O día 10 de decembro de 2022, a profesora do GI ESCULCA Iris Estévez foi convidada pola Asociación Vida Independiente Galicia (VIGalicia) á presentación do documental “Quererla es Crearla” en Santiago de Compostela, e tamén a intervir no coloquio posterior, moderado por Juan José Maraña. “Quererla es crearla” é un documental acerca dun dereito, unha necesidade, un desexo, un compromiso político e unha posibilidade: facer que nas escolas todas as persoas poidan aprender a vivir xuntas. Construír sociedades inclusivas require desmontar os prexuízos que temos sobre a diversidade e as diferenzas. A obra e o debate posterior invitou a reflexionar sobre esta realidade dende diferentes prismas e escenarios sociais.