O pasado mércores 29 de maio o alumnado de Dobre Grao en Mestre/a de Educación Infantil e Educación Primaria participou na proba piloto do xogo “Come San, Come Sostible”, un recurso educativo para alumnado de Educación Primaria que están desenvolvendo membros do Grupo de Investigación BIOGROUP e do Grupo de Investigación ESCULCA da Facultade de Ciencias da Educación, ambos da Universidade de Santiago de Compostela.
A actividade estivo dirixida polo profesor Gumersindo Feijóo Costa (profesor do Centro Singular CRETUS) e por profesorado da Facultade de Ciencias da Educación e membros do GI Esculca, Mar Lorenzo, Javier Rico, Geno Rodríguez, Jesús García e Julia Crespo.
Este recurso educativo, en fase de experimentación, daralle a oportunidade ao alumnado de Educación Primaria de ser consciente da importancia que teñen as súas accións para o coidado da súa saúde e, ao mesmo tempo, da protección do medio ambiente e o desenvolvemento sostible. A pegada de carbono e a pegada hídrica dos 62 alimentos máis consumidos en España no ano 2023, así como o coñecemento dos principais grupos nutricionais que compoñen unha dieta equilibrada son algúns dos segredos que agocha este xogo de “Come San, Come Sostible”.