceptado: 4
de abril de 2013
Resumo: Aínda que a exclusión social pode proceder
dunha única causa, existen colectivos cunha maior probabilidade de
padecela porque se atopan en varias destas circunstancias á vez. A
inclusión no mercado laboral é unha peza fundamental para evitala,
xa que o desemprego pode conducir ao illamento e á pobreza. Cando esta
situación se combina coa carencia dunha formación adecuada,
que dificulta a consecución dun traballo, a saída da espiral
que conduce á exclusión resulta máis complexa. Para a
poboación reclusa, ademais da condena pola comisión dun acto
delituoso, é frecuente atopar varios motivos que poden xerar exclusión,
xeralmente vinculados ao delito cometido. Neste traballo analízase
a situación das persoas que cumpren condena nos centros penitenciarios
e de inserción social de Galicia (España) mediante unha análise
cuantitativa centrada nas posibilidades de inclusión posterior da poboación
reclusa a través das actitudes e aptitudes mostradas cara a algunhas
cuestións clave. Esa actitude relaciónase co nivel de estudos
e coa formación do individuo, así como coas redes sociais coas
que conta ou coa súa propia consciencia da situación que está
vivindo.
Palabras clave: Poboación reclusa / Emprego / Educación
/ Exclusión social.